VOV4.M'nông: Ta Dak Lak aƀaơ geh tât 36 trong dak kloh uĕh ta nkual ƀon lan hŏ khuch khat, jŭr djơh, rlu dŏng. Nău dja ƀư mpŭng lir tơm prăk ngân sách rnôk ăp du ntŭk ntuh kơl âk rmen prăk, yơn nuĭh ƀon lan hôm ât ji sât ji hir đŏng, mô geh dak dŏng sa gŭ rêh.

          Trong dak dŏng kloh uĕh ta buôn Trap, xã Cư M’gar, nkuâl Cư M’gar dơi ntuh kơl ƀư ntơm bah 2017 tât 2019 ri hŏ lôch jêh. Lĕ rngôch rnoh ntuh kơl lah 12 rmen prăk bah tơm prăk ngân sách, pă an dak kloh uĕh an bơi 500 rnăk ƀon lan ta buôn Linh, buôn Trap n'hanh buôn Thung. Wa H’bun Kbuôr ta buôn Trap nkoch, trong dak man dŏng bar pe khay hŏ nchuăt mbro 3 năm aơ, aƀaơ ntơm dơm an pih rêp hon mbrek. Rnăk wâl dôl jêr jŏt mpeh tơm dak dŏng sa đŏng:

          "Mô hôm geh dak  máy dŏng, rnăk hên plơ̆ dŏng tay dak ntu dơm. Hôm khay wai ntu kroh suăt, mpôl hên ân hăn dăn dak mô lah rvăt dak sĭt dŏng sa; hôm dak ŭm ntu ri sŏk ndeh cày hăn tât ntŭk geh n'glău dak bât rdeng sĭt”.  

        Rblang nkô̆ trong dak kloh uĕh 12 rmen prăk dŏng nklăp bar pe khay dơm, wa Phạm Thị Tiềm - Kruanh UBND xã Cư M’gar, an gĭt, nkô̆ lah pah kan mât uănh nchuăt dŏng mô geh nău tam. Bôk năp, xã jao an 3 kruanh ƀon mât dŏng. Dŏng nklăp bar pe khay, lĕ 3 nuĭh du rơh mplơ̆ tay đah nkô̆ mô dơi sŏk prăk bah ƀon lan gay trok tâm prăk điện. Năm 2020, xã njêng Rmôt mât dŏng trong dak kloh uĕh buôn Trap. Yơn lah, tă bah mô geh nău way gĭt kan n'hanh nău sŏk prăk điện bah nuĭh ƀon lan mâp jêr  jŏt jêng trong dak an rlu tay. Wa Phạm Thị Tiềm nkoch kloh lơn:

      “Ủy ban xã geh dăn đă jao an Ntŭk rgum kan trong dak kloh uĕh n'hanh Mât kloh uĕh ntŭk gŭ rêh bah Sở Nông nghiệp n'hanh Phát triển nông thôn gay mât dŏng, ta UBND xã mpôl hên ri mô tŏng geh nău way dơi kan mât dŏng trong dak kloh uĕh dja. mpôl hên dŭt rvê yor ntŭk khuch khat tâm trôm neh măt ngăn mpôl hên mô dơi gĭt saơ gay nkra bah. Jêng ân mplơ̆ sĭt an đơn vị geh nău way kan gay mât dŏng an geh nău tam".

        Ôp uănh tay ăp tŏng bah Ntŭk  rgum kan trong dak kloh uĕh n'hanh Mât uĕh ntŭk gŭ rêh Dak Lak an saơ, lam n'gor geh tât 36 trong dak kloh uĕh tâm lĕ rngôch rnoh 123 trong dak kloh uĕh rgum ta ƀon lan hŏ khuch khat, jŭr djơh, rlu kan. Nkô̆ tă bah nău ntuh kơl jê̆ chrai, nuĭh dŏng đêt, tâm rnôk mât dŏng kan âk ƀư prăk sŏk geh mô tŏng prâk dŏng kan. Ăp trong dak kloh uĕh lơn âk dơi jao  an gưl xã mô lah ƀan mât njrăng êng thôn ƀon mât dŏng; cán bộ mât dŏngg mô tŏng nău dơi kan jêng an geh khuch khat, roh huach, mô nsĭt nău geh wăng sa dơh uĕh jêng trong dak kloh uĕh ân tât rlu hoch dŏng.

        Tĭng wa Phạm Ngọc Bình – Giám đốc Ntŭk rgum kan trong dak kloh uĕh n'hanh Mât kloh uĕh ntŭk gŭ rêh Dak Lak, gay rdâk tay ăp trong dak kloh uĕh ta ƀon lan, đơn vị dôl kan nsum đah UBND ăp nkuâl, thị xã, nkual ƀon têh ƀư ôp uănh tay ăp tŏng lam lĕ rngôch, rdâk njêng trong nkra; nkre n'hao dăng nkoch trêng an nuĭh ƀon lan gĭt wât mpeh nău dơh uĕh bah nău dŏng trong dak kloh uĕh. Mpeh jŏ jong n'gor ân geh trong kơl lam rêh jêng kon nuĭh pă an dak dŏng, ntuh kơl ăp trong dak kloh uĕh ân geh nău tâm ban:

       “Tâm let năp tay ma geh ntuh kơl, ri ăp đơn vị dơi jao an tơm nuĭh ntuh kơl ân gŭ mĭn mhâm ƀư gay ăp trong dak ƀư têh ntơm bah dah găp tât têh let lơ, rnoh rnăk rhŏ dŏng âk lơn, ntơm bah nê rnoh ntuh kơl mbra jŭr thuk lơn, n'glăp dŏng mbra geh nău tam lơn. Nkô̆ nău jao an đơn vị mât dŏng dŭt khlay đŏng, ân ntrŭt nsôr ăp doanh nghiệp geh nău dơi kan râng tâm rlong ndranh ƀư gay khân păng ndrel râng trong kan dja gay ƀư ndranh, mât dŏng tĭng di nău way"./.

Nuĭh rblang: Điểu Thân