Tâm rnôk dja, ƀon lan kan lŏ mir Dak Lak dôl nchrăp lăp tâm khay klêh cà phê năm 2023 – 2024. Ndrel đah nău rhơn cà phê jŭr geh, rnoh khlay hao, nuĭh tăm ta n’gor dôl hôm geh ăp nău rvê êng êng rvê nău mô geh  nuĭh klêh, rvê nău ntŭng rmuănh cà phê…. Gay đăp mpăn khay klêh, săk rnglăy uĕh, n’gâng kan dơi kan n’hanh kônh wa dôl nsrôih an ƀư ăp trong mât drăp ndơ khay klêh cà phê năm aơ.

Wa Y Bhăng Mlô, xã Ea Tul, nkuâl Cư M’gar geh 1,5 ha cà phê dôl tâm rnôk klêh play ta nkual dŭt buôn Sah A, kâng n’har đah xã Cư Dliê M’nông. Aơ lah nkual ngai ntŭk ƀon lan gŭ, ăp năm bah năp nơh way geh bu lăp ntŭng cà phê dŭm rah. Wa Y Ƀhăng nkoch, rhuăt luh nău tă ơm gĭt kan ăp năm bah ăp nơh, năm aơ ăp rnăk geh cà phê ta nkual dja  lor nchrăp kan nsum đah công an xã njêng ntŭk gŭ kâp njrăng mir cà phê. Ăp nar ƀư rsong hăn mbro, kâp chăm, mât njrăng cà phê ta mir lơn lah tâm bri măng. Yor kơt nê̆, nô nău roh ntŭng cà phê dŭm rah hŏ mô hôm geh tay. Wa Y Bhăng Mlô lah:

“Ntŭk kâp njrăng mpôl hên geh 2 hê nuĭh ƀon lan kan nsum đah mpôl công an xã, djăt ma tât măng lah oh nô hăn rsong hăn ta nkual  kâng n’har đah xã Cư Dliê M’nông đah xã Ea Tul hăn gŭ kâp chăm bah măng tât 9h hôm sĭt rlu rlău du ƀlât tât 11h mô lah 11h30 măng hăn tay n’hanh tât 1h – 2h ôi ri mơ sĭt. Ăp nuĭh ntŭng saơ oh nô kâp chăm n’hanh gŭ njrăng măng ri khân păng klach mô nănh lăp tâm mir ntŭng đŏng ôh.”

  Ea Tul lah xã geh rnoh neh tăm cà phê dŭt hvi ta nkuâl Cư M’gar đah rlău 2.000 ha. Thiếu tá Đặng Trọng Minh – Kruanh công an xã nkoch, xã geh 10 buôn n’hanh 1 thôn. Ăp thôn buôn aƀaơ dơi ntrŭp camera groi nđôi rnă njrăng n’hanh nô nău đăp mpăn mât nâp. Yơn lah, ăp năm bah năp nơh, ta ntŭk way geh ăp rơh ntŭng klêh cà phê ta mir đŏng, lơn lah ăp nkual ngai ƀon. Ta năp nău ngăn geh dja, công an xã hŏ nsŏng kơl an Đảng ủy xã njêng ăp ntŭk gŭ kâp chăm hăn rsong uănh gŭ kâp mât njrăng cà phê an nuĭh ƀon lan du bông khay klêh. Thiếu tá Đặng Trọng Minh lah:   

“Mpôl hên njêng ntơm bah 3- 4 ntŭk gŭ kâp chăm, ăp ntŭk gŭ kâp mât chăm ntơm bah 3 tât 5 nuĭh, gŭ ƀư ta ăp nkual way tăm cà phê, mô lah ta ăp ntŭk nuĭh ƀon lan mbơh roh, jêng lah ăp nkual ntoh geh bu ntŭng đă mpôl hăn nkra lơh dĭl. Nău kan bah công an lah n’gâng tơm, n’hanh hôm geh tay ăp n’gâng kan nsum mpôl tâm xã đŏng kơt: Ntơh măt dân quân xã, đoàn druh ndăm, hội nông dân, tahen ơm, mặt trận n’hanh lĕ ma nuĭh ƀon lan geh cà phê ndrel râng mât njrăng kâp chăm cà phê an kônh wa đŏng”.

Năm 2023 – 2024, lam n’gor Dak Lak geh bơi 213.000 ha cà phê, rĭng geh nchroh ntơm bah 2,6 – 2,8 tấn/ha, rnoh âk play nklăp 550.000 tấn, klêh mbro tât n’gul khay 1 năm 2024. Tâm rơh dja mbra geh nklăp 200.000 nuĭh kan ta ăp n’gor mpeh Bắc, miền Trung… tât Dak Lak dăn klêh cà phê. Tă bah rnoh nuĭh hao âk, rgum âk ndal du ƀlât, nô nău rnă njrăng đăp mpăn tât krit jêr.   

Thượng tá Phan Thanh Cường – Kruanh jrô kan Hình sự Công an n’gor Dak Lak an gĭt, tĭng ƀư nău rđău  đă bah Công an n’gor Dak Lak mpeh njrăng n’gang ăp ntil nuĭh tih ntŭng hôch cà phê năm aơ, njô kan hŏ nsŏng kơl an công an n’gor an ƀư ăp kôp ăp trong nkra kơt: Kan nsum đah công an ăp nkuâl, thị xã, nkual ƀon têh mât njrăng jăp ăp nuĭh tih ta ăp nkuâl mô an geh ăp nuĭh tih; đă nuĭh ntơh măt ăp ntŭk rgum rvăt ndơ tuch tăm ta n’gor mô rvăt cà phê rêh, cà phê mô gĭt kloh tơm luh tă bah ntŭng ndơ bu ma geh bah ăp nuĭh ntŭng rmuănh; nkoch trêng rgŏ jă nuĭh ƀon lan n’hao nuih n’hâm nkah njrăng, nsrôih rlăch ndăng, lah phong ăp ntil nuĭh tih gay njrăng n’gang bah ơm bah ngai, kan nsum đah ăp n’gâng kan ta ntŭk ƀư rsong hăn mât njrăng drăp ndơ bah nuĭh ƀon lan… Thượng tá Phan Thanh Cường nkoch du đêt nău dơn kan rgum tơm bah đơn vị tâm nău lơh mbram ăp ntil nuĭh tih tâm khay klêh cà phê 2023 – 2024.  

“Jrô Cảnh sát Hình sự hŏ lor nchrăp rdâk njêng trong nchrăp mbra rgum n’hanh ôp uănh tay ăp tŏng lam lĕ rngôch rnoh âk nuĭh kan bah ăp n’gor êng tât hăn kan thuê gay mât uănh, njrăng n’gang bah ơm bah ngai mô an ăp nuĭh ƀư tih pháp luật, ntŭng drăp ndơ mô lah lơh ndjơh drăp ndơ. Ntơm bah nê mât đăp mpăn rnă njrăng, gay nuĭh ƀon lan đăp mpăn klêh donh cà phê năm 2023 – 2024 dja.”