VOV4.M’nông: Rơh thi tốt nghiệp THPT năm 2022 nar lơn ma dăch, srê Covid-19 hôm geh tât jêr, ăp ngih săm ƀŭt TPHP tâm n’gor Dak Lak dôl ma ntĭm nti gay ma ƀư jêh nau kan bah năm nti. Ngăn lah nau kan nchrăp nau blau ân kon se lôch gưl nti gay thi tốt nghiệp ndrel ăp nau săch lăp êp tât.

            Du năm nti mhe đah âk nau rgâl tâm rnôk geh nau tât, nau ntĭm nti ƀư jêng trực tuyến hŏ khuch ngăn tât nau ntĭm nti kŏ kơt lah nau mĭn bah kon se ngăn lah đah kon se jrâu 12. Gay kon se đăp mpăn lơn, ngih săm ƀŭt THPT Nguyễn Bỉnh Khiêm, nkuăl Krông Pách, n’gor Dak Lak hŏ ƀư âk nau ntĭm nti ueh, tâm di ma nau dôl geh bah srê ji. Tâm nê, ngih săm ƀŭt ntoh n’hao nuih n’hâm kan bah ăp nai nti kon se tâm jrâu. Nai Nguyễn Thị Thuý, nti môm Hoá học, Ngih săm ƀŭt THPT Nguyễn Bỉnh Khiêm, mbơh:

            ‘Nsôih joi ăp nau mhe tâm mạng, nau mhe gay ma tâm kơt ntĭm nti đah ăp băl tâm ngih săm ƀŭt gay ma ƀư jêh nau ntĭm nti ndrel đăp mpăn tŏng nau gĭt ân kon se. Jêh nê, đah ăp nau ƀư, nsing tâm nau mĭn bah ăp nau gay ma mbơh jă kon se geh nau gơih tâm nau ntĭm nti lơn đah nau nkhôm điểm, mô lah ăp nau ntĭm nti ân kon se pâl nau ueh gay kon se bah loi nau dil ndrel geh nau gơih lơn yâm nau ntĭm nti gay đăp mpăn ân nau thi rơh tât bah oi nau khuch”.

            Đah kon se nti jrâu 12 ngih săm ƀŭt THPT Lê Hữu Trác, nkuăl Cư M’gar, bol ma nar rlu nti gay ma njrăng rdâng srê Covid-19 jŏ jong, yơn nau kan, rgâl mhe bah nai nti kơl kon se ueh lơn nau ŭch nti. Oh Hoàng Thị Minh Châu, kon se nti jrâu 12 A1, mbơh:

            ‘Ăp nai ntĭ nti ndrel ngih săm ƀŭt pơk trong nơih ueh ngăn ân kon se nti kơt lah ngih săm ƀŭt vay ôp ăp nau kan mpeh nau ntĭm nti dnrel nau njrăng rdâng srê ji đŏng. Ăp nai nti bộ môn ndrel nau nti chủ nhiệm dŏng âk mông gay bah dih mông nti gay ma mbơh ăp nau ôp bah kon se ri ma mô geh nau jêr ir ôh”.

            Lam n’gor Dak Lak geh 59 ngih săm ƀŭt THPT, tâm ne êgh 48 ngih săm ƀŭt ân kon se jrâu 12 tât nti tâm ngih săm ƀŭt. Hôm e lah kon se nti trực tuyến, ngăn lah kon se tâm nkuăl ƀon têh Buôn Ma Thuột ndrel nkuăl Krông buk. Wa Phạm Đăng Khoa, Giám đốc N’gâng kan ntĭm nti Dak Lak mbơh, nsing tâm nau dôl geh bah nkuăl, ăp ngíh ăm ƀŭt ƀư nti ueh, đăp mpăn mông nti, nkô̆ nau nti, nkre đăp mpăn n’hâm soan ân kon se, nau nti. Êng đah kon se jrâu 12, ăp ngih săm ƀŭt năl lah nau ntĭm nti bah kon se gay ma geh nau nti ntop tay ăp môn thi tốt nghiệp. Wa Phạm Đăng Khoa, ngơi:

            ‘Phung hên ntĭm nti ăp ngih săm ƀŭt THPT ndâk ƀư ăp bộ đề gay kơt uănh nti ăp bộ đề bah N’gâng kan ntĭm nti gay ma ƀư thi rlong ndrel uănh nau ueh nâp bah ngih săm ƀŭt. Nkre bah nau tă geh nê geh nau ƀư ôn thi ân ăp oh, đăp mpăn gĭt kloh nau blau gay ma râng thi tốt nghiệp dăch tât”./.

Nŭih rblang: H’Thi