Kêng măng 9/2, Tổng Bí thư Tô Lâm hŏ tât khâl n’hanh mbah rhơn tết Đảng bộ n’gâng kan ƀon lan, rnăk dơi kơl ntoh lư nuĭh geh n’hâm suan ta n’gor Tây Ninh. Pah kan n’hanh mbah rhơn Tết Đảng bộ, n’gâng kan n’hanh ƀon lan n’gor Tây Ninh, Tổng Bí thư Tô Lâm njuăl tât ăp kruanh rđău kan cách mạng ơm, ăp Me Việt Nam Dăng janh, ăp tahen dăng janh ƀon lan, nuĭh jăp blău kan, ndrel lĕ rngôch cán bộ, tahen n’hanh ƀon lan n’gor Tây Ninh nău ôp khâl, nău nkah gĭt jru n’hanh nău mbah rhơn năm mhe n’hâm suan ngăch lăng dăng soih, rhơn răm, geh nău dơi. 

Tổng Bí thư nkoch kloh, ntơm bah aơ tât năm 2030 n’hanh ngai lơn lah tât năm 2045 geh nkô̆ hôr ntơm pơk đah nău hun hao bah neh dak. Tâm njăr trong hăn nê, Tây Ninh geh nkô̆ dŭt khlay, mô dơn đah nău hun hao bah êng n’gor, ma hôm đah lam nkual n’hanh lam dak đŏng. Tây Ninh geh ntŭk gŭ lah mpêr n’gar nâp ta ntŭk n’har bri, nkre lah kô̆ nthoi ntêng lêng đah Đông Nam Bộ n’hanh Tây Nam Bộ; nkre lah ntŭk mât ndray đăp mpăn, bah tâm lơh tâm su, tâm rnglăp nkre lah ntŭk hun hao mhe mpeh công nghiệp, tăch rgâl, rhŏ dŏng, logistics n’hanh wăng sa mpông n’har bri. Tổng Bí thư đă , n’gor ân ƀư jăp rơh bầu cử đại biểu Quốc hội khóa XVI n’hanh Hội đồng nhân dân ăp gưl năm kan 2026–2031; sơch dơi ăp nuĭh ntơh măt ntoh lư, ntơh măt an nău mĭn, nău mpŏng bah ƀon lan, rgop n’hao săk tam kan bah ăp nhih pah kan ƀon lan n’hao đă; rgum mât nâp njrăng n’gang neh dak, rnă njrăng, mât đăp mpăn lam rêh jêng kon nuĭh, lơn lah ta njok n’har bri; rdâk njêng trong n’har bri đăp mpăn, dêh bên, tâm rnglăp n’hanh hun hao.