Ăp nău nsrôih mô gŭ rlu bah Giáo hội Phật giáo Việt Nam n’hanh  n’gâng kan Nkual ƀon têh Hồ Chí Minh tâm nău đăng cai n’hanh ƀư Đại lễ Vesak Liên Hợp quốc năm 2025 hŏ dơi nsum mpôl Phật giáo lam ntŭr neh nchih nkah n’hanh rnê âk.

Bah nê an saơ Giáo hội Phật giáo Việt Nam nar lơn ma dăng jêng n’gâng ŭnh lơt tâm trong rƀŏng ăp nău kan dak bah dih bah Phật giáo lam ntŭr neh, tâm nău mpư rnê rnoh khlay giáo lý bah Đức Phật yor an bah tâm lơh tâm su n’hanh rhŏ dŏng an nău rêh tâm rnôk nô nău lam ntŭr neh aƀaơ.

Vesak mô lah lễ Tam hợp (nkah ndray nar deh, jêng chroh n’hanh kloh rsang) bah Đức Phật Thích Ca Mâu Ni dơi uănh lah nău  kan văn hóa chroh rƀŭn yor an bah tâm lơh tâm su n’hanh dơi kơp dơn ngăn ta Đại hội đồng Liên hợp quốc khóa 54 nar 15/12/1999.

Ntơm bah năm 2000 tât aƀaơ, Đại lễ Vesak Liên hợp quốc hŏ dơi ƀư 19 tơ̆, tâm nê Việt Nam hŏ đăng cai n’hanh ƀư geh nău dơi pe tơ̆: năm 2008 ta Ntŭk rgum tâm nchră gưl neh dak Mỹ Đình, Hà Nội; năm 2014 ta chùa Bái Đính, n’gor Ninh Bình; n’hanh năm 2019 đah ta chùa Tam Chúc, n’gor Hà Nam.

Đah ăp nău dơi nê, Việt Nam dơi sơch ƀư đăng cai tay n’hanh ƀư Đại lễ Vesak LHQ tâl 20 năm 2025 ta Học viện Phật giáo Việt Nam, nkuâl Bình Chánh, nkual ƀon têh Hồ Chí Minh.

Lah nuĭh hŏ âk tơ̆ râng lễ ta Việt Nam, Hoà thượng Tiến sĩ Tampalawela Dhammaratana – Groi kruanh rnâng kan Uỷ Ban Quốc tế Đại lễ Vesak Liên Hiệp Quốc (ICDV) mpơl nău nkah uĕh bah năp ăp nău nsrôih bah Việt Nam tâm nău ƀư ntoh lư drăp ndơ ơm yău ntlơi an tay rnoi nuĭh n’hanh Phật giáo.

“Vesak LHQ 2025 dŭt khlay, mô dơn lah yor tâl 4 Việt Nam ƀư ma lah yor 50 năm đăp mpăn dơn ngoăy neh dak 2 mpeh rgum sĭt du dor jong. Rlău  ma nău n’grŏ tĭng dŭt n’hâm bah Chính Phủ Việt Nam hôm geh nău rđău kan bah Giáo hội Phật giáo Việt Nam ma dâk bôk lah đức Pháp chủ Thích Trí Quảng. aơ lah du trong ntĭt leo, lah du trong leo lor an kơt tĭng ma Phật giáo lam ntŭr neh mbra kơt nti. Gâp saơ lah ăp nău kan văn hóa n’hanh âk nău kan êng bah năp tâm n’hanh bah kơi Đại lễ njêng luh nău rgum wăch an nsum mpôl râng dŭt uĕh reh”.

Râng Vesak LHQ 2025 ta Nkual ƀon têh Hồ Chí Minh năm aơ geh 1300 đại biểu dak bah dih lah ăp kruanh chroh Phật giáo lam ntŭr neh; ăp nuĭh gŭ mĭn, ăp nuĭh gĭt blău nti têh… tât bah 85 dak nkual neh. Nău dja mô dơn an saơ nău nsing nơm bah dak tơm jay ma hôm lah rjăp dơi nău khlay bah Giáo hội Phật giáo Việt Nam tâm nsum mpôl Phật giáo lam ntŭr neh.

Đại lễ Vesak LHQ tâl 20 năm 2025 geh nkô̆ tơm lah “Tâm rnglăp n’hanh an nău yô̆ n’hanh nuih n’hâm uĕh lŏng kon nuĭh: Bah nău rvê Phật giáo yor an lam ntŭr neh bah tâm lơh tâm su n’hanh hun hao jŏ jong nâp dăng”. Đại lễ ƀư đah âk nău kan rgum tơm kơt lễ ntơm pơk, ăp rơh rgum nchră dak bah dih, lễ wơt xá lợi Phật, bôk nău kan njroh mprơ mbah rhơn, tâm nchră học thuật n’hanh ăp nău kan tâm nđŭr văn hóa huêng tam…

Lah ta Đại lễ, ntơh măt kruanh rđău kan Đảng, Ngih dak Việt Nam, Kruanh dak Lương Cường lah kloh, ăp rnoh khlay n’gâng tơm bah giáo lý Từ bi - Trí tuệ ma Đức Phật trêng nti tay nha hôm kơt ơm nkô̆ hôr khlay đah ntil kon nuĭh aƀaơ.

Ăp rnoh khlay kơt nuih n’hâm rŏng dak, nuih n’hâm an nău yô̆, nău gĭt êng rƀŏng mpeh mpeh uĕh lăng bah Phật giáo hŏ lăp jru tâm nuih n’hâm nuĭh Việt n’hanh rgop hŭr tŏ săk tơm văn hóa rnoi nuĭh Việt Nam. Kruanh dak Lương Cường an gĭt:

“Đảng, Ngih dak Việt Nam way rnê âk n’hanh nta ăp trong dơh gay ăp chroh rƀŭn, tâm nê geh Phật giáo gŭ rêh tâm trôm pháp luật, tĭng ƀư sŏng di trong kan uănh khlay n’hanh mât njrăng nău dơi dah rŏng chroh rƀŭn bah ăp nuĭh n’hanh uănh nê lah jâng nsing khlay gay rdâk njêng tâm rnglăp lam rnoi nuĭh. Ăp tăng ni, phật tử Giáo hội Phật giáo Việt Nam hŏ, dôl n’hanh mbra nsum ti ndrel tăng ni, Phật tử lam ntŭr neh mât mơh trong chroh n’hanh ntil kon nuĭh, yor ma nău ŭch tât geh nsum lah bah tâm lơh tâm su, tâm rnglăp, tâm boh n’hanh hun hao”

Đại lễ Vesak Liên hiệp quốc 2025 ta nkual ƀon têh Hồ Chí Minh lah 1 ntŭk rgum tơm khlay tâm ăp nău kan kơl Việt Nam rgop âk lơn tâm nău ŭch tât rôk năm bah Liên hợp quốc yor bah tâm lơh tâm su n’hanh hun hao jŏ jong nâp dăng.