VOV4.M’nông- Ăp nar aơ, nău vơt rhơn Quốc khánh 2/9 dôl geh ƀư ta lam ƀon lan Tây Nguyên. Ta bon Phôk, xã Ea Rbin, nkuăl Lăk, du ƀon nkual njônh ngai bâh n’gor Dak Lak, n’ha cờ gŭr mănh êr ntô̆ n’hao ăp trong hăn. Wa Y Ƀlor Lưk- kruanh ƀon Phôk, xã Ea Rbin an gĭt, nău rhơn bâh nar Quốc khánh nkah đah ƀon lan kahĭt tât nău way ơm tâm rnglăp, tĭng trong hăn bâh Đảng, ngih dak gay ma rdâk njêng ƀon lan ăp nar lơ ma ueh ndrŏng lơn.

“Bôk năp hên way geh mbơh tơih an ƀon lan yông cờ gay ma kahgĭt nar 2-9 Quốc khánh, nău rhơn têh. Tâm ban kơt ăp năm ăp rnăk yông cờ da dê. Mpôl hên mbơh tơih an ƀon lan gĭt vât tay mpeh nău khlăy bâh Quốc khánh lah nar Tết đăp mpăn bâh mpôl rnoi. Kahgĭt wa Hồ n’hanh ăp nuĭh lĕ khĭt an neh dak, ăp nuĭh geh kan đah cách mạng ƀon lan tĭng trong hăn bâh Đảng, ngih dak. Ƀon lan gĭt tâm rnglăp, rnôk rgŏ jă nsum ti tâm rgop an nuĭh ach o, dak buk mô lah ntưp dak si khih dioxin ƀon lan way tât râng dŭt âk”.

 Wa Đinh Đăm (rnoi Bahnar) lah bu ranh ƀon thôn Kon Sơ Nglok, xã Hà Đông, nkuăl Đăk Đoa, n’gor Gia Lai. Hăn tahen bâh năm 1963, wa Đinh Năm saơ geh nău tâm lơh ta Tây Nguyên dŭt hô, âk đồng chí, tahen ndrel bâh nơm lĕ khĭt yor mât đăp mpăn. Yor nĕ, wa Đinh Năm way mpơl nău lah ueh đah wa Hồ lĕ leo kan ƀon lan geh nău đăp mpăn, hơm răm, ueh lăng kơt nar aơ.

“ Wa Hồ lah nuĭh lĕ ntơm njêng ngih dak Việt Nam Dân chủ Cộng hòa, nsĭt tay nău hơm răm đăp mpăn an an ƀon lan. Bâh geh rklaih đăp mpăn, tĭng nău wa Hồ nti, nuĭh ƀon lan rhơn, tâm rnglăp, nsrôih pah kan jan sa, ntĭm nti tâm kơt nău kan mât rong, tuch tăm nsĭt tay săk rnglăy âk. Bâh ntơm rklaih đăp mpăn tât aƀaơ nău rêh lĕ rgâl mhe âk. Ntơm nơh mô geh ndeh máy, aƀaơ  ăp rnăk lĕ geh ndeh máy da dê, geh máy cày dŏng tâm nău pah kan jan sa. Êng xã Hà Đông aƀaơ geh âk ndeh ngăn. Lôch nĕ tivi, tủ nđik lĕ geh da dê, nău rêh rgâl mhe dŭt âk.

Ta nkual n’har bri Tuy Đức, n’gor Dak Nông, ăp nar aơ n’ha ngih dak yông gŭr lĕ ma trong, kahgĭt nar Quốc khánh 2/9. Wa Y Thái, groi Bí thư nkuăl Ủy Tuy Đức an gĭt, ta ntŭk aơ ơm geh nău rŏng cách mạng, lah ƀon lan bâh nuĭh tahen têh dăng N’trang Lơng- nuĭh leo kan rơh tâm lơh đah Pháp rŭn in neh dak Tây Nguyên tâm ăp năm bôk năp rach năm 19, geh nkual gŭ kan cách mạng ta Quảng Trực- du ntŭk ntoh lư ta rơh tâm lơh tâm su đah Mỹ rklaih đăp mpăn neh dak. N’hao nău way ơm cách mạng, ăp năm ba năp, ƀon lan ăp mpôl rnoi ta Tuy Đức tâm rnglăp tay tâm kơl an hun hao wăng sa. wa Y Thái an gĭt.

“Bâh nău ơm dơi geh, nkuăl lĕ ntrŭnh nghị quyết mpeh nău kan n’huch ach o nâp nâl tâm ăp ƀon lan rnoi đê̆ ta ntŭk, tâm nĕ an lor rnoh nuĭh kan bâh ăp bôk nău kan an nkuăl ach o, bôk nău kan n’hao nău rêh nău mĭn an ƀon lan rnoi đê̆ n’hanh bôk nău kan rdâk njêng nkual ƀon lan mhe gay ma rgum ntuh kơl an ƀon lan. Ăp xã geh rdâk njêng bôk nău kan na nê̆, tâm di đah ăp ƀon, hăn ndrel đah ăp rnoh nuĭh kan geh ƀư. Nkuăl Ủy pă nău kan, pă nuĭh kan na nê̆ an ăp đồng chí tâm rnâng kan way kan an geh kâp chăm na nê̆ an ăp đồng chí tâm rnâng kan an geh ŭanh năl , ntrŭt đă bâh ta ntŭk, an geh ƀư na nê̆ n’hanh geh săk rnglăy, mât đăp mpăn ƀư tĭng dơi nău n’huch ach o an ăp ƀon lan”.