Măng lơ 9/7, ta ngih mprơ nkuăl ƀon têh Hồ Chí Minh geh ƀư bôk nău kan nghệ thuật khlăy kahgĭt Tổng Bí thư Lê Duẩn yor Đoàn văn công Quân khu 7 tâm rgop đah ngih mprơ ca múa nhạc Dân tộc Bông Sen ƀư di rơh kahgĭt 37 năm nar roh bâh Tổng Bí thư Lê Duẩn (10/7/1986-10/7/2023).

Kruanh dak Võ Văn Thưởng tât râng bôk nău kan. Bôk nău nghệ thuật lah rơh gay ma ăp kon său nar aơ kahgĭt n’hanh lah ueh du hê nuĭh leo kan Đảng ntoh lư, kơl an geh gĭt vât tay mpeh nău rêh, nău kan cách mạng bâh Tổng Bí thư Lê Duẩn, ngăn lah nău rŏng bâh ƀon lan miền Nam, bâh ƀon lan Quảng Trị đah Tổng Bí thư Lê Duẩn. Lĕ bôk nău , đah nău ngơi nghệ thuật, trong pah kan cách mạng bâh Tổng Bí thư Lê Duẩn ntĭt tay dŭt ueh, dŭt huêng khlăy. Bâh ăp năm khay che plơ̆ sĭt ƀon tơm tât rnôk pah kan ta nkual neh Nam Bộ rnôk che lah Bí thư khu ủy, lôch nĕ tât Chiến dịch Hồ Chí Minh lịch sử...lĕ geh mpơl ntĭt tay dŭt ueh ngăn.