VOV4.M’nông: Ăp nar aơ, ƀon nkao Xóm đảo ta nkuăl têh Buôn Trấp, nkuăl Krông Ana, n’gor Dak Lak lĕ jêng n’gŭr răm lơn. Tĭng ăp nuĭh tơm mir, năm aơ âk jay mir lĕ janh n’hao rnoh neh nkao tết nkôp đah ăp năm. Trôk nar uĕh, rnoh khlay đăp mpăn n’hanh hao đêt jêng nuĭh tăm dŭt rhơn.

Leo bu nuĭh rwăt chop khâl mir nkao tăch tết, nô Hoàng Yên, ta tổ dân phố 7, nkuăl têh Buôn Trấp, nkuăl Krông Ana, n’gor Dak Lak an gĭt, lĕ rngôch ăp mbôr nkao lĕ geh nuĭh nchăm, đêt nar tay mbra jao an. Yan nkao tết năm aơ, nô Yên tăm 3 sào nkao cúc n’hanh lay ơn ăp ntil, hao rlău n’gul nkôp đah ăp năm. Bôl tâm nău chôt srê Covid-19 geh jêr jŏt, yơn đah n’hâm rwăt aƀaơ, nô Yên hôm e mĭn đah nău ŭch ntŭk tăch nkao tâm rơh tết nguyên đán năm aơ.

          “Lah nsum năm aơ trôk nar uĕh lơn ăp năm jêng năm aơ mpôl hên ƀư âk lơn ăp năm. Bôk năp ri bah rằm khay 10 n’hanh răm khay 11 âm lịch rnoh khlay nkao âk mpôl hên rhơn ri tĭng gâp nchroh tết aơ nkhao mbra hao đŏng”.

Nuĭh năch tât mir nkao gay nchăm rwăt nkao tết

Hao rnoh neh tăm nkao tết nkôp đah ăp năm, wa Trần Đình Sang, Kruanh rmôt kan ndrel tăm nkao nkuăl têh Buôn Trấp an gĭt, bah 1 khay bah năp, âk nuĭh rwăt lĕ tât nchăm rwăt tât mir, rnoh khlay hao lơn ăp năm. Mô knŭng rnăk wa, âk nuĭh êng tâm rmôt kan ndrel lĕ janh n’hao rnoh neh nkao tết gay tâm di nău ŭch ntŭk tăch. Aƀaơ, ƀon nkao Xóm đảo, ta tổ dân phố 7, nkuăl têh Buôn Trấp dơi hao leh “mir nkao” têh ngăn nkuăl Krông Ana. Ndrel đah hun hao nău kan tăm nkao, ăp mir hôm tâm rgop ƀư ntrong kan “ƀon nkao sinh thái” gay an nuĭh ƀon lan, năch tât uănh nsong, khâl nkao n’hanh chŭp rup, jêng ntŭk pâl nđaih, kơl kônh wa ntop tay nău geh tâm rơh Tết. Wa Trần Đình Sang lah:

          “Aƀaơ hin jay gâp tăm 4 sào, dŭt âk lah nkao cúc ăp ntil n’hanh nkao lay ơn ăp ntil, âk màu. Aƀaơ tết rmôt kan ndrel mpôl hên kônh wa lĕ nchăm tâm rơh tết dŭt âk njêng tâm rơh tết tât mbra mô tŏng ndơ yor tâm rơh bah năp yor srê âk jêng kônh wa ta ăp nkual n’hŭch đêt tăm nkao yơn rmôt kan ndrel mô klach ntop hao tay rnoh neh n’hanh aƀaơ ăp jay ntop hao tay rnoh neh tăm”.

Siăt nkao jao an nuĭh chrai

          Ndâk njêng bah dŭt năm 2018, Rmôt kan ndrel tăm nkao nkuăl têh Buôn Trấp aƀaơ geh 14 nuĭh, dĭng lĕ rnoh neh tăm nkao bơi 3 ha. Mô knŭng tăm nkao tăch tết, ăp nuĭh hôm way tăm nkao rhŏ an ntŭk tăch ăp nar rằm, lễ, đah âk ntil nkao kơt cẩm chướng, cúc, lay ơn, đồng tiền. Tĭng wa Nguuyễn Xuân Hậu, Kruanh Hội nông dân nkuăl têh Buôn Trấp, nău kan tăm nkao lĕ kơl âk rnăk geh prăk đăp mpăn, mât uănh nău geh bah ƀon lan tâm hun hao nkra njêng, tăch rgâl. Nău luh bah rmôt kan ndrel tăm nkao nta uĕh an nuĭh ƀon lan nău gĭt tơm prăk, râng ăp jrô tiăr nti kỹ thuật, bah nĕ kơt dŏng khoa học công nghệ tâm nkra njêng, tăch rgâl.

          “Mpôl hên rgum ndâk ƀư rmôt kan ndrel nkre rgop prăk nta an nău kan an kônh wa ta aơ n’hanh nkre đă Hội nông dân ăp gưl nta an ăp rơh tât khay puh ri mpôl hên ntrôl dăng trong kan mpla nsơ ăp ndơ ta ăp trang mạng xã hội kơt tâm ăp trong mbơh nu nău gay m’hâm ƀơ kơl tăch ndơ an kônh wa”.

          Jêh âk khay rngot rngăt yor khuch srê, ăp nău mbơh uĕh bah ntŭk rwăt nkao tết lĕ kơl nuĭh tăm nkao ta nkuăl têh Buôn Trấp, nkuăl Krông Ana, n’gor Dak Lak rhơn tay. Trôk nar uĕh, rnoh khlay đăp mpăn nsĭt tay an kônh wa kâp đah yan nkao tết dơi geh, tăch peh khlay.

          Nuĭh rblang: Y Sưng Phê Ja