VOV4.M’nông: Mhe rlau aơ, ta Hà Nội, Rnâng kan rđau kan Trung ương Đảng cộng sản Việt Nam, Quốc hội, Kruanh dak, Chính phủ, Uỷ ban Trung ương Mặt trận Tổ quốc Việt Nam hŏ ƀư nau nkah 60 năm nar ndâk nau tâm boh nchră nau ndrel 45 năm nar kí ton nau tâm boh Việt Nam-Lào.

            Nkah tay mpeh nau tâm boh ueh khlay đah Đảng, Ngih dak ndrel ƀon lan 2 dak Việt Nam-Lào, Tổng Bí thư Nguyễn Phú Trọng lah rjăp, tâm nâm nau rđau kan bah Đảng Cộng sản Việt Nam ndrel Đảng ƀon lan Cách mạng Lào, ƀon lan bar dak hŏ ndrel tâm dăch tă bah ăp nar bôk năp tâm rlong, mât nâp ndrel ndâl njêng neh dak Xã hội chủ nghĩa bah ăp dak. Bar Đảng, bar dak hŏ tâm kơl ăp nhoat ndâk jâng văng sa, rêh jêng jêh tâm lơh, nkre ăp nhoat njêng ndrel hun hao nau tâm boh ueh tâm ăp nau kan tơm kơt, văng sa, văn hoá, rêh jêng, ntĭm nti, neh dak đăp mpăn ndrel tâm nchră đah dak ba dih.

            Tổng Bí thư Nguyễn Phú Trọng lah rjăp, tâm nâm trong ang bah Chủ nghĩa Mác-Lênin, nau mĭn Hồ Chí Minh tâm Việt Nam ndrel nau mĭn cay-xỏn Phôm-vi-hản tâm Lào, bar Đảng, bar dak ô̆ tâm dăch tâm nau kan rgâl mhe, ndrel geh ăp nau dơi têh tâm nau hun hao văng sa, rêh jêng, mât đăp mpăn chính trị, rnă njrăng, đăp mpăn nau rêh, leo nsĭt nau rêh nar lơn hơm răm ndrel đăp mpăn ân ƀon lan 2 dak.

            ‘Uănh tay ăp ntrong hăn ueh ang ma bar rnoi mpôl hŏ ndrel hăn rlet, phung he geh nau dơi ntô̆ n’hao mpeh nau tâm boh ueh, dŭt n’hâm ang, dŭt n’hâm tâm kơl đah bar Đảng, bar Ngih dak ndrel ƀon lan bar dak Việt Nam-Lào. Nau tâm boh Việt Nam-Lào geh ăp rđau kan têh lah Kruanh Hồ Chí Minh, Kruanh Cay-xỏn Phôm-vi-hản ndrel Kruanh Xu-pha-nu-vông ndŏ ntơm ƀư, geh bun dăp ndâk njêng, mât đah dak rhal, n’hâm soan ndrel n’ăp ma nting mham bah ăp rơh tahen ndrel ƀon lan bar dak, ngăn ngên jêng drăp ndơ khlay, nau tâm boh “geh dơn ngoai” tâm nau rêh lam ntur neh”.

            Tĭng Tổng Bí thư Nguyễn Phú Trọng, nau tâm boh đah bar Đảng, bar dak Việt Nam ndrel Lào lŏ hun hao nâp, nar lơn lăp tâm nau jru ndrel săk tam, ntoh lư lah nau tâm boh chính trị mô rlu geh mâp nâp ndrel n’hao prêh, ntơm bah “nau tâm boh vay ơm” jêng “nau tâm boh têh dăng” ntơm khay 2/2019, nar lơn jêng nau tâm rnơm, lŏ lah ngoai tâm ăp n’gâng tơm kglay ngăn tâm nau tâm boh ueh đah bar dak. Nau tâm boh văng sa lŏ geh uănh kơl an ndrel hŏ geh geh dơi ăp nau ueh, leo nsĭt nau dơi ngăn tâm nau ntrŭt dăng ndrel hŏ geh âk nau ueh, leo nsĭt nau ngăn ân ƀon lan ndrel ntŭk kan bar dak; Tâm boh mpeh nau kan ntĭm nti-tâm boh nau kan âk ntil, kŏ kơt lah tâm boh văn hoá, dak si, nchuăn rdeng ndơ, ŭnh nar nar lơn geh ƀư nâp ndrel ntrŭt dăng. Nau tâm boh đah ăp nkuăl, ngăn lah đah ăp n’gor tâm dăch n’har nar lơn ma jêng tâm boh nâp rjăp.

            Tổng Bí thư Nguyễn Phú Trọng kŏ ân lah, tâm rnôk lam ntur neh ndrel nkuăl dôl geh âk nau tât jêr, ngăch ndrel mô năn rdâng, ƀon lan dôl rdâng đah âk nau ntul rlong têh kơt tâm lơh, tâm rkeh jru đah ăp dak têh, ăp nau kan đăp mpăn mô tă geh kơt lah srê ji, mô tŏng ŭnh nar, ndơ sa, bar Đảng, bar dak ndrel ƀon lan bar dak ân geh tâm rnglăp, tâm dăch, n’hao nau tâm boh rjăp lơn gay ma ndrel rlet rlau nau jêr, lŏ ƀư nâp nau đăp mpăn dah rŏng rnoi mpôl ndrel chủ nghĩa xã hội, ndrel nsum n’hâm nơm mât ndrel mô rlu bun dăp ân nau tâm boh têh, tâm rnglăp khlay ndrel tâm boh ăp ntil Việt Nam-Lào:

            “Đảng, Ngih dak ndrel ƀon lan Việt Nam mro kơl an ngăn, ăp ntil ân nau kan rgâl mhe bah Lào, nkre lah dŭt n’hâm uănh khlay ndrel kơl an bôk năp ân nau tâm boh ueh khlay nkre lah đồng chí, nkre lah oh nô đah bar Đảng, bar dak nơm. Phung hên mro mrăng ŭch nau tâm boh, tâm kơl neh dak lào đah nuih n’hâm “kơl băl kơt kơl nơm”, uănh aơ lah nau kan tơm, ŭch Đảng, Ngih dak ndrel ƀon lan Lào mô rlu bun dăp nau tâm rnơm chính trị, trŭt dăng nau tâm boh rnă njrăng neh dak, n’hao nau tam nthoi jâng văng sa, mô rlu n’hao nau nâp bah nau tâm boh ntĭm nti, ndrel ndâk njêng jâng văng sa đăp mpăn, ƀon lan ƀư tơm, tâm rnglăp jru, ndrel nsôih gay ăp nau dơi tâm boh nar lơn ma tâm ban đah nau geh dơi bah nau tâm boh ueh khlay Việt-Lào”.

            Ntoh nau tâm nar nkah, wa Chít-mạ-ni, Uỷ viên Bộ chính trị, Rnâng kan Ban Bí thư Trung ương Đảng ƀon lan Cách mạng Lào, Groi Kruanh dak Cộng hoà dân chủ ƀon lan Lào lah rjăp, Đảng, Ngih dak ndrel ƀon lan Lào nsôih nkah ndrel gĭt ngăn đah nau kơl bah Kruanh Hồ Chí Minh têh dăng, Kruanh Kay-xỏn Phôm-vi-hản ndrel Kruanh Xu-pha-nu-vông ŭch rŏng lah nŭih ndâk njêng ndrel lah nau leo ang chrat ân nau mât, tâm boh nau kan têh dăng, tâm rnglăp ueh khlay ndrel tâm boh ăp ntil đah bar dak Việt Nam-Lào jêng drăp ndơ nsum khlay, lah nau dơi rêh ndrel hun hao bah bar dak, lah nau kan hôm kơn ndrel hun hao bah bar dak, lah noai tâm ăp nau kan geh jêng tât nau dơi bah cách mạng ăp dak:

            ‘Đảng, Ngih dak ndrel ƀon lan Lào phung hên mro ƀư rjăp ndrel uănh aơ lah nau kan bah nơm tâm nau kan ƀư ueh nau tâm boh kan nsum têh khlay, tâm rnglăp ueh khlay ndrel nau tâm boh ăp ntil Lào-Việt Nam geh rlet rlau âk nau ntul rlong ndrel âk n’hâm bun dăp đah dak rhal ndrel nting mham bah ăp tahen janh dăng kŏ kơt lah ƀon lan Lào ndrel ƀon lan Việt Nam tă bah âk rơh hŏ mro mrăng geh mât nâp, leo nsĭt nau geh dơi ueh ngăn ân ƀon lan bar dak, gay ma tâm ban đah nau ngơi mô dơi geh chuêl bah Kruanh Kay-xỏn Phôm-vi-hản: “Yôk mra rlâm, dak mra suăt, yơn lah nau tâm bohj kan nsum Lào-Việt Nam mro mrăng nâp rlau ma yhôk, ma dak”.

            Ndrel kơt nau ndrĭng bah Kruanh Hồ Chí Minh:

            “Tâm rŏng ri dŭm bri yôk hŏ dơi hao,

            Dŭm bri âk dak kŏ rlet, dŭm bri âk yôk kŏ rlet

            Việt-Lào bar dak phung he.

            Nau tâm boh ueh jru rlau ma dak me Hồng Hà- Cửu Long”./.

Nŭih rblang: H’Thi