VOV4.M'nông: Nchroh hun hao GDP jêr jŏt, lơn lah tâm quý 4, rnôk lam ntŭr neh tât duh hô. Ta năp nô nău dja, Bộ Kế hoạch n'hanh Đầu tư n'gluh trong nchrăp: Lah hun hao đêt tă bah mâp jêr jŏt ri tâm năm 2022, hao GDP mbra geh nklăp 7,5%. Hôm ăp ntil uĕh kơt aƀaơ, mô geh nău tât khuch ndal đah jâng wăng sa dak he tât bah dih ri GDP hao nklăp 8%. Mpeh nău mpŏng hun hao wăng sa Việt Nam năm 2023, Bộ Kế hoạch n'hanh Đầu tư mbra uănh nău tâm rnôk mbra hôm duh jêr, nsĭt geh jêr jŏt tâm păch pêng, yơn jêr jŏt âk lơn. Nkô̆ nău hao khlay ndơ n'hanh hun hao wăng sa năm 2023 dŭt jêr nchroh, Việt Nam ân geh ăp trong mât kân uĕh hun hao đăp mpăn, lah mô  mât kân uĕh ri dŭt jêr nchroh dŭt jêr jŏt. Nkoch mpeh n'gluh tơm prăk ntuh kơl, Thứ trưởng Bộ Kế hoạch n'hanh Đầu tư an  gĭt geh 46,7% rđĭl đah trong nchrăp Thủ tướng jao. Bol geh đêt lơn rđĭl đah ndrel năm bah năp nơh, yơn rnoh dơi tât ngăn âk lơn năm bah năp nơh bơi 35.000 rmen prăk. Nkô̆ tơm lah tă bah lĕ rngôch rnoh tơm prăk ntuh kơl năm 2022 âk lơn năm 2021.

VOV.VN

Nuĭh rblang: Điểu Thân