Tĭng ƀư nău rđău đă bah Thủ tướng Chính phủ, ôi ntri (29/2), ta nkual ƀon têh Pleiku, n’gor Gia Lai, Chính phủ ƀư tâm nchră hun hao wăng sa- rêh jêng kon nuĭh nkre đah mât rnă njrăng, njrăng n’gang neh dak ta nkual Tây Nguyên.

Lah ta rnôk ntơm pơk  tâm nchră, Groi Thủ tướng Chính phủ, Kruanh Hội đồng tâm pă kan nkual Tây Nguyên Trần Lưu Quang lah rjăp: gay hun hao nâp  dăng nkual Tây Nguyên tĭng di rnoh tât kan, nău ŭch geh Nghị quyết mbrô 23 bah Bộ Chính trị ndơ̆ luh, Thủ tướng Chính phủ hŏ n’glêh an njêng Đề án hun hao wăng sa- rêh jêng kon nuĭh nkre đah mât rnă njrăng, njrăng n’gang neh dak Tây Nguyên. Tâm nchră rơh dja joi trong nkra gay ngăch tĭng ƀư jêng ngăn ngăn ăp nkô̆ bah đề án. Ndrel ƀư tơm tâm nchră, Đại tướng Tô Lâm, Ủy viên Bộ Chính trị, Bộ trưởng Bộ Công an nsing nơm an lah, đảng bộ, n’gâng kan, mpôl tahen n’hanh ƀon lan ăp n’gor Tây Nguyên, mbra rlău dơi ăp jêr jŏt, ntul rlong, tĭng ƀư geh nău dơi hun hao wăng sa- rêh jêng kon nuĭh, đăp mpăn rnă njrăng, njrăng n’gang neh dak, ơm ndơ̆ Tây Nguyên hun hao đăt ndal, lam lĕ rngôch n’hanh nâp dăng./.