Dôl ma rep ndrung ndrel ân be sa, nô Nay Y Than, rnoi Jrai, tâm ƀon Dang, xã Ea H’Leo, nkuăl Ia H’Leo, n’gor Dak Lak mbơh, aơ lah be yor Công an nkuăl Ea H’Leo pă ân bah bôk nau kan “Srih kon ntil leo trong ueh ân nŭih tă tih’ ntơm bah n’gul khay 7 năm aơ.

Djăt nau bu jă, bah rnôk aơ 9 năm, nô Nay Y Than tăch neh, ngih, leo ur hăn tât bri Drôn jêh nê geh nŭih bu leo hăn tât Thái Lan gŭ. Ntôn lah geh nau rêh ueh, yơn yor mô blau nau ngơi, mo geh kan pah, mô tŏng rêh ri ma mâp âk nau jêr. Geh n’gâng kan kơl sĭt ƀon ndrel mbơh, nô saơ nau tih bah nơm ndrel nsôih ƀư tay. Nô Nay Y Than, nkoch:

‘Năm 2014 gâp djăt nau phung mhik, hăn sĭt bu tât Thái Lan, geh công an nkual kơl an ri ma gâp sĭt Việt Nam ri gâp saơ nau gâp ƀư lah nau tih, ntơm jêh aơ gâp nsôih rêh ân ueh, rêh ma kônh wa, ƀon lan. Rnôk aơ công an nkual, n’gor pă ân be ri gâp rhơn ngăn, geh be gay ma nơm nsôih rong, hun hao văng sa”.

Ndrel ma rnăk nô Nay Y Than, hôm geh 5 rnăk ndơn ba bah nau kan “Srih kon ntil leo trong ueh ân nŭih tă tih’. Aơ lah rnăk mâp nau jêr geh băl mpôl hăn gŭ du der, ăp nŭih geh nau tih gay ma sĭt ndâk tay nau rêh. Prăk pă rong be bơi tât 100 rkeh, yor công an nkuăl Ea H’leo bonh đă rgop ndrel jă nŭih geh nuih n’hâm lŏng kơl an.

Bah năp nê, tâm năm 2021, đah nau ƀư aơ, công an nkuăl Ea H’Leo kŏ pă 10 mlâm be ân ăp rnăk, gay kơl ƀon lan hun hao văng sa. Tât rnôk aơ, ăp rnăk geh rlau 30 mlâm be, nau rêh ueh, rklaih ach o ndrel pă be ân ăp rnăk jêr lơn tâm ƀon.

Mô êng pă be ân ƀon lan, ăp khay, cán bộ, tahen công an nkuăl pă tât ăp thôn, ƀon, râng rƀŭn nsum gay gĭt nau kan, ndâk nau tâm boh, pă ân phe, mì tôm ndrel ndơ ân kônh wa jêr jŏt. Âk cán bộ hôm nti nau ngơi rnoi mpôl đê̆ gay ma blau nkoch nau, mât đăp mpăn ân ƀon lan. Wa Nay Niết, rnoi Jrai, ƀon Cham, xã Ea Sol, nkuăl Ea H’leo nkoch:

‘Công an nkuăl vay pă phe, mì tôm ân ƀon lan. Khân păng vay tât khala, bonh đă ân ƀon lan, ngăn lah ăp rơh rƀŭn ƀon lan, tă bah công an, kruanh ƀon kŏ bonh đă, mbơh nau ân ƀon lan. Nŭih ƀon lan nsôih, gơih pah kan jan sa, hun hao văng sa, mô djăt tĭng nau phung mhik mô lah geh nau ƀư tih pháp luật”.

Gay ma hăn ndrel tâm nau rêh bah nkuăl, công an nkuăl Ea H’leo tâm rtgop ma n’gâng kan ƀư nkoch trêng, bonh đă ƀon lan ƀư nau kan ndâk rnăk vâl văn hoá, ndâk njêng ƀon lan mhe. Công an kŏ tâm rgop ma ƀon tâm n’ur njroh mprơ, thể thao gay n’hao nau tâm rnglăp. Wa Y Suê Ksor, Mục sư mât Chi hội Tin lành Ea Sol, nkuăl Ea H’Leo, mbơh:

‘Hăn ndrel đah ƀon lan ri công an tâm xã, nkuăl tâm rgop nkoch mbơh tâm hội tánh lah rnăk vâl hôm geh phao bleo ndrel ndơ troh tâm ngih ri ndŏ lơi ân công an gay ma mât ân ueh ân săk nơm ndrel rnăk vâl, der ăp nau tât khuch. Kŏ nkoch ân ƀon lan mpeh nau ƀư ăp nau ntrŭnh kơt ncho ndeh ân mbrơi tĭng nau ntrŭnh, ndâu môk n’gang bôk rnôk hăn tong. Bonh đă ƀon lan pah kan, hun hao văng sa, ndâk njêng nau rêh nar lơn ma nâp ndrel hun hao”.

Tĭng Thượng tá Nguyễn Công Hoà, Kruanh công an nkuăl Ea H’Leo, hăn ndrel hun hao văng sa, mât đăp mpăn ndrel ndâk njêng nau rêh văn hoá lah 3 nkô̆ tơm bah nau kan “3 hăn ndrel” geh Đảng uỷ công an nkuăl ƀư ntơm năm 2021 tât rnôk aơ. Nau kan ndơn geh nau kơl an bah tahen bah rmôt. Ăp nau kan rgop njêng tâm bih ueh đah công an ndrel ƀon lan, kơl an nau mât đăp mpăn tâm dâng geh ƀư lơn ma ueh:

‘Nau kan bonh đă rnôk aơ lah nau ƀư mro, geh âk nau kan, tâm nê geh nau kan ‘3 hăn ndrel” hŏ geh ƀư ndrel hun hao ueh ngăn. Công an nkual kŏ rgum ăp tu tơm bah rmôt kơl kŏ kơt lah rgop êng gay ma rvăt be, phe, mì tôm ndrel ndơ êng đŏng. Nau kan aơ ntoh nuih n’hâm ueh rŏng bah rmôt công an đah kônh wa ƀon lan gay bah oi nau jêr’.

Ntơm bah nau kan tâm dăch ma ƀon lan, tâm dăch ma tâm dần, công an nkuăl Ea H’Leo hŏ nchrăp sŏk phe, ndơ sa, ndơ kơl, bonh đă, mbơh ma ƀon lan sŏk pheo bleo, ndơ rtoh ăp ntil gay ma rgâl. Rnơm ma nê, ƀon lan hŏ leo êng ma rbăn n’gar phao nkra êng, ndơ rtoh âk ntil. Ăp nau kan bah công an nkuăl Ea H’Leo mro geh rđau kan công an n’gor Dak Lak rnê pêh, geh âk rmôt tâm n’gor kơt ndrel pơk hvi, rgop nau mât đăp mpăn rnă njrăng tâm ƀon lan./.