Jâng ty rgay tĭng ăp dĭng dak ndơ̆ bah mir cà phê rlău 1 ha hăn tât dak diăng Dak Sôr, wa Lê Quang Lâm, ta thôn Quảng Thành, xă Dak Sôr, nkuăl Krông Nô uănh tay tĭng gâl nthoi ăp gưl dĭng dak. Bah mir jay wa hăn tât dak diăng nthoi tât rlău 10 dĭng dak (du nklôn jong 50 mét) yor nê, wa hăn uănh, đăp mpăn pơng dơi nthoi uĕh. Rnôk aơ, Dak Sôr lvang êp mir cà phê jay wa Lâm lĕ kroh  lŭ n’hanh choih, mô hôm dak gay tŏ. Yơn bah công ty thủy nông, wa Lâm dơi tăng mbơh dôl rhơn, nĕ lah đêt nar tay mbra geh dak bah n’glău thủy lợi ta nkuăl Dak Mil pơk dak sĭt dak Sôr. Wa Lâm kơt âk rnăk lĕ nglăp ơm bơm, dĭng, nchrăp wơt dơn tŏ an tơm tăm.

Rvê jêng đêt nar bah năp tât aƀaơ bĭch sa mô dơi. Dak diăng kroh bah nar 6 Tết tât aƀaơ. Mpŏng lah dak sĭt gay tŏ cà phê gay bah djơh play. Năm aơ saơ duh phang lơn, âk năm lah dak hoch na nao mô geh kroh.

Dak diăng Dak Sôr lah ngoăy tâm âk dak têh ngăn ta nkuăl krông Nô, hoch rlău 2 xă Dak Sôr n’hanh Nam Xuân. Ta dak diăng aơ geh 3 dak bât lah 3 bât li gay mât dak rhŏ an tŏ tâm yan wai an tơm tăm. Ndrĭ yơn rnôk aơ, 3 dak bât li lah êng n’hanh n’ăp Dak Sôr lah nsum lĕ kroh, nklăp 1.300-1.5000ha tơm tăm jŏ năm bah kônh wa ƀon lan njok dak diăng rdâng đah duh phang. Âk mir cà phê bah nuĭh ƀon lan tâm nkual yor mô tŏng dak lĕ geh nău khĭt n’ging, âk nuĭh ƀon lan bĭch sa mô đăp mpăn yor rvê duh phang.

Wa Nguyễn Văn Đại, Giám đốc ta nkuăl Krông Nô, Công ty Khai thác Công trình thủy lợi Dak Nông an gĭt, năm aơ nu nău duh phang geh hô lơn âk năm. Rnoh dak ta lĕ 33 dak bât ta ntŭk kan mât uănh lĕ hŭch jru nkôp đah ăp năm, tĭng ta du đêt ntŭk lĕ kroh. Công ty lĕ tâm rgop đah ăp ngih pah kan ntŭk kan, pah kan đah ăp nkuăl kiău ma kơt Dak Mil, Dak Song, geh tu dak hôm dơi đăp mpăn, ntơm tâm pă sĭt nkuăl gay kơl ƀon lan tŏ tơm tăm. Yơn lah, nău pă  knŭng dơi kơl ƀon lan geh dak tŏ an tơm tăm tât rơh tŏ dak tal 4, tât dŭt khay 4. Hôm tât khay 5, lah nu nău duh phang hôm e hô ri rbăn ha tơm tăm mbra rdâng đah duh phang.

Ƀư tĭng tâm pă 2 rơh sĭt dak diăng Dak Sôr n’hanh khay 1 rơh lah 12-15 nar, rnoh dak nchrăp pă bah nkuăl Dak Mil n’hanh Dak Song sĭt nkuăl Krông Nô lah bah 300.000-500.000m3/rơh. Ntơm dơi pă tât lĕ rơh 4. Tâm rơh 5 tâm khay 5, jêng nu nău duh phang jêr jŏt lơn ri mô dơi đăp mpăn nău tŏ dak.

Wa Doãn Gia Lộc, Kruanh jrô kan Tuch tăm mât rong n’hanh hun hao ƀon lan nkuăl Krông Nô, Dak Nông an gĭt, yan wai aơ nkuăl geh nklăp 4.600 ha tơm tăm ăp năm, ndrel đah nĕ nkuăl geh bơi 30.000ha tơm tăm jŏ năm. Yan wai năm aơ lĕ nchroh mbơh lor mbra hô, yor nê nkuăl lĕ mbơh ƀư âk trong mkra gay n’hao dơi njrăng rdâng duh phang kơt rgâl tơm tăm, nkra njêng rgum, ntĭm nuĭh ƀon lan dŏng dak ntêm nkrem, koăih rbông. Yơn lah, mhe dŭt khay 2 yơn tĭng ntŭk lĕ geh nău mô tŏng dak tŏ ri nău yan wai jŏ tât khay 5, khay 6, du đêt rnoh neh tơm tăm ta ntŭk ăp xă kơt Dak Sôr, Nam Nung, Nam Xuân, tân Thành mbra rdâng đah duh phang. Nkuăl Krông Nô dôl pah kan đah ăp ntŭk kan dơi kan gay n’hao tu dak tŏ an ăp nkual geh duh phang.

Wa Doãn Gia Lộc an gĭt, nkuăl lĕ pah kan đah ăp công ty thủy điện ta dak mê Krông Nô kơt: Thủy điện Buôn Kuốp, Thủy điện Chư Pông Krông gay nchrăp pă dak tâm yan wai duh phang aơ, dêr nău rnôk ƀon lan ŭch ri thủy điện mô pơk dak ma rnôk thủy điện pơk dak ri ƀon lan lŏ mô ŭch dŏng.

Mpôl hên lĕ nchroh mbơh nu nău bah aƀaơ tât dŭt yan ŭch dak tŏ mbra n’hao âk, yơn tu dak rhŏ an mbra soăt mbrơi mbrơi. Jêng nkuăl lĕ tâm rgop đah ăp ntŭk kan kơt Công ty thủy điện Buôn Kuốp, công ty khai thác công trình thủy lợi Dak Nông, n’hanh du đêt ntŭk dak bât ta nkuăl, ndâk ƀư nar pă dak tŏ an bah dâng dak mê Krông Nô, tâm nĕ, geh 7 xă mper dak me lah khuch na nê̆, pă dak tŏ an tâm di.