Lah ta rơh Lễ nkah ndray 75 năm Công an ƀon lan kơt nti, tĭng ƀư Prao nău wa Hồ ntĭm, Tổng Bí thư Nguyễn Phú Trọng đă, ăp cán bộ, tahen Công an ƀon lan ân way “sol êng nơm, rgâl êng”, rđăp êng, tiăr nti êng; ân way gĭt êng jru săk nơm, ân he nơm nsrôih êng dŭt âk gay tĭng ƀư Prao nău wa Hồ ntĭm nti.

75 năm bah năp nơh, mpôl công an ƀon lan rhơn n’hao êng n’hanh n’hao êng săk dơn geh Prao nău ntĭm bah Kruanh Hồ Chí Minh mpeh “Du hê nuĭh công an cách mạng”. Aơ lah ăp trong nchŏng đă dŭt huêng khlay,  lam lĕ rngôch bah Kruanh Hồ Chí Minh mpeh nuih n’hâm uĕh lŏng, han săk, gŭ âm mbơh ngơi, nău dơi kan, n’gơch ngăch, nău kan ân geh bah nuĭh công an cách mạng Việt Nam. Rlău ăp rơh, bol tâm ăp rơh rlăch ndăng rklaih luh rnoi nuĭh, dơn ngoăy neh dak ntơm nơh mô lah tâm n’gâng kan rgâl mhe, rdâk njêng, hun hao n’hanh mât njrăng neh dak aƀaơ, mpôl Công an ƀon lan way đăm gĭt jru, nsrôih kơt nti n’hanh tĭng ƀư dŭt jăp ăp nău ntĭm nti bah Kruanh Hồ Chí Minh têh kuâng. Nhà báo Nhị Lê, tă ƀư Groi Tổng Biên tập Tạp chí Cộng sản an lah:

        “Prao nău Kruanh Hồ Chí Minh ntĭm Công an ƀon lan he geh lĕ rngôch geh 51 chữ dơm, yơn ta nê mpơl nău uănh têh jong bah Kruanh Hồ Chí Minh đah mpôl kan bah he; mpơl nău nsing nơm lĕ rngôch đah mpôl công an ƀon lan đah nău ƀư lah ngoăy tâm 2 ding ti ndrel đah tahen ƀon lan mât njrăng Đảng, mât njrăng Chính phủ, mât njrăng ƀon lan. Ta nê he saơ nău mĭn bah wa hŏ jêng du trong sŏng di, hŏ jêng tơm suan têh kuâng ntrôl mpôl kan công an ƀon lan he tĭng kơn têh jêng tâm rơh cách mạng mât njrăng n’hanh rdâk njêng neh dak xã hội chủ nghĩa”.

        GS.TS Hoàng Chí Bảo, Nuĭh rnâng kan gưl têh, nuĭh tă ƀư Ủy viên Hội đồng lý luận Trung ương an lah, neh dak he dôl lăp tâm rơh ntrôl dăng  lam lĕ rngôch n’hanh ăp kôp tâm rơh rgâl mhe, công nghiệp mhe, têh dăng mhe, lor nchrăp n’hanh nsrôih lăp rgum dak bah dih lam lĕ rngôch, jru hvi, tâm rnôk nô nău lam ntŭr neh, nkual duh jêr khuch tât pah kan mât đăp mpăn rnă njrăng. Gay tĭng ƀư nău dơn kan mât njrăng Đảng, mât njrăng n’gâng kan, mât njrăng ƀon lan, đăp mpăn rnă njrăng neh dak n’hanh đăp mpăn lam rêh jêng kon nuĭh, bah meng nău râng rdâk njêng mpôl công an ƀon lan đăng hăr, săk tơm, têh dăng mhe, ri nău lăp jru n’hanh tĭng ƀư Prao nău wa Hồ ntĭm nti công an ƀon lan lah dŭt n’hâm khlay:

        “Prao nău ntĭm bah Wa luh mpơl lĕ mpeh nuih n’hâm uĕh lŏng, lĕ mpeh chính trị n’hanh lĕ mpeh văn hóa. Jru ngai lah văn hoá mbơh ngơi, văn hóa dâk kan, văn hóa kloh rsang ma Wa lah ân jăp gơih đăp dêh mpêt nkrem. Aƀaơ lĕ rngôch he ân tiăr nti văn hoá kloh rsang da dê gay di đah nău nsing nơm bah ƀon lan. Huêng săk bah Prao nău ntĭm dja lah nău tâm boh đah  ƀon lan ân mbah uănh khlay, gĭt si ƀăp đah ƀon lan. Yor công an lah băl ƀon lan kơt wa lah nê ri ân gĭt si ƀăp đah ƀon lan mô dơn lah mpơl nuih n’hâm uĕh lŏng ma ân weh ma nău dâk kan ngăn ngăn gay ƀon lan nsing nơm, ƀon lan dêh rŏng, ƀon lan kơl, ƀon lan mât njrăng ri mơ geh nău tam”.

        Gay ntrôl dăng lơn đŏng nău kơt nti, tĭng ƀư Prao nău Wa Hồ ntĭm, mpôl công an ƀon lan,  Tổng Bí thư Nguyễn Phú Trọng nkoch kloh nău đă đah lĕ rngôch mpôl kan Công an ƀon lan lam dak ân ŭanh khlay đăm gĭt, rgum ƀư jăp pe nkô̆ nău n’gâng tơm khlay, nê lah: "Kơt nti"; "nsrôih tĭng ƀư, kơt ƀư"; n’hanh "ntĭt leo, hăn lor bôk năp". Ntrŭt ntrôl nău kơt nti, tĭng ƀư Prao nău wa Hồ ntĭm nti ân jêng nău kan way ƀư mbro, ăp nar; jêng trong gŭ rêh, nău mĭn, trong ƀư bah tĭng cán bộ, tahen Công an ƀon lan. Tổng Bí thư Nguyễn Phú Trọng đă:

        “Ăp cán bộ, tahen Công an ƀon lan ân way “sol êng nơm, rgâl êng”, rđăp êng, tiăr nti êng; ân way gĭt êng jru săk nơm, ân he nơm nsrôih êng dŭt âk gay tĭng ƀư Prao nău wa Hồ ntĭm nti, lơn lah nău ntĭm nti rđăp nkah "đah săk he nơm, ân đăp dêh, mpêt nkrem, kloh rsang, mô ndôn êng”, yor aơ lah nuih n’hâm uĕh lŏng tâm nău dâk kan, lah nău mbơh ngơi tâm ăp trong tâm boh ma lĕ dĭng nuĭh way mâp geh ăp nar. Prao nău wa Hồ ntĭm Công an ƀon lan lah nău ntĭnh ntăn đah du mpôl kan mha êng, du trong kan mha êng ma suan rvê tât tâm nău rêh têh hvi, lĕ dĭng nuĭh ân way sol êng săk he nơm.”

        Du bông 75 năm aơ, Prao nău ntĭm bah Wa Hồ dêh rŏng mpeh “Du hê nuĭh Công an cách mệnh” hôm geh rnoh khlay kơt ơm, lơn lah tâm rnôk aƀaơ, rnôk lam Đảng, lam tahen n’hanh lam ƀon lan he dôl nsrôih tĭng ƀư Nghị quyết Trung ương 4, khóa XIII mpeh rdâk njêng, dăp rgum glêh di Đảng; kơt nti n’hanh ƀư tĭng nău mĭn, nuih n’hâm uĕh lŏng, trong gŭ rêh Hồ Chí Minh. Ntô̆ n’hao uĕh nău way ơm dăng janh chrat ang, mpôl Công an ƀon lan kơt nti tay, năp đăm jăp Prao nău Wa Hồ ntĭm nti Công an ƀon lan, tiăr nti, mât nâp han săk chính trị, nuih n’hâm cách mạng, rdâk njêng rup gui uĕh mpeh nuĭh Công an cách mạng “Yor neh dak chuêl săk nơm- Yor ƀon lan rhŏ dŏng./.