VOV4.M’nông: Jêh âk khay jŏ jong rlu nsrŭng yor khuch srê Covid-19, nău ƀư pâl nđaih bah Đà Lạt-Lâm Đồng lĕ n’gŭr m’ak plơ̆ tay n’hanh wăch rgum nar lơ âk năch. Bôl ndrĭ, bôl âk nău ntoh mhe, ngăn lah nău “ndranh” ƀư jêr jŏt, ƀư roh đăp mpăn rnă njrăng. Gay rhŏ nău ŭch hăn nsong rlu rlău, ăp ngih pah kan dơi kan ta ntŭk dôl nsrôih nkra rgâl ăp nău jêr, ndâk njêng rup ndah Đà Lạt uĕh, dăch dêh, rŏng năch.

Khay bah năp, rnôk pâl nđaih Đà Lạt n’gŭr răm tay jêh âk khat rlu nsrŭng yor srê Covid-19, nkual ƀon têh rbăn nkao lĕ ntoh âk nău jêr. Ntoh lư ngăn lah nu nău “ndranh” nău ƀư lĭr lar, ndơ tăch ta trong rŭn in trong hăn, tăch rgâl mô uĕh... Mĭn lah pâl nđaih lah nău kan wăng sa khlay, n’gâng kan nkual ƀon têh Đà Lạt lĕ nsrôih rgâl nkra ntŭk ntô nkual ƀon têh, n’hao trong kan mât uănh gay ngăch nkra rgâl ăp nău hôm e nkân. Thiếu tá Trương Quang Vũ, Rmôt Cảnh sát uănh nđôi nău tih mpeh wăng sa, Công an nkual ƀon têh Đà Lạt an gĭt, ăp nău ƀư “ndranh mứt” tâm pit năch geh tâm rnôk mhe rlău lĕ dơi ntŭk kan lăp n’hanh nkra rgâl lôch dŭt.

“Ăp ntŭk kan dơi kan ƀa ƀơ uănh nđôi, an ăp ntŭk kan ton mô rlak gưl rhiăng tay ăp nuĭh ntĭm pâl nđaih, yor bah nĕ ƀư ntoh geh nău tâm rkeh đah ăp nuĭh hăn ndranh, nuĭh ntĭm, ƀư khuch mô uĕh, ƀư roh đăp mpăn”.

Đà Lạt lah ntŭk tât uĕh bah năch pâl nđaih.

Tĭng wa Nguyễn Viết Vân, Kruanh N’gâng kan Văn hóa, Thể thao n’hanh pâl nđaih n’gor Lâm Đồng, ndrel đah rgum n’hao uĕh, hun hao ăp ndơ pâl nđaih nâp nâl geh êng, n’gor dôl rgŏ jă lam ƀon lan n’hao nău kan mât ndrăy ntŭk ntô kloh uĕh, nkre đah nău mât n’hanh ƀư uĕh nău rêh nuĭh Đà Lạt “tâm rnglăp, dăch dêh, rŏng năch”.

“Năm tât mpôl hên ƀư uĕh tay trong kan nkoch trêng, n’hao trong kan uănh nđôi nu nău hao khlay, ndranh jă têk ri mbra rmal rjăp. M’hâm ƀư ndâk  njêng rŭp ndah bah kon nuĭh Đà Lạt-Lâm Đồng uĕh lơn, gĭt blău, tâm rnglăp, dăch deh, rŏng năch; gay năch tâm dak n’hanh dak bah dih rnôk tât Đà lạt, rnôk tât Lâm Đồng mbra ŭch lơn, dơi mât tay ăp rup ndah uĕh lơn”.

8 khay bôk năm aơ, Đà Lạt-Lâm Đồng lĕ wơt 5 rkeh 70 rbăn năch pâl nđaih tât uănh nsong, rlu rlău, hao 153% nkôp đah rơh aơ năm e. Tĭng yuh Đào Thị Huyền Trang, năch pâl nđaih tât bah n’gor Bình Thuận, Đà Lạt lĕ rgâl âk, mô knŭng uĕh ăp ntil ndoh ndơ dơi hao, ndơ pâl nđaih âk lơn, ma ăp nău ndranh, n’hao khlay ndơ, tăch rgâl tĭng kơt “ƀư sa tâm pit” lĕ hŭch âk.

“Gâp saơ trôk nar dŭt uĕh nđik, ntŭk ntô uĕh. Ntŭk ntô ri ta aơ geh âk ntŭk an he sŏk rup. Ăp nuĭh dŭt dăch dêh n’hanh uĕh rom”.

“Dăch dêh, tâm rnglăp, rŏng năch” dơi mĭn lah nău rêh bah nuĭh Đà Lạt. Đah nău ƀư nĕ, nuĭh Đà Lạt mbra tâm rnglăp gay jăng lơi “ndranh pâl nđaih” gay wăch rgum năch pâl nđaih đah “nkual ƀon têh rbăn nkao”.

Nuĭh rblang: Y Sưng Phê Ja