Ăp ntŭk tơm doanh nghiệp mbơh rblang, nkô̆ nău aơ lah yor rnoh geh rmeh đê̆, tăch rgâl mô geh rmeh n’hanh rnoh xăng mô âk đŏng. Tĭng nău uănh năl bâh phóng viên, nar 31/1, nĕ lah nar 10 khay Giêng năm Quý Mão, kanŭng êng rgŏ trong Hồ Chí Minh ntŭk hăn rphot nkuăl têh Buôn Hồ, lĕ geh 2 ntŭk tăch pring xăng lah Appollo Oil mbrô 8 bâh công ty TNHH Tăch rgâl Hoàng Nam n’hanh ntŭk tăch pring xăng Hồng Quý 1 nchih mbơh lĕ xăng, pring.

Rgŏ trong Quốc lộ 29, ntŭk hăn let xã Tân Lập, nkuăl Krông Buk, geh ntŭk tăch pring xăng Rồng Vàng geh nchih mbơh lĕ xăng đŏng n’hanh mô hôm tăch. Tĭng nău mbơh bâh ntŭk kan mât uănh nău tăch rgâl Dak Lak, ntŭk kan lĕ geh gĭt nău mbơh du đê̆ ntŭk tăch rgâl pring xăng ta nkuăl Krông Buk n’hanh nkuăl têh Buôn Hồ lĕ pring xăng, mbơh ntâl mpông.