Ta Cư Mgar, n’gor Dak Lak trong leo mpêt nkrem “Mât sŭr uk” njêng tơm prăk âk hang rmen prăk ăp năm. Lôch nê, kơl âk rnăk jêr jŏt ta ăp ƀon lan geh suan ntrôl wăng sa, klaih rlău ach o.

         Ut du nchăp pih lăp tâm n’gar ndrôk Y Hen Niê, ta buôn Yông B, xã Ea Drơng, nkuâl Cư Mgar rhơn nđơr an gĭt, aơ lah “Tơm ndơ” kơl rnăk nô klaih rlău ach o tâm kêng dŭt năm e nơhl. Bah 7 năm bah năp nơh, rnăk nô dơi nkuâl ntop kơl 40 rkeh prăk gay ƀư jay tâm rnglăp. Du năm bah kơi nê, Ủy ban Mặt trận tổ quốc xã ntop kơl tay prăk rvăt ndrôk me deh kon. Ăp năm deh kơt nê 6 năm aơ, rnăk nô mât chăm deh rơ̆ 5 mblâm ndrôk, ndăn sŏk ăch poh an mir tơm cà phê. Ur sai nô tâm nchră mât chăm wăng sa, mât nti kon gay đăp mpăn nău rêh.

          “Ntơm nơh jêr jŏt, ach o krit jêr ngăn, dơi geh nău mât ŭanh bah Ngih dak, pă an ntil ndơ mât kơt sŭr, ndrôk, ntop kơl ƀư jay gŭ. Đah nău mât ŭanh nê ri rnăk ur sai oh kon nar lơn ma jăp gơih wăng sa, nsrôih nsan hao. Ur sai gâp nsrôih rgâl geh wăng sa, ntop joi tay bah dih gay hun hao wăng sa n’hanh nău rêh uĕh lơn. Gâp lah uĕh ăp gưl hŏ uănh khlay”.

          Klaih rlău “ach o” bah kêng dŭt năm e nơh, rnăk yuh H Blip Niê ta buôn Yông hŏ ntuh kơl rvăt tay 7 sào neh mir tăm cà phê gay rgâl geh wăng sa. yuh H Blip nkoch, dơi geh nău rgâl nê lah nơm geh Mặt trận tổ quốc xã ntop kơl 3 mblâm be deh kon bah kêng dŭt năm 2017.

          Rnăk gâp ntơm nơh jêr jŏt ngăn, mô geh neh tuch tăm jêng dŭt ach o. dơi geh ngih dak ntop kơl be ntil ri gâp nsrôih mât chăm an be deh kon gay mbrơi mbrơi bah ir jêr jŏt đŏng, sŏk tơm prăk rgum ntêm hôm manh tay gay rvăt neh mir, tăm cà phê n’hanh mbrơi mbrơi pơk hvi neh tuch tăm gay nsan hao klaih rlău ach o đŏng.

          Trong leo mpêt nkrem mât sŭr uk dơi rêng lam nkuâl Cư Mgar đŏng đah nău tĭng ƀư bah cán bộ, đảng viên n’hanh ƀon lan đŏng. Dơi pơk hvi ta ăp mpôl kan hội, nsum mpôl. Wa H Núi Niê, Groi kruanh Hội liên hiệp bu ur nkuâl Cư Mgar an gĭt, hội bu ur rgŏ jă trong leo ƀư mpêt nkrem mât sŭr uk đah rnoh mpêt nkrem ntơm bah 1.000 tât 20 rbăn prăk ăp khay, dơi oh yuh nđơr kơt tĭng ƀư.

          Tâm ăp năm rlău  aơ ri rgŏ jă ăp chi hội geh dŭt đêt 1 trong ƀư mpêt nkrem, tâm  nê geh trong leo ƀư mpêt nkrem “Mât sŭr uk” lah dŭt ntoh lư. Ma nău kan dja ri pơk hvi dŭt âk trong ntĭt leo đŏng, tâm nê geh nklăp 60% oh yuh lah ƀon lan rnoi mpôl đê̆ tĭng trong kan dja.

          Đah nău ŭanh khlay tĭng ƀư bah lam trong kan chính trị, trong leo ƀư mpêt nkrem mât sŭr uk hŏ jêng trong leo rêng lam nkuâl Cư M’gar, njêng tơm prăk têh geh tât hang rmen prăk gay an ƀư ntop kơl rnăk ach o, dăch kêng ach o n’hanh rnăk geh nău rêh jêr jŏt. Nơm geh kơt nê, tât aƀaơ, rnoh âk rnăk ach o tâm lam nkuâl hŏ hŭch âk, hôm nklăp 4,4%, rnăk dăch ach o hôm nklăp 7,5%, rĭng geh tĭng bôk nuĭh geh rlău 59 rkeh prăk/nuĭh/năm. Nău rêh nuĭh ƀon lan nar lơn ma dơi rgâl geh. Wa Y Wem Hwing, Groi kruanh UBND nkuâl Cư M’gar an gĭt:

          Nău mât chăm nău rêh drăp ndơ n’hanh nuih n’hâm nsum mpôl lam ƀon lan ăp rnoi mpôl đê̆  ta nkuâl Cư Mgar ri nkuâl way uănh khlay n’hanh ndơ̆ luh lah ngoăy tâm  ăp nău dơn kan khlay bôk năp gay mât chăm nău rêh drăp ndơ, nuih n’hâm bah nuĭh ƀon lan, lơn lah ăp rnăk ach o, rnăk dơi kơl n’hanh ăp rnăk jêr jŏt, tĭng nău mĭn rđău đă lah mô an  geh du hê ndul êng bah kơi. Ƀư jăp pah kan nkoch trêng trong nchrăp, gung trong bah Đảng, trong kơl pháp luật bah ngih dak an nuĭh ƀon lan. Têk ndrêng, rƀŏng trong mĭn, gung trong, lơn lah đah ăp nuĭh lăn tă geh tih trong hăn gay khân păng gĭt di n’hanh kan di gay rgop ƀư nuĭh ƀon lan uĕh tâm nău rêh.

          Trong ƀư dơh, ăp rnăk djăt ma mpêt nkrem bah 1.000 prăk ăp khay yơn hôm nsĭt tay nău dơi tam lah suan ntrôl dăng gay ntop kơl ăp bôk nău kan đăp mpăn lam rêh jêng kon nuĭh ngăn ngăn. Ăp trong leo mât sŭr uk ta nkuâl Cư Mgar hŏ rgop đăp mpăn nău rêh âk rnăk ta ntŭk, lơn lah nuĭh rnoi mpôl đê̆ mpeh rnăk ach o, rnăk dăch kêng ach o n’hanh geh nău rêh jêr jŏt mha êng. Ntơm bah nê, khân păng lơn ma nsing nơm lơn tâm trong nchrăp, trong kơl bah Đảng, rvăt nău pah kan jan sa mir ba, nsan hao klaih rlău ach o, rgop hun hao wăng sa ta ntŭk.