Bah năm 2021 tât khay 9 năm 2023, du năm n’gor Dak Lak wăch rgum ntuh kơl geh 16 nău nchrăp ƀư, knŭng tâm ban 1/4 rnoh nău nchrăp ƀư dơi an tâm lvang 2016-2020. Tĭng rnoh kơp mbơh bah UBND n’gor Dak Lak, lvang 2016-2020, Dak Lak wăch rgum geh 319 nău nchrăp ƀư ntuh kơl ta ăp ntil nău, đah dĭng lĕ rnoh prăk 57.000 rmen prăk. Kơp rĭng tâm lvang aơ, du năm n’gor geh 65 nău nchrăp ƀư dơi an, đah dĭng lĕ rnoh prăk nklăp rlău 11.400 rmen prăk.

Yơn bah năm 2021 tât aƀaơ, lam n’gor knŭng geh 48 nău nchrăp ƀư dơi pă nău ntrŭnh an ntuh kơl, dĭng lĕ prăk 28.000 rmen prăk, rĭng du năm knŭng geh 16 nău nchrăp ƀư, dĭng lĕ rnoh prăk nklăp 9.000 rmen prăk. Nkô̆ nău bah nău hŭch nău nchrăp ƀư n’hanh ntuh kơl an n’gor tâm 3 năm bah năp lah yor srê Covid-19, nu nău wăng sa lam ntŭr neh n’hanh tâm dak geh âk nău rgâl; âk doanh nghiệp têh mâp jêr jŏt, tâm rnôk doanh nghiệp jêt n’hanh dah găp mô dơi njêng nău nchrăp ƀư têh, jêng tơm prăk geh hŭch.