Rơh 1: Dak Nông lir lar chuk rli yôk, lâng yôk mô tâm di

          VOV4.M’nông:   Rnôk bah năp, ta Dak Nông, âk nkô neh, dôr yôk lĕ chuk rli mô tâm di gay sŏk neh lâng rhŏ an nău ŭch tăch, rgâl. Âk nkô yôk njok tĭng ăp Quốc lộ, ăp trong me têh, ngăn lah ăp nkual êp ăp n’glău bât, dak diăng lĕ geh chuk mô tâm di, yơn ngih pah kan dơi kan rmal mô rjăp. Nău lah aơ, Nău nchih bah Đài TNVN ta Tây Nguyên geh âk nău nchih “Ƀư rgâl neh yôk jêng neh mah ta Dak Nông: Tih lir lar, rmal n’gul gâl”.

Ta xă Trúc Sơn, nkuăl Cư Jŭt, n’gor Dak Nông geh âk nkô yôk lĕ n’hanh dôl geh chuk rli mô tâm di. Bah meng ngih rƀŭn thôn 6 bah xă, du trong tuh chay jong rlău 300m dơi ƀư mô tâm di bah Quốc lộ 14 lăp du nkô yôk lĕ geh chuk rli n’hanh pă lôk, nkhah trong. Ta aơ, âk ndơ ƀư dôl dơi nchrăp ƀư jêh du nkual neh kơt “rlu rlău”. Wa Trần Đình Nam, Kruanh UBND xă Trúc Sơn an gĭt, nkual neh yôk aơ aƀaơ lah neh mir. Bôl UBND xă n’hanh UBND nkuăl lĕ ƀư sam ƀŭt, rmal prăk mpeh nău tih phah djơh neh n’hanh nuĭh tơm neh lĕ ton rlu ƀư, mkra nău khuch, yơn jêh nĕ pơng aơ hôm e ƀư tih tay n’hanh mpla tăch:

“Khân pơng pah kan ma he mô dơi mĭn. Rnôk khân pơng chuk rli bah dâng 500m2 ri xă lĕ rmal, jêh nĕ khân pơng chuk rli rlău tay lĕ đă nkuăl, nkuăl lĕ rmal 20 rkeh prăk hôm. Mpeh nău khân pơng lah êng, ƀư êng dŭt jêr an ƀon lan. Khân pơng djăt ƀư ma tâm rnôk he dôl âk nău kan, mô di ăp nar uănh ta ntŭk nĕ. Aƀaơ nkuăl lĕ an rlu ƀư tăch neh nĕ”.

Trong tuh chay mô tâm di ta xă Trúc Sơn, nkuăl Cư Jŭt.

Nău chuk yôk, rli yôk ta xă Trúc Sơn, nkuăl Cư Jŭt geh jêr jŏt bah dŭt năm e tât aƀaơ. Ăp dôr yôk, nkô yôk ta xă ơm dŭt âk lah lŭ chreh, dŭt jêr tuch tăm, knŭng 20-30 rkeh prăk du sào, jêng êng hao rlău 10 tơ̆, âk nuĭh hăn joi rwăt. Jêh nĕ, khân pơng chuk rli đah nkô̆ nău ŭch rgâl neh gay tuch tăm. Yơn n’hêl na nê̆ gay pă lôk, nkhah trong, an tăch rgâl.

Njok tĭng Quốc lộ 14 bah nkuăl Cư Jŭt hăn rlău nkuăl Dak Mil, nkuăl Dak Song, tât nkual ƀon têh Gia Nghĩa n’hanh nkuăl Dak Rlâp bah n’gor Dak Nông, nău chuk rli neh yôk geh lir lar. Wa Phạm Quang Nam, Groi Kruanh UBND xă Nâm Njang, nkuăl Dak song an gĭt, nău aơ geh n’ăp ta neh mir n’hanh neh bri.

Âk nkô yôk njok trong Quốc lộ 14 bah n’gor Dak Nông dôl geh chuk rli mô tâm di

“Ƀư tih tâm nău chuk rli, nkhŭt neh ta rnoh neh bri geh đŏng ma neh lŏ mir geh đŏng, gay ƀư tăch rgâl, neh mô tâm di ri geh đŏng. Xă dôl tâm rgop đah ăp nău kan bah nkuăl, ăp ngih pah kan way kan, tâm nĕ geh jrô kan tài nguyên, jrô kan kinh tế hạ tầng, công an nkuăl, hạt kiểm lâm, ƀư ăp bôk nău rgop tâm nchră, trong uănh nđôi, rmal ăp nău tih”.

Ta nkual dak leng Cá Sấu, ta phường Nghĩa Tân n’hanh Nghĩa Trung, nkual ƀon têh Gia Nghĩa, geh du đêt nuĭh chuk yôk, phah yôk, rbông lŭ bât dak diăng, sŏk trong dak leng gay ƀư ntŭk pâl nđaih. Njok dak diăng Dak Nông ăp nuĭh lĕ ƀư bât rbông bê tong, rbông sroh lŭ mô tâm di an rhŏ ntŭk pâl nđaih ntŭng aơ. Dôl lah, jêh rnôk hăn ngăn, rmôt nchih nău ôp đah kruanh ta ntŭk ri du hê bu klô sơm săk lah Trọng kuăl điện thoại ntêt nkri:

“May rlŏk ri khân pơng hăn uănh nđôi lê̆ lă. Yơn uănh nđôi mô dơi ƀư pơng ơm yơn roh mô lah hăn. May rlŏk ri gâp an ntlơi prăk an may tăch du đah ty mô geh klach mham. Bah kơi nchih uĕh mô ri gâp koh bôk”.

Nkô yôk jêh chuk rli jêng “neh mah”.

Nău chuk rli neh yôk, jŏ jong, âk nuĭh bôl kđôi, ntang săk, đê̆ đŏng uănh mô khlay pháp luật, ntêt nkri nuĭh nchih nău an saơ, nău rmal tih ta ntŭk dôl geh nău. Tâm rnôk nĕ, ăp nkual duh hô đah chuk rli mô tâm di lah ăp ntŭk geh neh dŭt khlay, nklăp 2-3 rhiăng rkeh prăk du sào đah nău aƀaơ lah neh yôk. Rnôk jêh chuk rli neh lâng, neh yôk lĕ dơi an jêng neh mah, nău khlay ntŭk neh lŏ dơi ntrôl hao âk tơ̆, dơi hao tât 1 rmen prăk/sào, đê̆ đŏng 2-3 rmen prăk/sào n’hanh âk nuĭh nsĭt geh dŭt âk bah nău ƀư tih mô tâm di aơ.

                    Nuĭh rblang: Y Sưng Phê Ja