Khay mih rlu nti năm 2023 aơ lah rơh rlu dơi nkah gĭt đah oh Huỳnh Tấn Đạt, jrô 5, Ngih sam ƀŭt Tiểu học Lê Hồng Phong, nkuăl M’Đrắk, rnôk dơi mê̆ bơ̆ an râng rơh ƀư ngăn ƀư Cảnh sát njrăng n’gang puh nsĕt ŭnh ta Ntŭk ntĭm rđău Cảnh sát njrăng, n’gang puh nsĕt ŭnh n’hanh CNCH Công an n’gor Dak Lak. Tâm rơh ƀư ngăn aơ, Đạt dơi hao ndeh puh nsĕt ŭnh, dô̆t dĭng puh nset ŭnh ndrel ăp tahen Cảnh sát njrăng n’gang puh nsĕt ŭnh n’hanh ƀư ăp nău blău krih dak nsĕt ŭnh; rklaih luh tâm nău nău ŭnh sa.

 “Râng jrô nti nău blău, oh lĕ nti trong rklaih luh nsŭk ŭnh sa, n’hanh nti tay âk nău uĕh”.

Râng rơh ƀư ngăn aơ đŏng ƀư Cảnh sát njrăng n’gang puh nset ŭnh, oh Nguyễn Ngọc Quỳnh Anh, nti jrô 5 Ngih sam ƀŭt tiểu học Hoàng Việt, nkual ƀon têh Buôn Ma Thuột, nkoch:

“Nar aơ rơh bôk năp kon dơi djôt dĭng dak gay puh nsĕt ŭnh”.

Bah meng ăp jrô ntĭm nti nău wât, văn hóa khay mih rlu nti, mô lah an kon se pâl êng ta jay, đêt năm plơ̆ ma aơ, ăp rnăk wâl n’hanh ngih sam ƀŭt ta Dak Lak lĕ uănh tât lơn tât nău an kon se râng ăp nău ƀư bah dih kơt mĭn joi gĭt ndơ ơm geh, lịch sử; ƀư ngăn ƀư nuĭh ƀon lan; ăp jrô ntĭm gĭt blău rêh; nti tahen; hải quân; tahen puh nsĕt ŭnh; trại hè tiếng anh; ăp jrô ntĭm re dak, võ thuật, cầu lông, chưng play... Nô Nguyễn Văn Hiển, ta phường Tân Lập, nkual ƀon têh Buôn Ma Thuột, an lah ăp nău ƀư ngăn kơt nĕ mbra kơl uĕh an ăp kon dŭt âk:

“Mpŏng ŭch bah rnăk wâl lah an ăp mon geh ntŭk pâl uĕh, tal 2 lah an ăp mon gĭt, ƀư ngăn n’hanh djôt dơn ăp nău wât ngăn. Ăp nău blău ngăn aơ mbra hăn ndrel đah ăp kon tâm nău rêh. Aơ ngăn ngên lah bôk nău ƀư uĕh, kơl kon se dơi ƀư ngăn n’hanh hun hao lĕ rngôch lơn”.

N’gor Dak Lak aƀaơ geh nklăp 508.000 kon se, ŭch râng ăp jrô nti tâm rơh khay mih rlu nti dŭt âk. Wa Nguyễn Thị Thúy Hiền, groi giám đốc Ngih Văn hóa Thanh thiếu niên n’gor Dak Lak (mpeh tâm N’gor đoàn Dak Lak) an gĭt, nar lơ geh âk me bơ̆  dăn an oh kon râng ăp jrô nti năp blău rêh, văn hóa nghệ thuật, thể dục thể thao; ƀư ngăn ƀư tahen, tahen puh nsĕt ŭnh, hải quân. Tâm di nău ŭch nĕ, khay mih rlu nti năm 2023 aơ, ntŭk kan lĕ ƀư rlău 100 jrô nti ăp ntil n’hanh wăch rgum bơi 5.000 oh kon se ta nkual ƀon têh Buôn Ma Thuột, ăp nkuăl kiău ma kơt Buôn Đôn, Cư M’gar, Krông Pắk... Tĭng wa Hiền, bah aƀao tât lĕ khay mih rlu nti, mbra geh tay âk nău ƀư uĕh an kon se rchong ta ăp nkuăl tâm n’gor.

 “Nchrăp an ăp nău ƀư khay rlu nti năm 2023, N’gor đoàn lĕ mbơh ƀư ăp bôk nău kan khay rlu nti an ăp ntŭk kan nkuăl, nkual têh, nkual ƀon têh, thành đoàn gay ƀư ăp jrô nti yan khay mih rlu nti an lĕ rngôch ăp kon se ta lam n’gor Dak Lak. Tĭng groi nđôi bah mpôl hên n’hanh lĕ saơ, âk ntŭk lĕ ƀư ăp jrô nti, bôk nău kan khay rlu nti an ăp oh râng ƀư ngăn ntơm tâm di đah rơh năm n’hanh nău ŭch bah ăp oh, đah nu nău ngăn ta tĭng ntŭk kan. Na nê̆, ăp nkuăl đoàn Krông Ana, Krông Pắk mô lah nkual ƀon têh Buôn Hồ lĕ ƀư ăp bôk nău kan ngăn an ăp oh nti re dak an dơm, nti văn hóa nghệ thuật, ƀư ăp nău pâl rlưn bah dih an ăp oh”.