Rơh thi tốt nghiệp Trung học phổ thông gưl neh dak năm 2023 tâm pơh tât, lam n’gor Dak Lak geh rlău 21.000 nuĭh đăng ký râng thi ta 33 ntŭk thi đah lĕ rngôch 900 jrô thi. Đăp mpăn tŏng ăp tơm điện an rơh thi, ăp đơn vị điện lực Dak Lak hŏ ƀư hăn ôp uănh lam trong rse điện, rdâk njêng âk trong pă an điện an ăp ntŭk rhŏ dŏng rơh thi.

Tĭng nê, ăp đơn vị n’hao dăng hăn rsong ŭanh, mât nkra trong rse, trạm biến áp geh tât pă điện an ăp ntŭk in sao đề thi, ăp ntŭk ƀư thi n’hanh nkual chấm thi; tâm ban kơt kan nsum nkra ăp ntŭk geh ma nău tăch pruăt ndal tơm điện. N’gâng kan điện tâm pă mpôl kan gŭ kâp ndăng măng nar đah ăp tŏng ndeh rklư, ndơ dŏng, gay ntrŭp nkra ngăch lah geh ăp nău tât khuch. Nkre, ăp đơn vị điện lực lor nchrăp pah kan, kan nsum đah ăp nhih pah kan dơi kan ta n’gor gay n’hao dăng ăp trong mât rnă njrăng, đăp mpăn rhŏ dŏng an rơh thi.