Nkhêp di 98 năm nar Báo Chí Cách mạng Việt Nam (21/6/1925-21/6/2023), ôi (20/6), Công an n’gor Dak Lak ƀư mâp măt ntoh măt ăp ngih pah kan thông tấn báo chí pah kan ta n’gor. Ta aơ, kruanh Công an n’gor Dak lak an gĭt lĕ nhŭp 74 nuĭh tâm nău rdôl lơh ngih pah UBND 2 xă ta nkuăl Cư Kuin mhe rlău.

Ta nar mâp măt, Thiếu tướng Lê Vinh Quy-Giám đốc Công an n’gor Dak Lak, mbơh, jêh nău rmôt nuĭh rdôl lơh ngih pah kan UBND 2 xă Ea Tiêu n’hanh Ea Ktur ta nkuăl Cư Kuin măng 11/6, ƀư 2 cán bộ xă, 4 công an xă khĭt n’hanh 2 công an sôt rmanh, 3 nuĭh ƀon lan khĭt; tât aƀaơ ngih pah kan dơi kan lĕ nhŭp kân 74 nuĭh geh tât. Aƀaơ trong kan uănh nđôi joi nhŭp dôl ƀư ndăn. Công an n’gor dôl nsrôih tâm rgop đah rmôt kan dơi kan đăp mpăn rnă njrăng lam ntŭk kan, ntrôl dăng nkoch trêng tât ăp nuĭh ƀon lan đăp mpăn nău mĭn, đăp mpăn pah kan jan sa.