Bôk nău kan “Năm mhe n’har bri rhơn răm nuih n’hâm ƀon lan” tă bah tahen n’har bri Quảng Ngãi kan nsum ƀư hŏ tay năm mhe tât ơm lơn đah ƀon lan ăp rnoi nuĭh nkual n’har bri Quảng Ngãi. Bôk nău kan ƀư but săm ji, phăt dơm dak si, pă nklâm ndơ Tết tâm nđŭr njroh mprơ lăp nău tâm rnglăp tahen ƀon lan ntŭk n’har bri.

Ta xã Sa Loong, n’gor Quảng Ngãi khuh n’gôr mông nar wơt du năm mhe dŭt mha êng – Năm mhe n’har bri răm nuih n’hâm ƀon lan. Bôk nău kan tă bah Ban Chỉ huy Tahen n’har bri Quảng Ngãi kan nsum đah UBND xã Sa Loong ƀư, răm nău tâm rŏng tahen ƀon lan ntŭk n’har bri. Tahen n’har bri n’gor Quảng Ngãi đă ăp y, bác sĩ tă ơm gĭt kan âk hăn but săm, mbơh nti n’hanh phăt dơm dak si an kônh wa ƀon lan.

Wa Lường Thị Lá, gŭ thôn Hào Phú, xã Sa Loong, an gĭt:

“Gâp geh  ji hao duh mham, ji kô̆ mâk, ji nho jâng ti. Gâp hao tât ta aơ ri but săm, ri tahen n’har bri but săm an gâp, ri geh dak si. ăp nău ji bah gâp rnôk mbơh hao ri bác sĩ phăt dơm dak si đŏng. Bah rnôk Tết dja ri nklăp rhơn nđơr ngăn, tahen n’har bri, lah nsum lah gưl bah lơ uănh khlay ri gâp dŭt lah uĕh”.

Mông nar Tết lơn ma khuh n’gôr đah ăp nău kan nklâm bánh chưng, bánh tét n’hanh rơh tăch “dơm” ndơ. Ăp nuĭh tahen n’har bri ndrel kônh wa nklâm tĭng bánh, tĭng nklâm ndơ, nsĭt tât kônh wa ƀon lan du nar Tết răm mƀak.

Tâm bôk nău kan “Năm mhe n’har bri răm nuih n’hâm ƀon lan” năm 2026, Ban Chỉ huy tahen n’har bri n’gor Quảng Ngãi ndrel ăp đơn vị ndrel hăn hŏ ndơ̆ kơl 450 nklâm ndơ, rnoh khlay bơi 300 rkeh prăk an ăp rnăk dơi kơl, rnăk ach o n’hanh kon se geh nău rêh jêr jŏt mha êng. Pôih n’har bri Sa Loong hôm ntop kơl du rnăk ach o du mblâm ndrôk ntil, joi geh nău rêh gay kônh wa nsan hao klaih rlău ach o. Đại tá Trương Thiên An, Bí thư Đảng ủy, Chính ủy Ban chỉ huy tahen n’har bri n’gor Quảng Ngãi an gĭt:

Ma ăp bôk nău kan, Tahen n’har bri n’gor Quảng Ngãi hŏ rgŏ jă ntop kơl an nklâm ndơ Tết an nklăp 2.000 rnăk ƀon lan geh nău rêh jêr jŏt, rnăk ach o n’hanh rnăk dơi kơl lam n’gor; ntop kơl joi geh trong rêh an rlău 10 rnăk. Ăp mon kon se nti tâm bôk nău kan “Ndơl jâng oh tât nhih nti’, mpôl hên rgum ăp tơm ndơ ntop kơl, prăk măt gay ăp kon se geh ndơ rvăt năp tay kho ao, siƀŭt nchih kơt nti tay”.