Rơh 2: Dak Nông moh nau ƀư gay ma njrăng rdâng nau njêng neh yôk jêng neh khay
VOV4.M’nông: Kơt nau phung hên hŏ nkah, nau kan “hao khlay neh” tâm n’gor Dak Nông tâm dŭt năm e tât rnôk aơ ê bah ơm. Tâm rnôk nê, âk mpưm neh yôk hŏ geh uih lâng gay ma dŏng ân nau leo tăch. Lŏ nau ƀư “Njêng neh yôk jêng neh khlay tâm Dak Nông: Nau tih âk, rklaih mô tât lôch” bôk nau ntuh nar aơ phung hên geh nau nkoch rơh 2 đah nkô̆: “Dak Nông moh nau ƀư gay ma njrăng rdâng nau njêng neh yôk jêng neh khay”
Tâm rnôk rnoh neh hao khlay ê hŏ tă geh, rnoh neh tâm xã Nhân Cơ, nkuăl Dak Rlâp, n’gor Dak Nông dôl ma tâm rnoh hao khlay ê tă geh ndrel tĭng ma nê, âk yôk prêh geh bu uih lâng tih dôih gay ma kơl an nau tăch rgâl. Wa Phạm văn Quân, Groi Kruanh UBND xã Nhân Cơ mbơh, âk nŭih geh saơ đŏng yơn xã mô hôm geh nau dơi tâm nau rklaih nau tih:
“Jrâu kan pháp, Jrâu kan tài nguyên ndrel môi trường kŏ jur tât ta aơ tâm rgop hôm. Nŭih ƀư ri mô geh ma neh nê lah neh bu. Rklaih ri ân geh rklaih mhal nŭih tâm di tơm păng, yơn rnôk mâp ma nŭih tơm păng ri lŏ mô dơi geh mâp, păng nê gŭ ta Sài Gòn mô ŭch hăn mâp. Ma bu njêng kơt nê ri, rnôk nơm rklaih ri jêr ngăn yor lah tĭng nau khân păng geh nŭih mbơh an, khân păng rlet trong luật, ri nơm mô gĭt, dŭt jêr. Ma nơm ân nsrŭng nau kan ri kŏ geh ƀư săm ƀŭt ân mbơh nau rlu kan hôm, yơn mô di lah ăp nar kŏ geh oh nô tâm nê mro ôh”.
Wa Lê Văn Hoàng, Groi Kruanh UBND nkuăl Dak Mil, n’gor Dak Nông mbơh, geh du đê̆ nau jêr ndrel kol tâm nau rklaih nau tih tâm nau kan uih lâng neh yôk tih dôih. Tal bôk năp lah rnoh mhal rnôk aơ dôl hôm dêh, tĭng nau ntrŭnh mrô 91 năm 2019 mpeh nau mhal prăk tâm nau kan neh ntu đah nau tih lơh khuch neh ntu ri rnoh mhal tâm gưl xã âk ngăn lah 5 rkeh ndrel tâm guăl nkuăl lah 50 rkeh. Tâm rnôk nê, rnoh ăp blah neh jêh geh uih lâng mra hao tât ma rmen prăk, nŭih tih mra ƀư tih gay ma ndơ̆ prăk mham. Nau kan aơ ân geh mĭn rvê, rgâl nkra mpeh luật pháp tâm ăp nau kan ngăn ân geh săk tam ndrel geh nau nkri:
‘Yôk prêh rnôk aơ uih lâng hôm ma ndâk ân geh kơt bôk năp ri jêr ngăn. Rnôk aơ Chính phủ dôl ndâk nau nchrăp rgâl Luật nẹh ntu, mpeh nkuăl ri kŏ đă ăp gưl n’gâng kan ân geh ntrong kan rgâl nkra mhâm nau ƀư ân geh tâm di ndrel geh lăp tâm nau ngăn”.
Tĭng wa Đỗ Tấn Sương, Kruanh UBND nkuăl ƀon têh Gia Nghĩa, rnôk ma phung tăch rgâl neh ntu tâm nkuăl ƀon têh hôm âk, hôm nau rgum ăp nau ntuh kơl tâm nau ƀư pă blah neh, nkhah blah neh, uih lâng neh mra hao âk. Tâm rnôk nau ŭch ndâk ngih vâl bah nŭih ƀon lan ri ŭch ngăn, yơn nau kan rgum ƀư kơt rnôk aơ ê geh tâm ban ma nau nchrăp ƀư nau kan ngăn geh n’hêl knŭng geh 6000ha/27 rbăn ha ndrel rgum âk ngăn tâm nkuăl ƀon têh:
‘Bah rnôk yan srê ri âk nŭih ƀon lan tâm Sài Gòn, Bình Dương, Đồng Nai kŏ ŭch hăn rvăt 5-7 sào, du héc ta, kŏ ŭch ƀư ngih, ƀư mir. Yơn nau jêr ngăn bah nơm rnôk aơ lah ê dơi rklaih nau ŭch geh mir, mir ngih nê. Yor lah neh nê, dôl lah neh tuch tăm, nkuăl ƀon têh nơm ê geh rgum lĕ, ê tĭng năn ma nau ngăn. Lah nơm ŭch ƀư moh nau kan ri ân geh nau rgum ân n’hêl”.
Tâm rnôk nê, wa Nguyễn Anh Tú, Kruanh UBND nkuăl Cư Jút, n’gor Dak Nông ân lah, gay ân geh nau kan uih lâng neh, yôk tih dôih ân geh nau kan dŭt têh bah n’gâng kan tâm dâng:
‘Êng nau kan rklaih đah ăp nŭih tih ri ân geh uănh nau kan bah gưl kan tâm dâng, gưl xã, nkuăl têh, ân geh uănh tay nau kan mât neh ntu hŏ ueh đŏng lah. Lah kơt nau tih hôm geh âk ri ân geh ndơn ăp nau tih nê bah ăp nŭih ƀư cán bộ tâm nê ngăn lah ăp nŭih ƀư kan địa chính ndrel kơp n’ăp ma rđau kan xã”.
Wa Lê Trọng Yên, Groi Kruanh UBND n’gor Dak Nông lah rjăp, nau kan uih neh, yôk gay ma lâng jêng tih dôih tâm nkuăl tâm rơh rlau aơ lah ân geh nkah lah. Nau kan tăch rgâl neh ntu, pă blah neh tâm du đê̆ mtŭk ê geh nau kloh rah vah, ê geh tâm di, du gưl lah yor ăp nau ntrŭnh bah pháp luật kŏ kơt lah nau ntrŭnh bah nkuăl ê rjăp. Nau aơ jêng tât nau tih lah Ngih dak roh prăk soay, nau rgum ƀư kan tih ndrel ntŭk ntu tăch rgâl neh mô mâp ueh. Gay ma rgâl, Rnâng kan rđau kan Đảng bah UBND n’gor dôl ma rđau nau ndâk nau ntrŭnh mpeh nau ƀư nau kan tă bah rđau kan n’gor tât gưl xã, phường, tổ dân phố:
‘Êp aơ, Chính phủ hŏ ntrŭnh nau ntrŭnh mpeh kan tăch neh ntu, ri nau aơ UBND n’gor jao ân Sở Tài nguyên ndrel Môi trường ƀư nsum đah N’gâng kan ndâk nkra, đah ăp nau kan bah nkuăl, mra kơl tâm nchră nau ân UBND n’gor gay ma ndâk ân nâp tâm nau ƀư tăch rgâl neh ntu ân geh tâm di pháp luật. tal bar, lah nau kan mât neh ntu tâm nau nkhah neh ndrel ma ndâk ƀư. Ân geh ăp nau ntrŭnh gay ma nkuăl n’hao nau kan mêt uănh. Nau kan tal 3 lah ân geh ƀư ân nâp rjăp ngăn tâm nau ndâk njêng nau nchrăp dŏng neh ndrel nau ntrŭnh dŏng neh, der jêng ăp nau geh rgum ƀư tih nsum, pă nkhah êng neh jêng blah mô tâm di nau ntrŭnh ndrel nau nchrăp neh hŏ geh ân ƀư”.
Nau dah rŏng ma ƀư, mô geh nau klach rvê bah âk nŭih tih ân saơ, ndrel ma nau mô nâp tâm nau kan, ƀư lhoi tâm nau mât neh ntu bah ăp gưl tâm nkuăl kŏ hôm geh đŏng ăp nau ƀah mpeh trong luật pháp, nau leo mhal nau tuh ndrel nau rđau kan, mât kan bah cán bộ tâm nkuăl. Âk ntŭk geh nau kan tât mô geh, nau rgum tâm sa rêng nsum, ân geh nau lăp kan ân rjăp, dăng ngăn bah ăp gưl n’gâng kan bah n’gor Dak Nông./.
Nŭih rblang: H’Thi
Viết bình luận