VOV4.M’nông: Kêng măng 29/8, ta Hà Nội geh rơh Đại hội ntoh măt lam dak Hội chữ thập dổ Việt Nam tal 11, năm kan 2022-2027, đah nau râng bah rlau 500 ntoh măt gĭt blau ntoh ân rlau 7,2 rkeh nŭih cán bộ, hội viên, nŭih kơl an, druh ndăm Chữ thập đỏ lam dak. Đại hội Hội chữ thập đỏ Việt Nam tal 11 đah âk nau kan khlay, tâm nê, nchră tât nau tă geh dơi bah nau kan Hội ndrel nau kan Chữ Thập đỏ năm kan 2017-2022, nsôih nkô̆ nau, nau kan, trong rƀŏng ndrel ăp nau kan gay ma đăp mpăn ntrŭt dăng ăp ntil nau kan Hội ndrel nau kan Chữ thập đỏ tâm năm kan 2022-2027. Năm kan rlau aơ, Hội chữ thập đỏ lam dak hŏ mro ƀư ăp nau kan mhe, ntrŭnh ƀư ăp nau kan kơl an tât ăp nŭih tâm nau rêh, đah nau tơm rlu 23 rbăn rmen, kơl an ăp năm ân rlau 18 rkeh nŭih. Tâm rơh rƀŭn bôk năp Đại hội ntoh măt lam dak Hội chữ thập đỏ Việt Nam hŏ săch Rnâng kan rđau kan Trung ương Hội chữ thập đỏ Việt Nam gưl 11, năm kan 2022-2027 ndrel ƀư rơh rƀŭn Rnâng kan rđau kan Trung ương Hội gưl 11 tak bôk năp./.

Nŭih rblang: H’Thi