Wa Nguyễn Tài ta thôn 15, xă Ea Yông, nkuăl Krông Pắc, n’gor Dak Lak rnôk tât ƀư sam ƀŭt sam tra hành chính ta ntŭk “Du mpông” ta UBND xă Ea Yông. Wa Nguyễn Tài an lah, nău ăp gưl n’gâng kan ƀon lan ntrôl dăng rgâl sam ƀŭt hành chính năm bah năp lĕ nsĭt tay nău uĕh ngăn ngên an nuĭh ƀon lan, rmôt kan, doanh nghiệp. Tâm nĕ, njoat hăn djôt dơn ngăn ntrong ƀư “Trang Zalo boăt nthoi lam ƀon lan” tâm trong mkra sam ƀŭt hành chính ta ntŭk.

“Rnôk gâp tât ƀư sam ƀŭt ta ngih pah kan hành chính bah xă. Gâp saơ nĕ lah nău blău n’hanh nău rhŏ dŭt n’hâm bah ăp cán bộ tâm ntŭk hành chính bah xă. Rnôk nuĭh ƀon lan geh nău ŭch tâm rgâl mpeh ăp sam ƀŭt hành chính ri dơi ôp na nê̆ tâm rmôt Zalo”.

Ndrel đah ntrong ƀư “Trang Zalo boăt nthoi lam ƀon lan”, năm bah năp, ăp ntrong ƀư kơt: “Nar tal 4 trực tuyến”, “Nar mô nchih”, “Nar mô ton” lĕ dơi ăp ntŭk tâm n’gor Dak lak mbơh ƀư gay dơh rgâl ăp sam ƀŭt sam tra hành chính. Rnôk nuĭh ƀon lan tât ntŭk “Du mpông” gay ƀư ăp sam ƀŭt sao y, chứng thực sam ƀŭt sam tra; ƀư sam ƀŭt dăn tâm gŭ ur sai; sam ƀŭt dăn khai sinh n’hanh sam ƀŭt dăn mbơh khĭt mbra dơi mkra ta ntŭk đah 5 gưl: mbơh ntĭm, wơt dơn, sŏk lơi, uănh an n’hanh mplơ̆ tay sam ƀŭt. Wa Nguyễn Thị Thúy Sinh, cán bộ Văn phòng-Thống kê UBND xă Ea Yông, nkuăl Krông Pắc, n’gor Dak Lak an gĭt:

“UBND xă lĕ ƀư tĭng âk ntrong kan gay mbơh ƀư tât nuĭh ƀon lan. Tâm rgop đah mpôl ntĭm rđău bôk nău rgop tâm nchră mrô 06, mpôl ntĭm rđău nkra rgâl hành chính mbơh ƀư ntrong kan “100 nuĭh ƀon lan mrô” ta lam xă Ea Yông. Nuĭh ƀon lan rnôk tât ôp ƀư ăp sam ƀŭt hành chính ta ntŭk ri dơi ndơ̆ êng sam ƀŭt rhăch nău trực tuyến gay n’hŭch prăk n’hanh n’hŭch mông nar”.

Nău mbơh ƀư ăp ntrong kan lĕ n’hŭch mông nar mkra du đêt sam ƀŭt hành chính gưl xă, phường. Nuĭh ƀon lan knŭng tât du tơ̆, kâp đêt mông gay sŏk. Ăp ntrong kan aơ mô knŭng kơl n’hao rnoh sam ƀŭt rhăch nău hành chính gưl xă, phường dơi mkra di mông, kơl nuĭh ƀon lan, doanh nghiệp n’hŭch mông nar, prăk kaih ƀư sam ƀŭt hành chính n’hanh hôm ndâk njêng rmôt cán bộ, công chức geh nuih n’hâm lĕ đah nău kan, nău rêh pah kan. Wa Nguyễn Thanh Vũ, Kruanh UBND nkuăl Krông Ana uănh dơn:

“Nău rgâl mhe ƀư sam ƀŭt hành chính, kruanh ăp ngih pah kan ntŭk kan ntĭm rđău ƀĭt joet ƀa ƀơ uănh nđôi, ntrŭt đă, cán bộ công chức ƀư tĭng nău kan kỷ luật kỷ cương hành chính, nkô̆ nău, nău ntrŭnh pah kan bah ngih pah kan ntŭk kan n’hanh uănh năl nău lah bah nuĭh ƀon lan mpeh nuih n’hâm pah kan kơt nău uănh nău ngơi đah nuĭh ƀon lan”.

Tĭng uănh lah ta “Rƀŭn nchră n’gul gâl 9 khay mpeh trong kan rgâl hành chính bah n’gor Dak Lak năm 2023”, yor nău lăp tâm ban, dŭt n’hâm bah ăp gưl nău kan, ntŭk kan năm bah năp lĕ kơl trong kan rgâl hành chính bah n’gor dơi rgâl, rhŏ an uĕh lơn nău ŭch bah nuĭh ƀon lan n’hanh doanh nghiệp. Nău wơt dơn, mkra sam ƀŭt rhăch nău sam ƀŭt hành chính mpeh tâm nău mât uănh bah n’gor dơi ƀư uĕh, n’hŭch rnoh mbrơi mkra sam ƀŭt rhăch nău; rhăt jăp ƀư tĭng nău dăn yô̆ nuĭh ƀon lan, rmôt kan rnôk geh mbrơi. Kơp uănh an saơ, jêh mkra sam ƀŭt rhăch nău di nar, bah năp nar ta lam n’gor geh rlău 99%. Gay geh tay đah nău rƀŏng “Sŏk nuĭh ƀon lan n’hanh doanh nghiệp ƀư ta n’gul gay rhŏ kan”, wa Nguyễn Tuấn Hà, Groi Kruanh UBND n’gor Dak Lak mĭn lah:

“Khay tât mbra ƀư du Rƀŭn nchră gay kơp uănhh tay ngăch ƀư kơt jêr jŏt geh mâp gay geh trong ntĭm rđău dôh rklaih. Tal 2 lah kơp uănh tay gay tâm ban ŭch rnoh sam ƀŭt hành chính dơi mbơh ta dữ liệu ngih dak. Tal 3 lah ƀư tơm tâm ôp tâm nchră an UBND n’gor sam ƀŭt ntĭm rđău mbơh ƀư ăp nău kan rgâl nkra hành chính bah aƀaơ tât lĕ năm 2023. Uănh lah lĕ rngôch ăp nău rhŏ kan nsum trực tuyến gay bah nĕ săch ăp naư rhŏ kan nsum ngăn ngên, ngăch dŏng âk, hăn ndrel đah nău ŭch nar bah nuĭh ƀon lan, doanh nghiệp”.

Nău Dak Lak nsrôih ntrôl hăn rgâl nkra sam ƀŭt hành chính dơi uănh njoăt rgâl khlay, nta an n’gor hun hao ngăch n’hanh nâp nâl, tâm di nău ŭch hun hao nsum tĭng Nghị quyết mrô 23-NQ/TW nar 6/10/2022 bah N’gâng kan Chính trị mpeh trong hun hao wăng sa-rêh jêng n’hanh đăp mpăn bri dak, rnă njrăng nkual Tây Nguyên tât năm 2030, uănh tât năm 2045./.