VOV4.M'nông: Đah nău ƀư lah đơn vị mât njrăng nău dơi n'hanh nău geh bah oh yuh, ăp gưl Hội bu ur Việt Nam n'gor hŏ geh âk nău kan gay ntrŭt ntrôl pah kan nkoch trêng, lor nchrăp nking nchăng n'hanh rdâng lơh tâm lah tâm janh nsing tâm bu ur, mât njrăng nău dơi n'hanh nău geh di bah oh yuh hội viên, rgop rdâk njêng nău rêh nuih n'hâm ƀon lan rgâl mhe lơn.   

Lôch du nar ŏ r'ah tŏ cà phê n'hanh klêh tiêu, ăp oh yuh hội viên hội bu ur buôn B’ling, xã Ea Kpam, nkuâl Cư Mgar rgum ăp tŏng ta jay rgum ƀon, râng du rơh rgum nchră njrăng n'gang bah tâm lah tâm janh rnăk wâl n'hanh tih lơh tât kon se tă bah Hội Liên hiệp bu ur nkuâl kan nsum đah xã ƀư. Bôk nău kan grêt dăch đah rnăk wâl ăp rnăk oh yuh râng tâm nchră khuh n'gôr, jêng âk nău ŭch ôp, rgop nău mât njrăng đăp mpăn an bu ur n'hanh kon se ntŭk nsum mpôl, tâm nhih nti n'hanh ta trôm mạng. Yuh H Ra Mơ Ayun (amí Khoa), ta buôn Bling, râng nkoch trêng rhơn nkoch:

Gâp n'hanh oh yuh tâm ƀon hŏ gĭt tay âk nău nti an săk nơm. Gĭt dơi nkô̆ nău khlay bah nău tâm lah tâm janh tâm rnăk wâl n'hanh tih lơh kon se, lơn lah đah ăp kon se bu ur. Ntơm bah ăp nău gĭt dơi, gâp mbra nkoch trêng tay an ăp oh yuh bu ur êng ƀa ƀă tâm ƀon tâm ban kơt kon său tâm rnăk. Gay njêng nău rêh đăp mpăn n'hanh hun hao, mô hôm geh nău tâm lah tâm janh tâm rnăk wâl tâm ban kơt tih lơh kon se.

 Ndrel đah ăp rơh ƀư nkoch trêng, tâm nchră rgum kơt ta Buôn B’Ling hội bu ur ăp xã ta Cư M’gar hôm tât jay khâl, pă nklâm ndơ ăp hội viên lah nuĭh geh lơh tâm rnăk wâl; nău nkra bah tâm nuih janh, rblang gay ăp oh yuh geh trong uănh kloh lơn mpeh tâm lah tâm janh rnăk wâl, lor nchrăp nking nchăng bah tâm lah tâm janh, geh trong mât chăm tâm di  rnôk geh nău tâm lah tâm janh rnăk wâl. Dơn nklâm ndơ bah hội bu ur xã tât jay pă an, yuh H Dế Niê (amí Bon), ta buôn B’ling, xã Ea Kpam rngot rhơn nkoch:

 Dŭt lah uĕh n'hanh rhơn rnôk saơ cán bộ bu ur tât khâl jay pă nklâm ndơ, rgŏ jă, ƀư an rnăk wâl rhơn nđơr. Ntơm bah aơ let năp tay ur sai hên ton mbra nsrôih, wăng sa hun hao, rgâl geh nău rêh, ơm klaih rlău jêr jŏt gay mât oh kon nti ren tât lôch tât dŭt.

  Tĭng ƀư ăp nău kan nkoch trêng mpeh tâm ban bu ur bu klô, tâm năm mhe aơ hội liên hiệp bu ur nkuâl Cư Mgar hŏ dơn n'hanh phăt nklăp 27.000 lha si ƀŭt nkoch trêng mpeh pah kan tâm ban bu ur bu klô n'hanh njrăng n'gang đah tâm lah tâm janh nsing tâm ban bu ur bu klô. Ăp lha si ƀŭt nkoch trêng dơi in bar nău ngơi Ê đê – Việt n'hanh Ja Rai – Việt đah nkô̆ dơh glêh, rup gui uănh saơ na nê̆. Huyện hội kan nsum đah gưl tâm dâng ƀư 3 rơh nkoch trêng ta buôn B’ling (xã Ea Kpam), buôn Jók (xã Ea H’đing) n'hanh buôn H'Mông (xã Ea Kiết). Nkre, ndop nkoch trêng mpeh njrăng n'gang tâm lah tâm janh rnăk wâl n'hanh tâm ban bu ur bu klô tâm ăp rơh sinh hoạt way ăp khay ta ăp chi hội mô lah ăp rơh hop thôn, buôn, tổ dân phố. Wa Lê Thị Thu Hiền - Kruanh Hội Liên hiệp bu ur nkuâl Cư M'gar nkoch trong ƀư bah đơn vị.

Mpôl kan Hội hŏ du rut tĭng ƀư ăp nău kan nkoch trêng ma âk trong ƀư êng êng, ta ăp trang mạng xã hội, ta loa pơk ngơi, phăt lha si ƀŭt, nkoch trêng ma măt saơ, nchih nău nkoch trêng njuăl sĭt tât Hội Liên hiệp bu ur nkuâl. Lơn lah Hội Liên hiệp bu ur nkuâl hôm nchrăp tĭng ƀư mbơh nti nău tâm di an ăp bu ur rnăk wâl way geh tâm lah tâm janh, tât ôp khâl, rgŏ jă, pă nklâm ndơ gay kơl ăp rnăk đăp mpăn nău rêh, lor nchrăp tĭng ƀư jăp pah kan tâm ban bu ur bu klô, rdâk njêng rnăk wâl rgâl uĕh, rhơn răm.

Tĭng nchih rgum, tâm 10 năm aơ n'gor Dak Lak hŏ năl geh rlău 9.400 tơ̆ tâm lah tâm janh rnăk wâl. Bol ma rnoh âk tơ̆ hŭch rlău ăp năm yơn rnoh tih jru geh trong rƀŏng hao, an tay ăp nău tât khuch bah kơi jru hô lĕ mpeh săk jăn, nuih n'hâm n'hanh roh huach wăng sa- rêh jêng kon nuĭh. Wa Nguyễn Thị Thanh Hường, Groi kruanh Hội Liên hiệp bu ur n'gor Dak Lak an gĭt, đah nău khlay kan bah he, Hội liên hiệp bu ur ăp gưl tâm n'gor hŏ geh âk trong nkra gay nkoch trêng n'hao nău gĭt êng an oh yuh; rdâk njêng ăp trong ntĭt leo, ăp rmôt mbơh nti nsum mpôl, ăp câu lạc bộ njrăng n'gang tâm lah tâm janh rnăk wâl gay wăch rgum bu ur tât râng. Ntop kơl mbơh joi nău kan, ntĭm nti nău kan an ăp bu ur mô geh nău lap gay nta joi nău kan n'hanh kơl oh yuh bu ur geh nău dơi joi êng prăk. Wa Nguyễn Thị Thanh Hường an gĭt:

Mpôl hên geh tay ăp trong ƀư nkoch trêng, ntĭm nti ƀư an hội viên bu ur geh nău blău rêh, nău dơi mât njrăng êng săk nơm n'hanh nău blău nkra ăp nău tâm rkeh ta rnăk wâl bah he gay bah ir jêng nău tâm lah tâm janh rnăk wâl. Nkre ntop kơl bu ur nti nău kan, tât dơi đah tơm prăk manh đah bu ur geh nău rêh jêr jŏt, mô hŏ geh nău kan đăp mpăn, tơm prăk manh gay khân păng ntơm njêng nău kan, ntơm njêng tăch rgâl gay hun hao wăng sa, đăp mpăn nău rêh.

Njrăng n'gang tâm lah tâm janh nsing ta bu ur ân geh nău nsum ti đah nău gĭt êng di n'hanh dơn kan bah ăp nuĭh ƀon lan n'hanh lam rêh jêng kon nuĭh. Nău njrăng, n'gang tâm lah tâm janh rnăk wâl mô dơn lah trong dŏng luật pháp ma khlay lơn lah mât ndray nuih n'hâm kloh uĕh ndrel ăp rnoh khlay, di rnoh, nău way ơm uĕh lăng bah rnoi nuĭh tâm ăp rnăk wâl Việt Nam./.

Nuĭh rblang: Điểu Thân