VOV4.M'nông: Ơm ôi nar 10/03/1975, ăp trong chruh bah ăp tahen he du rơh rdôl lơh tâm ntŭk gŭ nde Mai Hắc Đế n'hanh ăp ntŭk gŭ nde tahen ta thị xã Buôn Ma Thuột (aƀaơ lah nkual ƀon têh Buôn Ma Thuột) bah phŭng rlăng n'hanh ngăch geh nău dơi, pơk luh trong lơh dơi Buôn Ma Thuột lịch sử ƀư trong ntơm hăn tât rklaih luh lĕ Miền Nam dơn ngoăy neh dak. Lôch 47 năm rkaih luh, Buôn Ma Thuột hŏ lhut săk ntô tĭng trong "uĕh mhe, rsang rnglăy, n'hanh săk tơm", jêng nkual ƀon têh nklang nkual Tây Nguyên.

Đại tá Nguyễn Xuân Thụ, 67 năm deh, nuĭh kan Trung Đoàn 25 Quân giải phóng Trung Trung Bộ râng na nê̆ rơh hăn tâm lơh ta Tây Nguyên năm 1975, aƀaơ jêng nuĭh ƀon lan nkual ƀon têh ma păng râng rklaih luh. Khâl tổng kho Mai Hắc Đế, phường Tân Thành, păng nkoch, lôch bah tâm lơh nkual dja ƀom ndrak lơh hăch rlâm, ƀon lan gŭ rêh srang đêt. Yơn aƀaơ, Mai Hắc Đế hŏ jêng nkual ƀon têh uĕh mhe, ndeh rklư n'gôr bêng trong. Săk ntơ Mai Hắc Đế jêng ntŭk têl ơm yău kăl e gưl neh dak. Wa Thụ nkah tay:

“Trung Đoàn 25 mpôl hên dơn nău kan lơh mpă trong 21 (jêng lah trong quốc lộ 26 bah Buôn Ma Thuột hăn Nha Trang aƀaơ). Đơn vị mpôl hên lơh mpă ta yôk prêh 519, mpeh bah lơ thị trấn nkuâl M’Đrắk, nê lah chốt Bảo An. Mpôl hên tâm pănh ntơm bah ơm ôi nar 5/3, gay pơk trong nchrăp rdôl lơh thị xã Buôn Ma Thuột. Tâm ơm ôi 10/3, rmôt tơm bah mpôl tahen rklaih luh lah Sư Đoàn 320 lơh ntral tâm nkual Mai Hắc Đế lôch nê pit in lĕ rngôch Buôn Ma Thuột; hôm Sư Đoàn 10 ri rgum lơh mpă ta ntŭk gŭ nde Đức Lập (nkuâl Đắk Mil, n'gor Dak Nông aƀaơ), tât măng 11/3 ri ăp đơn vị tahen rklaih luh hŏ ƀư tơm dơi ntŭk tâm lơh. Trong hăn lơh Tây Nguyên geh nău dơi lĕ rngôch”.

Ntơm bah du thị xã geh hăch rlâm tâm lơh tâm su, rlău 47 năm têh jêng n'hanh hun hao, tât aƀaơ Buôn Ma Thuột hŏ n'hanh dôl jêng nkual ƀon têh uĕh mhe, geh âk săk tơm văn hóa. Nău rêh bah nuĭh ƀon lan nar lơn ma dơi n'hao prêh, ntŭk ntô ntung trong, dak si, ntĭm nti, ntŭk gŭ rêh......nar lơn ma rgâl geh. Bu ranh ƀon Y Siu Byă ta buôn M’Dŭk, phường Ea Tam an gĭt: 

“Ntơm nơh nău rêh bah kônh wa hôm âk jêr jŏt yơn lôch geh Đảng n'hanh Ngih dak uănh khlay ntuh kơl ri hŏ dơi rgâl uĕh. Aƀaơ gung trong tâm ƀon hŏ dơi tuh bê tông lĕ hôm, 100% nuĭh ƀon lan hŏ geh trong rse điện dŏng, 95% dơi dŏng dak kloh uĕh. Ta ƀon ri hŏ geh nhih nti, nhih dak si, jay mât kon se n'hanh jay văn hóa rgum ƀon gay sinh hoạt. Ăp rnăk ƀon lan geh ndeh honda, mô dơn nê geh rnăk hŏ rvăt ndeh ô tô…”

Buôn Ma Thuột lah nkual ƀon têh dŭt âk nuĭh nkual Tây Nguyên. Nkual ƀon têh aƀaơ geh bơi 380 rbăn nuĭh, rlău 40 rnoi nuĭh oh nô gŭ rêh. Mpeh ntŭk ntô ndơ dŏng, aƀaơ nkual ƀon têh hŏ geh tach ndeh păr tâm dak n'hanh dôl rƀŏng tât ăp trong mpăr hăn dak bah dih; ntung trong hăn tâm trôm nkual ƀon têh, trong der Đông, Tây wăr nkual ƀon têh hŏ dơi ƀư lôch jêh ăp tŏng; Ndơ dŏng ntĭm nti, dak si nar lơn ma dơi hun hao, 8 xã bah nkual ƀon têh hŏ lôch jêh rnoh tât kan rdâk njêng ƀon lan mhe gưl neh dak; 13 phường la phường văn hóa; rĭng geh tĭng bôk  nuĭh bah nkual ƀon têh bơi 100 rkeh prăk tâm năm 2021; âk rkŭm công nghiệp, ăp trong nchrăp ƀư jay nkual ƀon têh dơi ntuh kơl nar lơn ma âk; Rnoh ngăch hun hao rĭng bôk nuĭh 5 năm aơ way geh rnoh tât 11 – 12%/năm. Wa Từ Thái Giang – Bí Thư Thành ủy Buôn Ma Thuột nkoch, gay rdâk njêng Buôn Ma Thuột jêng nkual ƀon têh rgum tơm nklang Tây Nguyên, ăp gưl n'gâng kan dôl rdâk njêng an ƀư ăp trong way kan tâm di hun hao tĭng rơh:   

“Nkual ƀon têh dôl droh rklaih ăp ntŭk kol kô̆ yơn mpeh neh ntu, sơch trong wăch rgum ntuh kơl, sơch wăch rgum ntuh kơl tâm di gay hun hao wăng sa. Ntrôl dăng ntĭm nti rmôt cán bộ, công chức, viên chức geh nău gĭt blău âk gay ban tĭng trong rƀŏng 4.0 gay rgâl dơh glêh si ƀŭt kan. N'hao nău gĭt êng bah rmôt đảng viên, nsum mpôl lam ƀon lan mpeh nău gĭt êng mpeh nău khlay bah nău rdâk njêng hun hao nkual ƀon têh, njêng suan ntrôl ƀư lôch jêh nău kan ndơ̆ luh".

Tĭng wa Nguyễn Đình Trung - Bí thư Tỉnh ủy Dak Lak, tâm N'glôch jêh mbrô 67 bah Bộ Chính trị năm 2019 nchŏng kloh nău dăp rgum hun hao tât năm 2030, uănh ngai tât năm 2045, nkual ƀon têh Buôn Ma Thuột, nkual ƀon têh rgum tơm bah n'gor Dak Lak mbra jêng nkual ƀon têh rgum tơm nklang nkual Tây Nguyên, tĭng trong rƀŏng "rsang rnglăy, uĕh mhe n'hanh geh âk săk tơm văn hóa.” Gay dơi tât rnoh kan dja, ăp năm rlău Đảng n'hanh Ngih dak hŏ ntuh kơl hang rmưn rmen prăk ƀư ăp ndơ kan têh khlay kơt: Trong Hồ Chí Minh hăn rlău Dak Lak, Nhih dak si Nkual Tây Nguyên, trong der Đông, Tây, pơk hvi tay tach ndeh păr Buôn Ma Thuột…rgop ntrŭt ntrôl hun hao dăng nkual ƀon têh lah êng tâm ban kơt nkual Tây Nguyên lah nsum. Wa Nguyễn Đình Trung an gĭt, Nghị quyết Đại hội Đảng bộ n'gor Dak Lak tâl XVII năm kan 2020 – 2025 hŏ rdâk njêng n'hanh nchŏng kloh nău dơn kan rgum tơm tâm let năp tay đŏng gay rdâk njêng nkual ƀon têh Buôn Ma Thuột jêng nkual ƀon têh rgum tơm Tây Nguyên tĭng nuih n'hâm n'glôch jêh mbrô 67 bah Bộ Chính trị.    

“Bôk năp, ân rgum dăp rgum Buôn Ma Thuột tâm di đah dăp rgum bah n'gor n'hanh lam dak, nkre kan nsum lhăt đah dăp rgum lam lĕ rngôch mpeh rdâk njêng tâm ban kơt dăp rgum mpeh neh ntu tâm let năp tay. Tâl bar, ân rgum ntuh kơl hun hao Buôn Ma Thuột lam lĕ rngôch nâp jong kalơ ăp trong kan. Lôch nê, ân mât uăh suan dăng nơm n'hanh rgum âk nău geh ndơ bah dih la tơm ntuh kơl bah trung ương gay rgum hun hao ăp trong nchrăp kan rgum tơm, der bah mbrach lêng lang, tĭng kơn ƀư Buôn Ma Thuột jêng nkual ƀon têh rgum tơm nklang Tây Nguyên. N'hanh tâl puăn, hun hao wăng sa- rêh jêng kon nuĭh ta nkual ƀon têh Buôn Ma Thuột nsing kalơ rgâl mhe trong ntĭt leo hun hao wăng sa, uănh khlay hun hao tâng jru, dăp rgum hao mbrơi rnoh âk hun hao công nghiệp…”

Đah ndơ ơm săk geh ndrel đah nău nsrôih bah lam trong kan chính trị, nău du nuih n'hâm bah ăp rơh kơn ƀon lan, nklăp mô jŏ ngai Buôn Ma Thuột dôl tĭng kơn ndơl jâng chuat hăn tât jêng nkual ƀon têh nklang Tây Nguyên. Aơ lah du nkual ƀon têh dŭt di ma gŭ rêh bah mô dơn ăp n'gor Tây Nguyên ma hôm đah lam dak đŏng./.

Nuĭh rblang: Điểu Thân