Kêng măng 23/2, UBND nkuăl ƀon têh Đà Lạt, n’gor Lâm Đồng ƀư nau rnê nkhôm nau kan ueh tâm nau rêh ân 3 nŭih, geh dônh ndơ jêh nê mplŏ ân bu năch tŭp. 3 nŭih geh rnê nê lah Đặng Bá Thương (31 năm, ƀon tơm Thanh Hoá, gŭ tâm trong Đào Duy Từ, phường 4, nkuăl ƀon têh Đà Lạt), wa Lương Khánh (49 năm, gŭ tâm trong Nhà Chung, Phường 3, nkuăl ƀon têh Đà Lạt) ndrel oh Võ Quỳnh Thư, kon se nti jrâu 7A12 ngih săm ƀŭt THCS Nguyễn Du, nkual ƀon têh Đà Lạt. Tĭng nê, ôi 20/2 tâm rnôk hăn nti tâm trong Hai Bà Trưng (phường 6, nkuăl ƀon têh Đà Lạt), oh Võ Quỳnh Thư geh dônh điện thoại iphone 14 Plus rnoh 18 rkeh. Jêh nê Thư ân ndŏ ân Công an Phường 6 gay joi ndrel mplŏ ân nŭih geh tŭp.

Bah nau năl, công an Phường 6 hŏ ngăch joi nŭih tŭp, nkre uănh Thư mplŏ ân nŭih geh tŭp điện thoại, nê lah bu ur gŭ tâm nkuăl ƀon têh Hồ Chí Minh. Bah năp nê, kêng măng 13/2, rnôk hăn tâm trong Trần Phú, ta Phường 3, nkuăl ƀon têh Đà Lạt, nô Đặng Bá ndrel wa Lương Khánh geh dônh du mlâm ƀap. Nô Thương ndrel wa Khánh hŏ jao ƀap ndrel prăk, săm ƀŭt tâm trôm nê ân công an Phường 3. Jêh nê, ntŭk kan công an hŏ năl ndrel mplŏ ndơ ân nŭih tŭp lah wa Nguyễn Lê Trãi, bu năch hăn pâl tă bah n’gor Khánh Hoà./.