VOV4.M’nông: Tâm nau lơh njrăng rdâng srê Covid-19 tâm Dak Lak, ndrel ma nau nsôih bah rmôt nŭih nai dak si hôm geh nau rgop n’hâm mô đê̆ bah ăp nŭih tĭng chroh ŭch hăn kơl an. Lôch tâm 4 khay ma aơ, khân păng hŏ tât tâm ngih dak si Dã chiến ndrel ntŭk nkhah săm nŭih ntưp srê Covid-19 jâk tâm ngih dak si Đa khoa nkuăl Tây Nguyên gay ma kơl an ăp nai dak si, bonh đă, mât chăm ân F0 rlet bah srê.

Răk kloh săk ân nŭih ntưp srê Covid-19 tâm ntŭk săm nŭih ji jâk jru tâm Ngih dak si Đa khoa nkuăl Tây Nguyên lah nau kan ăp nar bah rmôt nŭih hăn kơl an bah dòng sơ bu ur Vương Hoà Bình, nkuăl ƀon têh Buôn Ma Thuột, n’gor Dak Lak tâm lôch 4 khay ma aơ. Sơ Nguyễn Thị Thanh Huyền mbơh, ndrel nau kan mât chăm nau ngêt sa, ntop ndơ sa, kơl răk ân nŭih ji...ăp nŭih hăn kơl an kŏ bonh đă nuih n’hâm, kơl an ăp nŭih ji bah nau ji:

‘Saơ nau kan aơ geh nau khlay, geh nau m’ak, bol ma nsoh kho ao njrăng săk kơt aơ păng rgănh ngăn, yơn lah gâp saơ moh nau nơm dơi ƀư ân nŭih ji, nơm kơl an bu dơm. Khân păng lăp ta aơ ri saơ geh rngot êng ngăn, khân păng khĭt êng du hê geh nau mĭn nê, yơn lah geh nơm êp aơ, nơm bonh đă, kơl an, răk ân ri khân păng hôm geh nau rhơn geh nŭih kơl an khân păng. Ăp sơ pah kan ta aơ uănh kơt lah băl mpôl nơm, nơm pah kan ueh ma mô geh jâk rgănh”.

Hôm đah sơ Lê Thị Thịnh, ăp nar pah kan ta ntŭk săm ân nŭih ntưp srê Covid-19 hŏ kơl an ăp nŭih saơ geh kloh lơn nau ji, nau mô ueh mpeh nau mĭn bah nŭih ji du trong ngăn ngên. Nau leo tât nau rhơn, nau ueh lăng ân ăp nŭih dôl ma ăp nar nsôih rklaih nau ji păng geh nau khlay ngăn đah nŭih hăn kơl an:

‘Dŭt n’hâm khlay, yor nơm saơ geh nau kơl an geh âk nŭih mô lap ndrel khân păng ŭch nơm kơl. Saơ aơ lah ăp nŭih oh nô nơm ma khân păng mâp nau jêr rlau ma nơm ri nơm geh n’hâm soan nơm mra dơi hăn kơl an ân khân păng, moh nau ma nơm dơi ƀư”.

Ndrel ma nau săm ân ueh bah rmôt nau dak si, nau kơl an ueh bah ăp nŭih hăn kơl an hŏ kơl ân nŭih ntưp srê Covid-19 ndrel nŭih tâm rnăk vâl nŭih ji ueh tâm nuih n’hâm. Wa Nguyễn Xuân Tưởng, tâm xã Ea Nam, nkuăl Ea H’Leo mbơh, 10 nar gŭ mât chăm ân păng, saơ ăp nau kan ƀư geh nau khlay bah ăp sơ, wa dŭt n’hâm rhơn ngăn. Ăp sơ pah kan ndơn ma nŭih rnăk vâl nŭih ji, lôch n’hâm mât chăm, bonh đă nuih n’hâm khân păng:

‘Ta aơ geh sơ lăp răk kloh ân nơm, tơh ân bỉm ân nơm, lah nsum ri răk kloh ân ăp nŭih kơt nê da dê đŏng”.

Tĭng nai dak si Nguyễn Văn Tính, Chuyên khoa hồi sức cấp cứu, nau kơl an bah ăp nŭih hăn kơl lah nau ueh khlay, kơl an nŭih ji n’huch nau jâk mpeh nŭih lăp kan. Ăp nŭih hăn kơl hŏ ndrel ma dôl ƀư ăp nau kan bah ăp nai dak si, hộ lý tâm mpeh bôk năp njrăng rdâng srê Covid-19, kơl an ntŭk kan dak si ƀư ueh lơn nau săm. Nai dak si Nguyễn Văn Tính ân lah, êng nau săm đah dak si, ri săm đah nau ŭch rŏng, đah nuih n’hâm geh nau ueh đŏng ma nŭih ji ntưp srê Covid-19:

‘Kơl an âk ngăn ro. Tal bôk năp lah ăp sơ mât chăm ân nŭih ji ntơm bah nau ngêt sa, tât nau răk kloh săk jăn, jêh ri lŏ bonh đă nuih n’hâm đŏng. Ăp nau kan bonh đă nuih n’hâm ân nŭih ji păng geh nau khlay ngăn bu uănh tivi bu saơ khĭt âk ngăn, ri bu mô gĭt ntă jŏ lah tât nơm ri bu klach ngăn, geh ăp sơ bonh đă khân păng”.

Tâm nau kan rlet rlau nau ji srê bah ăp nŭih ntưp ma srê Covid-19 tâm ngih dak si Đa khoa nkuăl Tây Nguyên, êp ăp nŭih hăn kan nsum bah ăp nai dak si, hôm geh nau pă nau rŏng bah ăp tu sĩ. Nau ŭch rŏng nê hŏ ntrơn jêng nau ueh đah ăp nŭih ntưp ma srê Covid-19

Bah năp nê, rnôk nau tât bah srê ji Covid-19 hôm mâp nau jêr ndrel khuch hô, nŭih Công giáo tâm Dak Lak kŏ geh âk nau kan kơl an ân ăp rnăk vâl nŭih mpa nau khuch. Mục sư Lemous Philemol, Kryang Rnâng kan ntoh măt ân Tin lành n’gor Dak Lak ân gĭt: êng ăp nau nklâm ndơ bah ăp nŭih ƀon lan tâm nkuăl geh srê, Rnâng kan tnoh măt Tin Lành Dak Lak kŏ pă nklâm ndơ bah ăp Uỷ van dak si rêh jêng Rmôt chroh Tin lành Việt Nam Miền Nam ân ăp rnăk vâl geh nŭih ntưp srê F0, F1 tâm Dak Lak lah ăp nklâm phe, geh rnoh dĭng lĕ lah 300 rkeh ndrel kơl an ăp F0, F1 bơi tât 400 rkeh. Rnâng kan ntoh măt mro nkah ăp Chi hội Tin lành lam n’gor ƀư nau kan ân rjăp nau bonh đă bah 5K bah N’gâng kan dak si ndrel ăp nau kan njrăng rdâng srê. Nkre ndâk rmôt “Nai dak si Luca” kơl mbơh n’hâm soan Online ân ăp nŭih mô lap geh ntưp nau ji srê Covid-19./.

Nŭih rblang: H’Thi