Rnôk tâm dŭt năm, âk nŭih tâm dak nơm tâm boh nau kan đah nŭih dak ba dih, ƀư nau leo nŭih lăp dak tih dôih bah ntrong n’har lăp tâm Việt Nam, ngăn lah ăp n’gor nkuăl n’har bri mpeh ba dâng. Bah nau aơ, Tahen Biên phòng, Công an, tahen ndrel n’gâng kan dôl ma n’hao n’hâm rdâng lơi.

            N’gor An Giang geh trong đah dak ba dih jong bơi tât 100 km, tâm dăch ma n’gor Takeo ndrel Kandal bah Campucia. Âk năm ma aơ, nau kan luh lăp tih dôih hôm geh ơm, ƀư jêng ăp nau tât tih jêr rdâng kơt lah nau tăch ntŭng nŭih, jă, rlăm nŭih hăn kan dak ba dih gay ma tăch ân ntŭk kan, nŭih bu êng đă pah kan jâk. Ngăn lah ăp nau luh lăp tih dôih gay tăch rgâl ndoh ndơ ntŭng bah trong n’har bri.

            Gay năn saơ, rdâng ăp nŭih luh lăp tih dôih bah trong n’har bri, ngăn lah rnôk dŭt năm aơ, ăp rmôt kan dôl ma măng nar rdâng njrăng. Êng rmôt tahen biên phòng hôm geh nau rgop ngăn bah ăp rmôt kơt công an, tahen mpông đah dak ba dih ndrel ƀư kan. Rnôk aơ, ăp nŭih tăch ntŭng ndơ ndăn rnôk dak hao têh, tâm bri măng, nkuăl geh ƀon lan bar ding rêh tâm dăch...gay ma rgum ndoh ndơ, nchuăn leo đah rnoh âk. Mhe aơ, tâm nkuăl Kháom Vĩnh Xuyên, phường Núi Sam, nkuăl ƀon têh Châu Đốc, Rmôt ƀư nau kan bah cảnh sát văng sa Công an n’gor tâm rgop nsum đah Công an nkuăl ƀon têh Châu Đốc hŏ saơ ndrel rgum joi, nhŭp geh 2 nŭih ndrel 4 bôk ndeh. Thượng tá Nguyễn Đăng Khoa, Groi Kruanh jrâu kan Cảnh sát văng sa Công an n’gor An Giang mbơh:

            ‘Trong rse tăch ntŭng hât su mhe geh nhŭp kân, jêh nê trong kan knŭng năn nhŭp geh 400 cây hât dơm, yơn lah trong sre ƀư nê ndrel rnôk mhe leo nchuăn hăn ri ndrôm hăt tâm nê păng geh rlau 1000 cây hât, ăp ndoh ndơ kơt nê mô di lah đê̆, yơn yor trong hăn jêr, nkol ri ma knŭng geh nhŭp 400 cây hât, hôm e lah nchuăt mpeh đah ri. Rnôk aơ, ndăn tâm rôk dak hao têh, ăp nŭih tăch ntŭng ndơ păng vay rgâl ntrong hăn, ntŭk hăn ndrel nau ƀư kan, nkuăl ma khân păng ƀư, ri ma ndoh ndơ tăch ntŭng geh ntrong ƀư âk, ngăch ngăn”.

            Đại tá Lý Kế Tùng, Groi Kruanh rđau kan tahen Biên phòng An Giang mbơh, ntơm bôk năm 2022, hŏ rhuăt đê̆ ntŭk kâp njrăng, mât nkuăl n’har bri ndrel njrăng rdâng srê Covid-19. Rnoh ntŭk njrăng đê̆, ri ma nau tâm ƀah ngai lơn, ăp nŭih hăn tăch ntŭng ri bu ndăm nau aơ. Ăp nŭih tăch ntŭng ti nar lơn ma ƀư âk, ƀư tĭng ăp nau blau rnôk nchuăn rdeng ndơ ntŭng: Rnôk rdeng lah saơ nŭih kan bah rmôt njrăng rdâng, ri khân păng nchlơi lơi ndơ, ndeh, mô lah ân ngâm n’ăp ma máy rdeng ndơ tâm dak, jêg ri khân păng nơm krap du, gay ma der geh bu nhŭp mhal, ăp nŭih nê mô geh rdeng leo jâk ir ôh, mô lah khân păng hôm mpôn ăp ndoh ndơ geh rnoh khlay kơt lah mah, kong tâm ndoh ndơ thuk prăk êng êng gay ma mpôn đah nŭih hăn mêt uănh bah ntrong n’har...Ngăn lah, êp aơ, hŏ geh du đê̆ nŭih nchuăn rdeng ma tuý, ăp nŭih aơ hôm geh n’ăp ma phao. Đại tá Lý Kế Tùng mbơh tay:

            ‘Tâm nau kan lơh rdâng ma ăp phung tih dôih tăch ntŭng ndơ ri geh âk nau jêr ngăn: rnoh nŭih geh jă gay ma leo lăp râng nau ƀư tih tăch ntŭng ndơ lơn ma âk, tal bar lah, nau kan nê geh bu nkhôm âk prăk ri ma khân păng hôm nsôih hăn ndrel nsôih mât ndoh ndơ bu đă leo, der geh nau lŭp, der geh phung tơm nê mhal, ri ma khân păng ƀư rjăp ngăn, janh lơh n’ăp ma rmôt ƀư nau kan phung hên. Êng nau ƀư nau tih janh, ăp nŭih aơ hôm ndăn rnôk ƀư săm ƀŭt, ăp nŭih aơ rdeng ndoh dnơ ntôn lah rvăt ntŭng ndơ ri rdeng ndơ tât ăp n’gor êng mpeh An Giang mô lah rdeng ndơ hăn rlet An Giang. Công an, Hải quan...hŏ saơ ndrel nhŭp âk ngăn nŭih rdeng ndơ tă bah nkuăl ƀon têh Hồ Chí Minh ndrel tă bah Bình Dương hăn ta aơ”.

            Ntơm bôk năm tât rnôk aơ, ăp rmôt kan n’gâng kan bah n’gor An Giang hŏ mêt uănh, saơ ndrel ma nhŭp rlau 140 tŏ, mpeh nau tăch rgâl, nchuăn rdeng ndơ ntŭng, ăp ntil ndơ ntŭng ndrel dnơ rlăm. Rnoh ndoh ndơ bơi tât 120 rmen prăk. Rnoh prăk mhal hành chính ndrel tăch ndoh ndơ geh sŏk nhŭp kân rlau 6 rmen rđil năm 2021. Rmôt kan n’gâng kan hŏ mhal 29/40 tŏ nau tih, mal 31/69 nŭih, rnoh ndoh ndơ geh leo mhal dĭng lĕ rlau 30 rmen prăk.

            Gay ƀư ân ueh nau kan lơh rdâng nau tăch luh rvăt lăp ndoh ndơ rih dôih, rdâng nau tăch ntŭng ndơ, rlăm nau kan tăch rgâl ndrel ndơ rlăm tâm rơh tât, An Giang mra lŏ ƀư ueh ăp rmôt kan njrăng, rdâng nau tăch ntŭng ndơ tâm nkuăl n’har bri. Ăp rmôt kan công an, Hải quan, Biên phòng, Mât ntŭk kan tăch rgâl...lŏ n’hao nau kan tâm rgop tâm nau lơh rdâng nau tăch rgâl ndơ tih dôih, nchuăn rdeng ndoh ndơ leo tăch tih dôih tâm nkuăl n’har bri. Ngăn lah, uănh khlay nau rgâl mhe, n’hao nau kan nkoch trêng, ntĭm mbơh, bonh đă ƀon lan tâm nkuăl n’har bri mô geh nau kơl an ân ăp nŭih ƀư tih, tăch ntŭng, râng nau mbơh phong phong tih dôih, ndrel nsum ty đah rmnôt kan n’gâng kan tâm nau kan lơh rdâng nau tăch ntŭng ndơ, rlăm nau tăch ndơ ndrel tăch ndơ rlăm./.