Tâm nau ndâk njêng ƀon lan mhe, bu ranh Puih Duch, xã Ia Der, nkuăl Ia Grai, n’gor Gia Lai ndrel ma cán bộ, xã, ƀon nsôih nkoch trêng, bonh đă. Ƀon lan nkra trong, tăm kon ntil ƀư n’gar, ƀư ueh nau tâm rlong pah kan jan sa, tăch rgâl jăp blau, bonh đă ƀư ndrŏng ueh. Đah ăp nau kan ngăn, tâm ƀon Jut 2 wa geh âk nŭih bu rnơm ndrel kơt tĭng. Wa Ksor Du, tâm ƀon Jut 2 nkoch: Năm 2017, bu ranh ƀon Puih Duch mbơh tât kônh wa lah ƀon lan hŏ geh Ngih dak kơl 1,3 rmen prăk gay ndâk nkra trong jong rlau 1,3 km. Bu ranh bonh đă âk rnăk tâm ƀon pă neh nkra trong, ndrel ndâk njêng ƀon lan mhe, wa nơm pă neh gay ma nkra trong ân jêh. Rnơm nau tâm ban nuih n’hâm ndrel nau nsôih cán bộ ndrel ƀon lan, tât rnôk aơ, ƀon lan hŏ geh trong hăn mhe.  Trong bê tông hŏ kơl an kônh wa hăn ro nơih, nau nchuăn rdeng ndrel tăch ndơ tuch tăm geh ơih. Ƀon Jut 2 mô êng knŭng ƀư jêh ăp nkô̆ nau ndâk ndâk njêng ƀon lan mhe ma hôm geh săch ƀon leo trong tâm nau kan ndâk njêng ƀon lan mhe ân ƀon êng tât kơt uănh, tĭng ƀư. Wa Ksor Du, ngơi:

‘Nkoch tât nau leo trong lor bah bu ranh Puih Duch, kônh wa ŭch rŏng, rnê ryơk da dê. Bu ranh lah nŭih mro tĭng uănh, bonh đă nuih n’hâm kônh wa nsôih tâm nau pah kan jan sa gay n’hao nau rêh ndrel hun hao ƀon lan nar lơn ma ueh, kônh wa ta aơ ăp nŭih tĭng nau bah bu ranh ƀon ndrel mro nsôih ueh kơt tĭng nau bu ranh ƀon”.

Bu ranh Puih Duch tă ƀư âk nau kan tâm nkuă, kơt: Kruanh UBND xã Ia Der; Kruanh Công an xã; Bí thư Chi bộ ndrel rnôk aơ ƀư kruanh Ban nau kan mặt trận, lah nŭih geh bu rnơm bah ƀon Jut 2. Lah du hê Đảng viên, bu ranh Puih Duch mro ntoh nau lah ‘ntung njŏ”, leo ăp nau ntrŭnh, trong kan bah Đảng ndrel Ngih dak tât ƀon lan. Wa Puih Duch, ngơi:

 “Gâp lah ntung nthoi, kônh wa hôm rnơm ri nơm hôm kan. Ăp nau ntrŭnh, ntrong kan bah Đảng ndrel Ngih dak ri nơm năch nkoch mbơh tât kônh wa gay mhâm ƀư nau rêh nar lơn ma ueh lăng lơn, ƀon lan nar lơn ueh đŏng. Rlau ma nê ri kônh wa mô dơi djăt nau nsŭk đă bah phung rlăng ƀư roh nau đăp mpăn tâm rnglăp, ndrel nê ri ngih dak ân oh kon hăn nti ân ăp gay ma geh nau blau, tă bah nê ndâk njêng ƀon lan têh ndrŏng”.

Wa Siu Hnit, Groi Kruanh UBND xã Ia Der, mbơh: Đah nau gơih n’ơn, bu ranh Puih Duch mro hăn leo trong lor tâm nau kan bah ƀon lan, tâm rgop ma ntrong kan chính trị tâm dâng, bonh đă ƀon lan ƀư ueh nau ntrŭnh, ntrong kan bah Đảng ndrel Ngih dak. Tâm nê, nau tam ngăn tâm nau nkoch trêng lah “rêh ueh chroh ueh”, ndâk njêng ƀon lan mhe, jut lơi nau tâm gŭ ur sai ơm, tâm gŭ êp dak mha, hun hao văng sa rnăk vâl.

‘Đảng viên Puih Duch ƀon Jut 2 lah nŭih geh bu rnơm, mro nkoch trêng ăp nau ntrŭnh, ntrong kan bah Đảng ndrel Ngih dak. Ăp rơh rƀŭn, wa mro geh nau nchih n’hêl ndrel sĭt nkoch tay an kônh wa tâm ƀon đah ăp nau kan văng sa, ntĭm nti, rnă njrăng neh dak, rgop nau lah nŭih tơm kơl an xã geh dơi ăp nau kan mpeh ƀon lan mhe. Wa lah nŭih ueh, leo trong ngăn geh kônh wa ŭch rŏng”.

Ia Grai lah nkuăl n’har bri, geh 13 xã, nkual têh, đah 150 thôn, ƀon, tổ dân phố, tâm nê geh 92 ƀon rnoi mpôl đê̆. Ăp năm rlau aơ, ăp bu ranh ƀon, kruanh thôn ndrel nŭih bu rnơm hŏ geh nau rgop ngăn tâm nau râng rklaih ăp nau kan văng sa, rêh jêng, ndâk njêng ƀon lan mhe, đăp mpăn mpăn rnă njrăng, mât nâp ndrel ƀư ueh nau vay ơm văn hoá rnoi mpôl, ƀư ueh nau tâm rnglăp tâm ăp rnoi. Wa Trương Thế Vinh, Kruanh Jrâu kan Dân tộc nkuăl Ia Grai, mbơh:

 ‘Wa Puih Duch lah nŭih ntoh lư leo trong bah cán bộ mặt trận, păng lah nŭih mro ƀư ueh nau kan geh jao, ngăn lah păng geh nau dơi ƀư ueh ngăn lah nŭih ƀư ntung nthoi đah nau nkoch trêng bonh đă ƀon lan tâm nau kan bah neh dak, hun hao văng sa, rêh jêng nkual rnoi mpôl đê̆, tâm nê geh nau ƀư bôk nau kan n’huch nau tâm gŭ ur sai bah ơm, tâm gŭt êp dak mham nơm tâm nkual rnoi mpôl đê̆, ngăn lah nau kan rnoi mpôl nơm. Bah nau kan bah nơm ri hên saơ kŏ geh gĭt dơi ăp nau kan ndrel nau ƀư bah wa đah nŭih ƀon lan tâm nkuăl đŏng”.

Đah ăp nau rgop bah nơm, bu ranh Puih Duch geh ndơn dơi âk bằng khen, săm ƀŭt rnê nkhôm bah ăp gưl kan tă bah Trung ương tât nkuăl đŏng. Êp aơ ngăn, khay 9/2022, wa geh Kruanh UBND n’gor Gia Lai pă nau nkhôm yor geh nau dơi blau tâm nau kan rgum ndâk njêng nau tâm rnglăp rnoi mpôl tâm nkuăl ƀon lan./.