“Dĭng lĕ nŭih ndjôt bôk ƀư nau rŭng răng tâm Dak Lak hŏ geh rmôt công an nhŭp kân, rnôk aơ nau rêh tâm nkuăl Cư Kuin plŏ nâm ơm”. Aơ lah nau geh mbơh tâm rnôk rƀŭn nchră mbơh nau bah Trung ương khay 6/2023, yor Ban Tuyên giáo Trung ương mbơh tâm ôi 16/6. Tâm rơh rƀŭn, mbơh nau ngăch mpeh nau ƀư rŭng răng tâm Dak Lak, Thiếu tướng Đặng Hồng Đức, Chánh văn phòng Bộ công an lah rjăp, jêh nau kan tât, Bộ công an hŏ ngăch n’hao ăp nŭih ƀư nau kan, ntrŭnh ăp nau kan nchueng, rdâng tâm ăp nkuăl geh tât, mât ntŭk n’gâng kan, mât đăp mpăn ân ƀon lan ndrel joi nhŭp nŭih. Ndrel nê, ndal ƀư nau kan, năn hăn ôp khâl bonh đă ăp rnăk geh nŭih khĭt, sôt rmanh, ôp khâl bonh đă ăp rnăk vâl cán bộ, nŭih ƀon lan geh khuch. Thiéu tướng Đặng Hồng Đức nchŏng kloh, đah nuih n’hâm rjăp lơh joi ân saơ ăp nŭih, tât rnôk aơ, rmôt công an hŏ nhŭp rlau 50 nŭih geh râng tâm nau ƀư tih. Bah nau ôp bôk ăp, ăp nŭih geh nhŭp lah bu ndăm, ƀư nau kan tĭng nau đă, nau nsŭk bah trong mạng ndrel geh bu nsŭk ƀư nkah đah rnoi Yoăn ndrel rnoi mpôl đê̆...Nkô̆ nau ƀư bah ăp phung rlăng, du đê̆ nŭih Fulro hôm rêh gŭ tâm dak ba dih đă nŭih rnoi mpôl đê̆ nkhah rnoi Yoăn ndrel rnoi mpôl đê̆ ƀư roh đăp mpăn ndrel ƀư nau nkah, nau ŭch geh gŭ tâm dak ba dih. Nau aơ, rmôt kan công an dôl lŏ uănh n’ôi, ƀư kloh.

Mpeh nau rƀŏng, ntrong kan tâm rơh tât, thiếu tướng Đặng Hồng Đức lah rjăp, Bộ công an mra lŏ joi nhŭp lĕ ăp nŭih tih dôih. Nkre mât đăp mpăn ân ƀon lan ndrel rmôt nŭih hăn râng joi nhŭp, ƀư nau kan mêt uănh, rklaih ngăch tĭng nau ntrŭnh. Bộ công an đă ăp gưl uỷ, n’gâng kan bah n’gor Dak Lak, ăp n’gor Tây Nguyên ndrel êp nê ngăn ngên ƀư ueh nau kan bonh đă, gĭt nau ŭch bah ƀon lan, tâm dăch ma ƀon lan, năn saơ ăp nau tâm rkeh tâm ƀon lan gay ma rklaih tă bah ơm, tă bah tơm ndrel n’hao nau nkah njrăng bah ƀon lan bah năp nau ƀư lơh khuch, nsŭk tâm nkah nau tâm rnglăp lam rnoi mpôl bah phung rlăng, ntrŭt dăng nau kan lam ƀon lan mât đăp mpăn neh dak./.