VOV4.Mnông- Bơi tât 2 pơh tay lah tât tết Nguyên đán Nhâm Dần 2022, n’gâng kan pâl nđaih Lâm Đồng dôl nchrăp ăp ntil nău ndơ dŏng, nuĭh kan gay kơl vơt năch an ueh.

          Tât đah Vườn Ánh sáng Đà Lạt- ntŭk  pâl rlưn geh ntĭt kơt lah huêng trôk rêh ueh bâh mpôl mom ta ăp nar aơ, ăp ntŭk ƀư tâm rgop đah ŭnh chrang ang, nău mprơ n’hanh âk mau ueh ntơr lĕ geh âk bôk nău êng êng lĕ geh ntŭk kan nchrăp ƀư lôch, ăp nău nchrăp lĕ geh nchrăp vơt năch ŭch tât pâl rlưn, uănh ntŭk ntô ueh. Wa Phan Minh Trường, Giám đốc leo kan nkual pâl rlưn Vườn Ánh Sáng Đà Lạt an gĭt, ta meng nău n’hao ueh ăp ndơ kơl vơt năch pâl nđaih, nău kan njrăng rdâng nuh srê Covid-19 lĕ geh ntŭk kan uănh njrăng tĭng nău ntrŭnh nsum đŏng.

          “Mpôl hên lĕ nchrăp tŏng ăp ntil ndơ nău kan njrăng rdâng nuh srê an nuĭh kan ta aơ, bâh bok put mbung tât ndơ văn muh măt nching dak mrăch, ndrôm ti. Năch tât đah Vườn Ánh Sáng rĭ geh veh duh săk, đă rao ti ma dak rao kaman ê lor lăp ta aơ pâl. Mpôl hên lĕ nchră tŏng ăp nău kan nđâp ma ntrong njrăng rdâng nuh srê, mô dơn mbơh tơih tâm ntŭk kan ma hôm nha mbơh đah Trạm y tế phường 8 n’hanh sở y tế n’gor Lâm Đồng đŏng”.

          Mô dơn ăp nkual, ăp ntŭk pâl rlưn mhe, ăp ntŭk ueh n’hanh ntŭk năch pâl rlưn tât lĕ ơm ntoh lư ta Đà Lạt kơt lah: Thiền viện trúc lâm, thung lũng tình yêu, leng Pren, leng Datanla. đồi mộng mơ, ntŭk tăm kao  nkuăl ƀon têh n’hanh du đê̆ ntŭk pâl rlưn tuch tăm...lĕ geh nchrăp ueh ăp ndơ dŏng, rnoh nuiđh kan, nău kơl kan gay ma vơt năch pâl nđaih.

          Tĭng nău mbơh bâh wa Nguyễn Viết Vân, giám đốc ntŭk kan văn hóa, thể thao n’hanh pâl nđaih Lâm Đồng, tât rnôk aơ, bâh ăp ntŭk gŭ rlu tât ăp ngih răk ngêt sông, ntŭk pâl rlưn ta ntŭk lĕ geh mât đăp mpăn ăp nău kơl răk năch da dê. Tâm nĕ, nău mât đăp mpăn njrăng rdâng nuh srê Covid-19 lĕ geh mât uănh.

Ndrel đah nĕ, n’gâng kan pâl nđaih lĕ tâm rgop đah ăp ntŭk kan têh tâm n’gor n’hao nău kan uănh nđôi ntĭm bmơh ngăch ăp ntŭk kan pâl nđaih rgâl dâl ăp nău mô dơi, nău mô tâm di lah geh, an tâm di đah nău pâl rlưn vơt năm mhe, rlu rlău bâh năch rnôk tât ta Đà Lạt- Lâm Đồng ta rơh tết nguyên đán atay.

          “Lĕ rngôch ăp ntŭk kan lĕ geh mbơh tơih nti nău kan, năp ăp ntil ndơ dŏng nkô̆ nău geh tât njrăng rdâng nuh srê tĭng nău ntrŭnh bâh n’gâng kan dak si. Ndrel đah nĕ, ăp ntŭk ngih gŭ rlu lĕ geh n’hao mhe, ăp ntŭk pâl rlưn lĕ geh ntuh kơl, ăp ntil ndơ mhe lĕ ƀư lôch, ngăn lah geh ăp ntŭk pâl mhe lơn, geh âk nău mât uănh tât pâl bâh năch pâl nđaih geh tât đah Đà Lạt- Lâm Đồng. Lĕ tâm rgop đah ăp ntŭk kan geh tât n’hanh nkuăl ƀon têh Đà Lạt gay ma nchrăp ăp nău kan mpeh ndơ dŏng, đăp mpăn trong hăn n’hanh ƀư tĭng uănh nđôi, ntĭm mbơh gay ma ăp ntŭk kan kơl vơt năch vơt năm mhe đăp mpăn ueh răm”.

Nuĭh rblang: Thị Đoắt