VOV4.M’nông: “Ntơm nơh nơm knŭng geh măng ndrel bri, nar aơ hŏ geh nar, geh dak lêng. Dak lêng nơm jong, ueh, nơm ân mât rjăp”. Nau ntĭnh bah Kruanh Hồ Chí Minh rnôk tât khâl rmôt tahen dak lêng tâm khay 3/1961 mro geh ăp cán bộ tahen Hải quân lah nsum, tahen nkuăl 4 Hải quân lah nsum nkah, lah ntrong ƀư ân ăp nau kan bah nơm. Ntĭm nti, pah kan tĭng nau Wa, ăp cán bộ tahen nkuăl 4 Hải quân hŏ geh âk nau kan mhe, ueh, geh săk tam, geh n’hâm rêng jru, geh dŏng tâm nau rêh leo nsĭt nau tam tâm nau ntĭm nti mra tâm lơh, mât nâp neh dak.

            Mâp Trung uý Nguyễn Đình Lương, Kruanh Pháo tàu, jrâu kan kơl tâm nchră, Lữ đòan 162 rnôk păng dôl mbơh phần mềm “Nau ƀư mât ndơ n’gân pháo AK-176 tâm duk 12418” ân ăp cán bộ tahen tâm duk...Aơ lah ndơ yor nô nơm mĭn êng ndrel geh leo lăp dŏng tâm tàu phao ŭnh lơh ngăch 12418 geh sŏng ngăn. Nô Lương mbơh, tă bah nau kan tâm duk, ƀư nau kan pháo AK176 lah ăp ntil pháp mhe geh lăp tâm duk. Ndơn saơ nau mĭn tâm săm ƀŭt nkoch mbơh, nau ntĭm nti mra nơih lơn, ƀư jêng ueh ndrel kơl an tahen nơih gĭt. Ndri ma jêh 3 khay mĭn, rlet âk nau jêr, nô njêng phần mềm kơl an tahen nơih gĭt ndrel nơih dŏng, nơih prăp ăp ntil phao bleo tâm duk, kơl nau ntĭm nti ndrel ƀư tơm bah ăp ntil pháo AK 176. Ndơ geh nkhôm giải A nau nkhôm bah mom ndăm Nguyễn Phan Vinh năm 2021 bah tahen Hải quân. Trung uý Nguyễn Đình Lương nkoch:

‘Săk nô mro uănh năl gay ma ƀư tơm ăp ntil ndơ ueh mhe ri ân geh blau mĭn, blau kan, blau nau mhe. Tâm rơh tât săk gâp nơm mra lŏ mât nâp ndrel ma ƀư tĭng ăp nau nơm tă dơi geh, nau kan ntĭm nti, n’hao nau janh chính trị, nau blau mpeh ăp ding, ƀư jêh ăp nau kan tâm rmôt nơm kan. Ƀư ueh nuih n’hâm leo lor, blau mhe bah mom ndăm, kŏ mĭn khoa học, blau nau nkra, dŏng nau mhe tâm nau ntĭm nti, rgop nau ndâk Lữ đoàn 162 Cách mạng, blau, ăp ntil nau dơi tŏng tĭng nau ŭch mât nâp nau ƀư tơm gôl dak, dak lêng ueh nâp bah neh dak nơm tâm rơh mhe”.

            Ƀư tĭng nau ntrŭnh mrô 05 bah Bộ chính trị mpeh nau “Ntrŭt dăng nau ntĭm nti ndrel pah kan tĭng nau mĭn, nau kan Hồ Chí Minh” tâm nkuăl 4 Hải quân hŏ geh âk nŭih pah kan blau, mhe, săk tam. Tâm nau ƀư Groi Rnâng kan Quân khí, Jrâu kan kỹ thuật, Thượng uý Trần Công Tạo hŏ mô rlu nau mĭn, rgop nau mhe, nau kan n’hao nau dŏng ndrak nsiu. Ntoh ngăn kơt lah nau kan “Ntrong kơl an ndăch ntŭk pănh ngai tâm duk Gepard 3.9”, nau mĭn mhe hĭ geh rnê prêh ngăn tâm nau dŏng lăp ngăn. Nau kan aơ hŏ geh giải Nhất rơh tâm rlong “Mom ndăm blau nau mhe lam tahen”, Thượng uý Trần Công Tạo nkoch:

            ‘Aơ lah du ntil ndơ geh nkra, ƀư mhe đah nau ŭch kơl an tâm nau kan dŏng ƀư, leo dŏng tâm nau păng tâm duk, kơl an n’hao nau dơi dŏng ndơ bah ntŭk pănh phao, kơl an nau kan ntĭm nti, ntĭm nti tâm lơh nkre nau ƀư huch oi nau dŏng ndrak nsiu nơm nkra. Săk nơm mrô nsôih ntĭm nti, n’hao nau blau nau kan, joi uănh gĭt mpeh ndơ dŏng, nau kan mhe tă bah nê nơm săch nau mĭn, dŏng tâm nau ngăn, tŏng dơi nau ŭch nau kan nar lơn ma prêh, rgop tâm nau mât neh dak, dak lêng tâm rơh mhe”.

            Đah ăp nŭih tahen dôl ƀư nau kan tâm nkuăl gôl dak Trường Sa, ngai ma neh kơh, nau rêh hôm jêr yơn ăp tahen mro nkah nau ntĭm nti bah Wa. Trung tá Phạm Quốc Hùng, cán bộ gôl dak Sơn Ca, Lữ đoàn 146 nkoch: Ăp cán bộ tahen tâm gôl dak ân geh ntĭm nti ndrel pah kan tĭng nau rêh Hồ Chí Minh tâm ăp nau kan ăp nar. Ntơm bah nau têm nkrem điện, dak tât nau tăm byăp, mât chăm tơm di tâm neh choih ndrel san hô mô lah gĭt trong hăn der gay ntĭm kônh wa hăn joi lơh ka ân ueh. Đah nau kan mât neh dak lêng, dôl dak, ăp cán bộ tahen gĭt êng nau mĭn, nau ntĭm, mât tâm dăch nau kan bah rmôt, ngơi hăn nsum ma kan. Trung tá Phạm Quốc Hùng, lah rjăp:

            ‘Ƀư tĭng nau ntĭm đă bah Wa, rơh rlau aơ, săk gâp hŏ ndrel ma cán bộ, tahen tâm rmôt kan mro nsôih ntĭm nti, n’hao nau blau chính trị, ndơn gĭt kloh mpeh nŭih, nŭih nơm kan ndrel ăp nau mĭn ntrŭnh bah Đảng, ngih dak nơm tâm nau ƀư nau kan tâm lơh mât gôl dak dak lêng. Nsôih ntĭm nti, ƀư tơm ăp ntil ndrak nsiu, ntĭm nti nau kan, n’hao nau nkah, rklaih ueh nau tât, mô ân ndrât ndal tâm ăp nau tât”.

            Tĭng Chuẩn đô đốc Ngô Văn Thuân, Chính uỷ Nkuăl 4 Hải quân: ƀư tĭng nau ntrŭnh mrô 05 bah Bộ chính trị mpeh “Ntrŭt dăng nau ntĭm nti ndrle pah kan tĭng nau mĭn, nau rêh, nau kan Hồ Chí Minh”, ăp năm rlau aơ, nkuăl 4 Hải quân hŏ ƀư geh dơi âk nau kan. Âk nau blau mhe geh dŏng tâm nau ngăn gay leo nsĭt âk nau săk tam tâm nau ƀư nau ntĭm nti mra tâm lơh, mât nâp neh dak, dak lêng bah neh dak:

            ‘Ân geh lah rjăp rơh rlau aơ tâm nau kan ntĭm nti tĭng nau mĭn, nau kan Hồ Chí Minh bah nkuăl 4 Hải quân geh n’hâm rêng, rgum âk mpưm cán bộ tahen râng. Nau săk tam bah ăp nau kan geh dŏng ndrel ntrŭnh tâm ntŭk kan, njêng nau nsôih gay ntrŭt dăng nau mĭn, nau blau kan bah cán bộ, tahen tâm rgop, rgop nau n’hao nau nâp nau ntĭm nti, mra tâm lơh bah lam nkuăl. Ăp cán bộ tahen nkuăl 4 Hải Quân ân geh nau nâp mpeh chính trị, nâp mpeh nau mĭn, janh mĭn, janh kan janh ndơn ăp nau kan, blau nau mhe, nsôih mât nâp nkuăl dak lêng gôl dak bah neh dak”.

            Nkah nau ntĭm bah Wa “Nar bah năp nơh nơm knŭng geh măng ndrel bri. Nar aơ nơm geh nar, geh trôk, geh dak lêng. Dak lêng nơm jong, ueh, ân blau mât nâp păng”, ăp cán bộ, tahen nkuăl 4 Hải quân mro nsôih, ntĭm nti. Tâm moh nau kan kŏ mro nkah, rklaih nau jêr, mra tâm lơh khĭt săk gay ma mât nâp ân nkuăl dak lêng, gôl dak, nkuăl neh ueh lăng bah neh dak./.

            Nŭih rblang: H’Thi