Ôi 20/1/2025, Bộ Chính trị, Ban Bí thư ƀư mâp măt ăp kruanh rđău kan ơm Đảng, Ngih dak, Mặt trận Tổ quốc Việt Nam, Uỷ viên Trung ương Đảng ăp khoá nkhêp nkah ndray 95 năm Nar njêng Đảng n’hanh mbah rhơn Tết nkhêp geh năm mhe Ất Tỵ. Lah ta rnôk tâm nchră, Tổng Bí thư Tô Lâm rgum nkoch tay ăp nău dơi ntoh lư khlay ta lĕ rngôch ăp trong kan bah neh dak tâm năm 2024, lah rjăp ăp nău dơi hŏ geh geh nău rgop têh kuâng bah ăp kruanh rđău kan ơm, ăp nuĭh cách mạng ơm n’hanh âk nuĭh gĭt blău tâm dak n’hanh dak bah dih n’hanh nuĭh Việt Nam gŭ ta dak bah dih.

Mpeh nău kan let năp tay, tĭng Tổng Bí thư gay mbăk anh tay nău kan têh jâk ndơ̆ neh dak nâp jâng chuat lăp tâm rơh hun hao mhe, let năp tay, he ân rgâl mhe tay dŏng trong rđău đă, n’hao nău dơi rđău kan, nău dăng mât bôk kan bah Đảng. Nkoch mpeh nău dơn kan rgum tơm  lah hun hao wăng sa – rêh jêng kon nuĭh, Tổng Bí thư an lah, lam trong kan chính trị ân rgum tĭng ƀư geh nău dơi n’hanh ngăn ngăn pah kan dăp rgum tay jâng wăng sa, nkre đah rgâl mhe trong ntĭt leo hun hao, rdâk njêng jâng nsing khoa học, công nghệ, rgâl mbrô.