Ta Hà Nội, Học viện Chính trị quốc gia Hồ Chí Minh kan nsum đah Tạp chí Cộng sản, Viện hàn lâm khoa học n’hanh Xã hội Việt Nam, Hội đồng lý luận Trung ương ƀư Tâm nchră khoa học gưl neh dak “Ăp trong nkra ndơ̆ Nghị quyết Đại hội XIV bah Đảng lăp tâm nău rêh”. Tâm nchră gay ntrŏng kloh lơn trong rƀŏng, nkô̆ n’hanh dăn đă ăp trong nkra n’glăp nsum, geh âk nău khlay khoa học, rgop ndơ̆ Nghị quyết Đại hội 14 bah Đảng lăp tâm nău rêh .

Lah ta rnôk ntơm pơk tâm nchră, GS. TS Nguyễn Xuân Thắng, Kruanh Hội đồng lý luận Trung ương an gĭt: Tâm nchră lah nău kan dŭt têh lor bôk năp gay ndơ̆ Nghị quyết Đại hội Đảng tâl XIV lăp tâm nău rêh. Bah aơ, gay đăm jru nău rđău đă bah Tổng bí thư Tô Lâm lah ân dâk kan dĭl lôch Đại hội, đah nuih n’hâm ndăn ngăch n’hanh ngăn ngăn, rgop tâm nău dơi ăp rnoh tât kan, nău dơn kan bah Đại hội Đảng tâl XIV.

Aơ lah tâm nchră lor bôk năp n’hanh he ân ƀư âk tâm nchră, tâm rkhăch way nkô̆, tâng jru tĭng nkô̆ nău. Tâm nê lĕ ma nkô̆ nău hun hao ngăch, nâp dăng tâm nô nău mhe; nkô̆ nău mpeh rnoh ngăch hun hao bar mbrô nkre đah njêng trong ntĭt leo hun hao mhe, ân geh tâm nchră tâng jru kơt nê̆. He ân geh ăp tâm nchră mpeh hun hao khoa học công nghệ, rgâl blău ƀư mhe yơn njônh uănh lah tĭng ƀư Nghị quyết nê, lơn lah NQ57, NQ59, NQ66, NQ68.. Uănh nsum lah geh 9 nău n’glêh an têh jong, ngăn ngăn nuih n’hâm siƀŭt nchrăp lor XIV. Nuih n’hâm bah siƀŭt nchrăp lor dăn đă Đại hội lah he ân nâp jâng chuat bah nâm lha cờ bah Đảng, nsum suan, du nuih n’hâm gay tât rnoh 100 năm, đah nuih n’hâm ƀư tơm êng têh jong, nsrôih ndôr êng, nsing nơm gay lăp tâm rơh hun hao mhe. Nău ŭch n’glĕ dŭt n’hao nău rêh rhơn răm bah ƀon lan.

Ta tâm nchră ƀư 2 rơh tâm rkhăch lah “Ndơ̆ nuih n’hâm mhe bah siƀŭt nchrăp lor dăn đă Đại hội XIV lăp tâm nău rêh ” n’hanh “Ndơ̆ bôk nău kan bah Đại hội XIV bah Đảng lăp tâm nău rêh”.

PGS.TS Dương Trung Ý, Tổng biên tập Tạp chí Cộng sản lah rjăp: Đại hội XIV lah Đại hội bah rgâl mhe dăng, đăt ndal mpeh nău mĭn, trong uănh n’hanh nău nđơr hun hao, lah Đại hội bah nău gĭt blău, nău mĭn n’hanh nău nsrôih têh đah ăp nău n’glêh an gay ndơ̆ neh dak nâp jâng chuat lăp tâm rơh hun hao mhe bah rnoi nuĭh. Siƀŭt nchrăp lor dăn đă dja ndơ̆ luh âk nău ŭch geh dâk kan mhe, lah hăn ndrel đah ƀư, ntrŏng kloh rnoh tât kan, nău dơn kan, trong nkra nkre đah nău dơn kan đah nău nsĭt geh ngăn, nkre đăt ndal đah nâp dăng, nkre tĭng ƀư đah di nuih n’hâm bah ƀon lan. PGS.TS Dương Trung Ý, nkoch kloh:

Ngăn an saơ, rnoh khlay bah Siƀŭt nchrăp lor dăn đă Đại hội mô dơn n’glĕ ta nkô̆ nău mĭn dơi nchih n’hanh nkoch tâm siƀŭt, ma lơn âk dơi uănh năl di tâm ngăn ngăn ƀư. Siƀŭt nchrăp lor dăn đă bah Đại hội dơn geh rnoh khlay n’hanh rêh rnôk dơi mpơl, đă tĭng ngăn jêng  trong kơl an di, leo ƀư geh nău tam, njêng luh nău rgâl ngăn ngăn tâm nău rêh chính trị, wăng sa văn hóa rêh jêng kon nuĭh, ta ăp trong kan njrăng n’gang neh dak, rnă njrăng, tâm boh dak bah dih bah neh dak n’hanh  mpơl nău rgâl dăng bah ngăn ngăn, ta nău hun hao mpeh nău rêh drăp ndơ, nuih n’hâm n’hanh n’hao âk nău nsing nơm bah ƀon lan đah Đảng, Ngih dak. Gay rgop ƀư jêng ngăn ngăn nău mĭn, rnoh tât kan, nău dơn kan tâm ăp siƀŭt nchrăp lor dăn đă Đại hội 14 bah Đảng, nău gĭt êng, đăm jru ăp nkô̆ nău mĭn nuih n’hâm mhe tâm Siƀŭt nchrăp lor dăn đă Đại hột 14 lah dŭt n’hâm khlay.

N’glôch jêh tâm nchră, PGS.TS Đoàn Minh Huấn, Giám đốc Học viện Chính trị quốc gia Hồ Chí Minh uănh năl: Tâm nchră mpơl dŭt năn ngăch, jăch ndăn, ring tam ngăch đah nuih n’hâm bah Trung ương rơh dja lah dâk kan, mô di rlău ăp njuat ƀư ndranh ma lăp sŏng tâm ăp nkô̆ nău tĭng ƀư Nghị quyết Đại hội XIV. Nuih n’hâm dâk kan bah tâm nchră mpơl kloh tâm nău rgâl trong tâm nchră n’hanh săk blău tâm nău rgop. Ăp đại biểu hŏ rgum tâm nchră mpeh ăp nkô̆ nău đăt ndal têh jong, ntơm bah rgâl mhe trong ntĭt leo hun hao, hun hao wăng sa êng bah dih ngih dak tât ăp nkô̆ nău njrăng n’gang neh dak đah tâm boh dak bah dih. Lah rjăp ăp nău dơn kan rgum tơm ân n’gluh an ƀư, wa  Đoàn Minh Huấn dăn đă ăp đơn vị ƀư tơm ân kan nsum nkoch trêng lôch jêh tâm nchră, nău dơi, nău dơn kan. Ntơm bah nê, ƀư jêng ngăn ngăn lôch jêh gŭ mĭn Nghị quyết Đại hội XIV bah Đảng tâm trong nchrăp, bôk nău kan bah tĭng nhih pah kan, đơn vị.

 Bah năp Đại hội ri râng nău rêh lăp tâm Nghị quyết. Lôch rnôk geh Nghị quyết hôm ri ndơ̆ tay Nghị quyết lăp tâm nău rêh. Aơ lah đah nkô̆ nău lý luận n’hanh ngăn ngăn, ri he uănh ta aơ: Ăp nkô̆ dơi mpơl tâm dja geh ăp nkô̆ nău khlay ta năp măt, glêh nar bah năm 2026, geh ăp nkô̆ nău bah drŭng jong năm kan, geh ăp nkô̆ nău trong uănh jŏ jong dơi nkoch tât nchră dŭt tâm di. Ăp nkô̆ nău đăt ndal têh jong dơi ri geh ăp nkô̆ nău mpeh jâng nsing an hun hao, geh ăp nkô̆ nău mpeh trong ntĭt leo lor, geh ăp nkô̆ nău mpeh dâk kan, ntơm bah dâk kan nsum tât dâk kan ta ntŭk tâm dâng.