VOV4.M’nông: Đại tướng Võ Nguyên Giáp-“Nô tơm” bah tahen ƀon lan Việt Nam, nŭih kơl nchră nau kan tahen, nŭih kan chính trị, nchră nau têh geh lam dak ndrel lam ntur neh rnê. Nau kan, nuih n’hâm mpeh nau rêh, nau kan bah Đại tướng hŏ jêng nau kan têh tâm nuih n’hâm ăp ƀon lan Việt Nam. Đah ma ƀon lan ăp rnoi mpôl ATK Bắc Sơn (Lạng Sơn), di nkah rnôk Đại tướng tât khâl, ăp nau ntĭnh ndrel nau tâm dăch dơh tâm nau rêh bah Đại tướng lah nau rhơn ndrel nau nsôih gay ma ăp nŭih tâm ƀon tơm cách mạng Bắc Sơn nsôih. Di nkah 111 năm Nar deh Đại tướng Võ Nguyên Giáp (25/8/1911-25/8/2022) Duy Thái-Phóng viên Radio Việt Nam nkuăl Đông Bắc geh nau nchih:

            Bol ma hŏ 27 năm hŏ rlau, yơn tâm nuih n’hâm bah wa Dương Minh Thuận (Groi Ban Dân vận n’gor uỷ Lạng Sơn ơm) hôm nkah mro rup gui bah Đại tướng Võ Nguyên Giáp tâm nglan Bắc Sơn tâm kêng măng nê nơh. Wa Thuận lah nŭih geh vơt Đại tướng Võ Nguyên Giáp tâm trong jâng gung ndeh mpar kung kêng măng 26/9/19995 rnôk ma Đại tướng tât khâl ƀon tơm Bắc Sơn-nkuăl An toàn khu bah Trung ương tâm rnôk tâm lơh mprơh Pháp. Ôi ba kơi, Đại tướng hŏ nkoch bri ma kônh wa ăp rnoi ndrel tahen bah rmôt:

            ‘Đại tướng ntĭnh Bắc Sơn lah nkuăl geh nau vay ơm cách mạng hôm, yơn ân geh nsôih rklaih ach o, hao jêng ƀư sâm geh. Ndrel jêh nê Đại tướng ôp Đảng bộ ƀon lan Bắc Sơn geh tâm di ma nau nê đŏng, ri lĕ ma nŭih tâm nglan rnôk nê, bol ma ma mô geh tâm ban ngơi du tŏ yơn kŏ tâm ban nau lah tâm di đŏng, ton lah ma Đại tướng. Rnôk lôch nau ntoh ngơi tâm nar nê, Đại tướng hŏ ntĭnh mbah kônh wa đah nau ngơi rnoi mpôl bah nŭih Tày Bắc Sơn”.

            Ta Bảo tàng ntơm ndâk lơh Bắc Sơn hôm ơm âk nau nchih, rup gui rnôk Đại tướng Võ Nguyên Giáp hăn khâl Bắc Sơn năm 1995 ndrel nau ntĭnh tahen ndrel ƀon lan Bắc Sơn ân geh “ƀư tĭng nau vay ơm ƀon tơm janh dăng, ndâk njêng nkuăl ân jêng du nkuăl leo trong lor bah n’gor”; tơm jri geh Đại tướng tăm tâm nar nê nơh, rnôk aơ dôl ma hao prêh, nkŭm n’hâm an Bảo tàng. Yuh Phạm Thị Thanh Hà, cán bộ Bảo tàng ndâk lơh Bắc Sơn, ngơi:

            ‘Bảo tàng kŏ lah du ntŭk tât âk bah nŭih năch rnôk tât ta Bắc Sơn. Aơ lah ăp ntil ndơ ơm ngăn ma cán bộ bảo tàng hŏ geh joi ndrel ma mât, rgop nau ntĭm nti nau vay ơm ân ăp kơn ƀon lan, ngăn lah ăp rơh mom mro nkah ndrel nkah jru ngăn nuih n’hâm kơl an bah ăp nŭih janh dăng. Aơ kŏ lah nau rhơn bah Đảng bộ, n’gâng kan ndrel ƀon lan ăp rnoi mpôl nkuăl Bắc Sơn rnôk geh Đại tướng tât khâl. Bu năch tât ta aơ ri ôp âk ngăn nau ôp tât Đại tướng, ngăn lah ăp kon se nti, ăp kon se ŭch ôp âk nau ngăn, jêh ri lŏ rhơn ngăn rnôk geh gĭt tât Đại tướng Võ Nguyên Giáp”.

            Bơi tât 10 năm Đại tướng sĭt tĭng trong đah ăp nŭih tahen drâu phan hŏ khĭt tâm rnôk nsĭt nau đăp mpăn bah neh dak. Ƀư tĭng nau ntĭnh bah Đại tướng, kônh wa ăp rnoi ndrel cán bộ, tahen rmôt Bắc Sơn hŏ ndrel tâm rnglăp, nsôih hun hao văng sa rêh jêng, mât đăp mpăn rnă njrăng neh dak tâm nkuăl neh ƀon tơm cách mạng./.

Nŭih rblang: H’Thi