VOV4.M’nông: Ndrel đah nau kan lơh, njrăng phung tih dôih, ăp tahen Jrâu kan cảnh sát cơ động, Công an n’gor Dak Lak vay ƀư ăp nau kan rƀŏng tât tâm dâng, kơl an nŭih ƀon lan tâm nau pah kan tuch tăm, klih play, rak ba. Ăp nau kan aơ hŏ rgop nau ƀư ueh lơn tay nau tâm rnglăp tahen ƀon lan, rup gui tahen công an ƀon lan đah kônh wa ăp ƀon lan.

            Ta ƀon Ktơng Drum, xã Cư Né, nkuăl Krông Buk, n’gor Dak Lak, 30 tahen công an dôl n’hoch n’hong dak ndrel muih rep pih, nkra ndrâm dak. Thượng uý Nguyễn Thị khánh Vân, Groi bí thư đoàn tâm dâng Jrâu kan Cảnh sát cơ động Công an n’gor Dak Lak mbơh, ăp rnôk hăn kơl an ƀon lan vay geh rmôt kan ntrŭnh ƀư gay ma kơl an kônh wa ƀon lan:

            ‘Aơ lah ngoai tâm ăp nau kan ma hên leo n’hâm mom, gơih nau kan ndrel leo n’hâm mom bah nơm rƀŏng kơl an ƀon lan, leo ăp nau nau kan bah rmôt cảnh sát ƀon lan, rmôt công an ƀon lan tât đah ăp nkuăl ngai, ăp nkuăl hôm jêr gay ma kơl an ƀon lan”.

            Tâm rnôk aơ, ăp tahen mra ƀư kuih kuai 300m trong mương, muih pih, rep kloh ngih rƀuưn rgum tâm 2 ƀon Đrao ndrel Ktơng Drun, xã Cư Né, tâm rgop nkoch mbơh pháp luật ndrle rgum nau kơl an ân 50 nklâm ndơ ân ăp rnăk mâp nau jêr. Tĭng wa Y Bliu Mlô, Groi Kruanh UBMT Tổ quốc xã Cư Né, aơ lah 2 ƀon jêr ngăn bah xã đah bơi tât 500 rnăk, 2000 nŭih, ngăn lah rnoi Rđe rêh. Nau kơl an, tâm pa ưnăn bah ăp cán bộ tahen kơl an kônh wa bah oi nau jêr, nsôih rlet pah kan hao jêng:

            ‘Nau rêh bah kônh wa rnôk aơ ri uănh nsum lah ƀư mir, jêr ngăn. Bah rnôk pă nklâm ndơ rnôk aơ ri ŭch kônh wa mra nsôih lơn gay ma ƀư mir. Ntoh măt ân kônh wa ƀon lan bar ƀon ri rhơn ngăn, lah ueh, ŭch lah lŏ geh ƀư đŏng, kơl an ân kônh wa, ngăn lah tâm rnôk ƀa hin”.

            Đah ăp tahen cảnh sát cơ động, ăp toeh hăn kan kơl an lah du rơh gay ma khân păng sĭt ma ƀon kan, tâm mâp ma ƀon lan, chiăr nti ăp nau kan bonh đă. Trung sĩ Y Sen Mdrang, nkoch:

            ‘Bah ăp rnôk hăn kơyt aơ ri hên njêng geh ăp nau tâm boh ueh tâm dăch ma ƀon lan, tâm dăch ndrel nsum tâm pă kơl an ăp nau kan tâm nau rêh bah ƀon lan. Mâp ma nŭih ƀon lan ri saơ ŭch rŏng ƀon lan lơn, ŭch kơl an ƀon lan đah nuih n’hâm, đah nau nsôih bah tahen”.

            Thiếu tá Hoàng Thị Kim Phượng, Kruanh rmôt kan chính trị hậu cần, Jrâu kan cảnh sát cơ động mbơh, ƀư tĭng nau kan “Công an Dak Lak rƀŏng kơl an tâm dâng, ndâk nau tâm boh ueh ma ƀon lan”, ăp năm rmôt kan ƀư âk nau kan kơl an tâm dâng, ƀư nau kơl ƀon lan. Ăp rnôk hăn jŏ du pơh, ăp tahen sĭt ƀon lan, pah kan kơl an. Kơt tâm năm 2021, bol ma srê Covid-19 tât jêr, yơn rmôt kan hôm ƀư 7 tơ̆ hăn, rgum geh rlau 320 rjeh ỏăk gay ma kơl an pă ndơ ân ƀon lan. Êng ntơm bôk năm tât rnôk aơ, rmôt kan hŏ ƀư geh 5 tơ̆ kơl an tâm ăp ƀon nkuăl jru, ngai:

            “Uănh năl nau khay gay ma ndâk nau tâm boh tâm rnglăp đah tahen ndrel ƀon lan tâm n’gor ri ăp năm Jrâu kan cảnh sát cơ động hŏ rđau ân ăp cán bộ, tahen ntrŭnh ƀư ăp nau kan hăn kơl an, kơl an rƀŏng tâm dâng gay ma hăn kơl an, kơl an ƀon lan, ngăn lah ăp nkuăl nŭih rnoi mpôl đê̆, nkuăl jru, nkuăl ngai. Bah ăp nau kan nê ri lŏ kơl an cán bộ, tahen phung hên, saơ dơi ăp nau jêr, nau jâk bah kônh wa ndrel du gưl geh kơl an tâm nau rêh, văng sa ân ƀon lan”.

            Bah năp nê, 50 cán bộ tahen Jrâu kan cảnh sát cơ động, n’gor Dak Lak hŏ ƀư “Nau kan kơl an” tâm xã Yang Tao, nkuăl Lăk. Ndrel nau ƀư mêt uănh, nkân ueh nap đăp mpăn, rnă njrăng tâm trong hăn bah xã, rmôt kan cảnh sát cơ động hŏ ƀư nau nkoch trêng mbơh nau ân ƀon kan ƀư ueh nau ntrŭnh, ntrong kan bah Đảng, pháp luật bah ngih dak ndrel ăp nau ntrŭnh bah n’gâng kan. Tâm aơ, ăp tahen cảnh sát cơ động hŏ rep kloh ntŭk ntu tâm ăp trong hăn ƀon lan, jur lŏ gay ma kơl an ƀon lan rek ba.

            Tâm gleh khlay gay ma hăn kơl an đah ƀon lan ăp cán bộ, tahen cảnh sát cơ động mro mĭn mra mô klach nau jêr jŏt gay ma tât kơl an nsum, mbăk kơl ân ăp nau kan tâm nkuăl ƀon lan, ngăn lah nŭih rnoi mpôl đê̆ hôm mâp âk nau jêr âk ntil.

            Ăp nau hăn kơl an tâm dâng, kơl an ƀon lan bah ăp tahen cảnh sát cơ động tâm Dak Lak hŏ rgop nau mât ân ueh nâp lơn nau tâm rŏng kơl an bah tahen ndrel ƀon lan, ndâk njêng rup gui, ndâk nau ueh lăng bah tahen công an ƀon lan “Yor dak chuêl săk nơm, yor ƀon lan kơl an”./.

            Nŭih rblang: H’Thi