VOV4.M'nông: Kêng măng 22/8, Mpôl ntơh măt gưl têh Việt Nam tă bah Đại tướng Tô Lâm, Uỷ viên Bộ Chính trị, Bộ trưởng Bộ Công an ƀư Kruanh mpôl leo hăn hŏ râng tâm nchră nsŏng kơl kruanh rđău kan gưl têh rnă njrăng Hiệp hội ăp dak Đông Nam Á (ASEAN) - Nga tâl bar ƀư tĭng trong pơk sŏng dăng.

Lôch rơh ntơm pơk, Kruanh mpôl ăp dak hŏ tâm nchră mpeh ăp nkô̆ nău đăp mpăn têh jong ta châu Á-Thái Bình Dương, lĕ ma nău way mât kân ndrak nsiu n'hanh mô dŏng ndrak nsiu, nău tât khuch bah păng tât rnă njrăng tâm nkual; nô nău rnă njrăng, chính trị ta nkual châu Á-Thái Bình Dương tâm rnôk duh jêr hô đah ăp dak têh ndrŏng. Gay n'hao dăng tâm boh đah Nga n'hanh ASEAN tâm let năp tay, Bộ trưởng Tô Lâm dăn đă, Nga nsrôih râng tâm ăp rơh rgum nchră tă bah ASEAN ƀư tơm, đah nău ƀư tơm nklang n'hanh nău nsrôih bah ASEAN tâm ntrŭt ntrôl tâm nchră, tâm boh n'hanh rdâng lơh đah ăp ntul rlong ntoh luh, tâm nê geh rnă njrăng đăp mpăn nchuăn rdeng trong dak lêng n'hanh trong trôk ta nkual./.

Nuĭh rblang: Điểu Thân