Ndrel đah kruanh ăp n’gâng kan nău kan n’hanh 2 n’gor Dak Lak, Khánh Hòa, âk nuĭh ƀon lan ta xă nkual jru ngai Cư Drăm nkuăl Krông Bông n’hanh Cư San, n’gor Dak Lak tât uănh đŏng rnôk luh bah ndơ ƀư rach năm. Nô Trần Hữu Thới, ta xă Cư Drăm, nkuăl Krông Bông, n’gor Dak Lak, nkoch:

“Oh saơ dŭt uĕh, Ndơ ƀư aơ an lah n’gâng tơm. Nău tay lah rhoăt đêt mông dŭt ngăch, n’hanh êp tât mbra hun hao wăng sa dŭt dăng”.

Nău nchrăp ƀư ntuh kơl ndâk ƀư trong cao tốc Khánh Hòa-Buôn Ma Thuột geh bôk trong ta ntŭk Quốc lộ 26 n’hanh Quốc lộ 1, nkual Nam Vân Phong, nkual têh Ninh Hòa, n’gor Khánh Hòa; ntŭk tâm mât n’glêh dŭt đah trong Hồ Chí Minh dêr mpeh bah lơ nkual ƀon têh Buôn Ma Thuột, n’gor Dak Lak. Dĭng lĕ jong bơi 118 km, prăk ntuh kơl rlău 21.900 rmen prăk. Tâm nĕ n’gor Khánh Hòa ƀư tơm ntuh kơl 32 km, prăk 532 rmen prăk; N’gâng kan ntung trong ƀư tơm ntuh kơl 37,5 km, prăk 9.818 rmen prăk, hôm ƀa ƀă lah n’gor Dak Lak ƀư tơm ntuh kơl. Năm ƀư tĭng nău nchrăp ƀư nchrăp bah khay 6/2023 tât năm 2030 mbra jêh tâm ban n’hanh ndơ̆ an dŏng.

Wa Phạm Ngọc Nghị, Kruanh UBND n’gor Dak Lak an gĭt, n’gor lĕ rgum ntĭm rđău bah rnôk nchrăp nău ƀư dơi uănh an n’hanh ntơm sŏk neh, n’hanh mĭn uănh dŭt n’hâm chính trị bah ƀon lan.

“Mpeh đah nău kan bah nơm, n’gor Dak Lak ton đah Thủ tướng chính phủ mbra rgum tay ntĭm rđău Ban mât uănh nău nchrăp ƀư, ndrel ăp ngih pah kan, ntŭk kan, ƀon lan ntrôl ngăch sŏk neh hôm ƀa ƀă, jao an 100% măt neh n’hanh ăp ndơ khlay an ntŭk kan ƀư bah năp 31/12/2023; nta nơih ngăn an ăp ntŭk kan ƀư, mbơh ntĭm, ƀư tĭng nău nchrăp ngăch, uĕh nâp”.

Rnôk jêh, trong cao tốc Khánh Hòa Buôn Ma Thuột lvang 1 mbra rgop lôch jêng boăt nthoi nkual Tây Nguyên đah Duyên hải Nam Trung Bộ, nthoi njok trong cao tốc Bắc-Nam mpeh bah lơ, trong Hồ Chí Minh, Quốc lộ 1, trong ndeh mper dak lêng), mât uĕh săk rnglăy ăp nău nchrăp ƀư lĕ n’hanh dôl ntuh kơl, tâm di nău ŭch nchoăt rdêng, jêng an nkă rmeh, ntrôl hun hao. Ndơ ƀư rgop n’hao dơi tâm rlong, nta an boăt nthoi, ntrôl kan ndrel n’hanh hun hao nkual, rgop đăp mpăn rnă njrăng, mât njrăng bri dak, jŭt n’hŭch ach o, ntơm ƀư dơi ăp nău rƀŏng, trong kan hun hao wăng sa-rêh jêng tĭng Nghị quyết Đại họi 13 bah Đảng. Đah nuĭh ƀon lan ta ăp ntŭk nkual jru ngai bah n’gor Dak Lak n’hanh nkual yôk mpeh Tây Nam n’gor Khánh Hòa, nău  nchrăp ƀư cao tốc Buôn Ma Thuột Khánh Hòa lah ndơ ƀư rach năm, nău uănh mĭn bah Đảng, Chính phủ, rlău nău mpŏng kâp bah kônh wa ƀon lan.

Ndrel đah cao tốc Khánh Hòa-Buôn Ma Thuột, di rơh aơ geh 2 nău nchrăp ƀư khlay êng dơi rdâk ƀư, nĕ lah Trong cao tốc Biên Hòa-Vũng Tàu n’hanh  Nău nchrăp ƀư Trong Vành đai 3, nkual ƀon têh Hồ Chí Minh. Aơ lah 3 nău nchrăp ƀư khlay ngih dak nău ntung trong đah jong bah 3 trong lah 247 km; dĭng lĕ prăk ntuh kơl bah 3 nău nchrăp ƀư 115 rbăn rmen

Ntoh ngơi ta nar ƀư, ndơn măt kruanh Chính phủ, Thủ tướng Phạm Minh Chính lah rjăp, Đại hội Đảng lam dak rơh tal 13 lĕ mĭn lah tay ndâk ƀư ntung trong lah ngoăy tâm 3 nău khlay têh, tâm nĕ kơl lor hun hao du đêt ndơ ƀư khlay ngih dak mpeh ntung trong. Thủ tướng ntĭm kloh, nău khlay bah 3 nău nchrăp ƀư.

“Nău khlay bah 3 nău nchrăp ƀư rdâk ƀư nar aơ lah ăp nău nchrăp ƀư dơi kơt dŏng trong an êng mpeh ntrôl dăng tâm pă gưl pă nău kan, tĭng nĕ jao ƀon lan ƀư ngih pah kan tơm mât uănh ƀư tĭng nău nchrăp kan; kơt dŏng trong rgŏ jă tơm prăk an nău nchrăp ƀư tâm rgop đah tơm prăk Trung ương n’hanh n’gor; kơt dŏng ntĭm ndranh gay săch nuĭh ndranh ƀư, tă bah rhoăt đêt nar nchrăp an mbơh ƀư nău nchrăp. 3 trong ƀư aơ lĕ dơi mât uĕh dŭt n’hâm tam, mĭn lah nău di bah Đảng, Ngih dak tâm nău an trong ƀư mhe gay jêh nău rƀŏng hun hao tâm ban ntung trong tĭng Nghị quyết bah Đảng.

N’hêl na nê̆ lĕ saơ, ntung trong lah nsum n’hanh trong cao tốc, tach ndeh păr, ndrâm dak lêng lah êng nsĭt tay săk rnglăy na nê̆ mpeh hun hao mhe mpeh wăng sa-rêh jêng tât ta nĕ, âk nkual ƀon têh, nkual công nghiệp ndoh ndơ rhŏ dŏng, pâl nđaih dơi lôch jêh, neh ntu dơi dŏng săk rnglăy.