Âk nau kan duh mpeh nau mô dơi nâp bah nau trok prăk ntuh kơl nsum, ndâk nkuăl ƀư nau tuch tăm geh rnoh mrô nkuăl tăm kơl an nau kan tăch luh, pă kan pah ân druh ndăm...hŏ geh ƀư nchră tâm rơh rƀŭn tal 5, HĐND n’gor Dak Lak gưl X, năm kan 2021-2026, geh ƀư tâm lơ 8/12.

Nchră tât nau ƀư nau kan năm 2022, ăp ntoh măt ân lah, nau nkoch mpeh văng sa rêh jêng bah lam n’gor Dak Lak năm aơ geh âk nau ntoh ang. Yơn lah, nau trok dŏng prăk ntuh kơl nsum ri dêh ir (knŭng geh 29,5%), nsum ma nê lah nau ƀư nau ntrơn rgâl ntop tay bah âk nau kan âk tŏ, nau nâp bah ăp ntŭk dŏng ƀư nau kan ê geh nâp nâl hŏ khuch đŏng tât nau rnơm bah ƀon lan kŏ kơt lah nau ndâk nsơm nau geh jêng văng sa jêh bah srê Covid-19.

Đah ma nau kan tuch tăm, ăp ntoh măt HĐND n’gor Dak Lak đă ân geh nchrăp luh âk nau kan, nau kơl an ngăn n’hêl gay ma kơl an ƀon lan tâm nau kan tuch tăm prêh mhe, pơk njêng luh nau tâm rgop nau kan đah ăp ntŭk kan tăch rgâl ndrel ƀon lan. Êp nê, ân geh rgum ngăn, ndâk nkra mrô nkuăl tăm âk ăp ntil tơm sa play, gay der nau kan tăm geh jêng âk ir, nau geh âk rlau ma nau ŭch dŏng tăch. Êp nê, ăp ntoh măt kŏ ntih luh du nau kan duh bah n’gor Dak Lak, kơt lah rkalih nau pă kan pah ân nŭih ƀon lan, ndâk nau kơl an, prăk khay ân ăp rmôt cán bộ tam dâng, n’hao nau geh, nau rêh gay ma nai ntĭm nti kon se đăp mpăn pah kan./.