VOV4.M'nông: Aƀaơ, ăp nhih pah kan leo hăn pâl nđaih, manh gŭ nde n'hanh ăp ntŭk rhŏ dŏng kan pâl nđaih n'gor Dak Lak hŏ nchrăp ăp ndơ rhŏ dŏng dŭt uĕh gay wơt năch pâl nđaih rnôk nar rlu lễ 30/4 n'hanh 1/5. Tĭng Sở văn hóa, Thể thao n'hanh Pâl nđaih n'gor Dak Lak, tât rnôk dja, 225 ntŭk manh gŭ nde, khách sạn ta nkual ƀon têh Buôn Ma Thuột năch pâl nđaih hŏ dăn gŭ bêng lĕ. Rnoh âk năch pâl nđaih ntĭnh lor an dăn gŭ lơn âk tât bah nkual ƀon têh Hồ Chí Minh, Hà Nội n'hanh ăp n'gor Khánh Hòa, Bà Rịa Vũng Tàu, Bình Dương, Bình Phước… Gay năch pâl nđaih geh du rơh rlu rlău n'hanh đăp mpăn, Dak Lak đă ăp ntŭk tơm rhŏ năch pâl nđaih lĭr nkrêp rnoh khlay ndơ tăch, n'hanh ton mô an geh nău nkrâm ndơ tăch, mât jrô khách sạn; ntrôl rnoh khlay ndơ gay joi sa. Ndrel đah nê, ăp ntŭk rhŏ dŏng ngêt sa ân uănh khlay mât kloh uĕh ndơ ngêt sa. Bah meng nê, ăp ntŭk tơm rhŏ dŏng pâl nđaih ân đăp mpăn njrăng, n'gang nuh srê Covid-19; mbơh ngơi tâm di đah năch F0 rnôk tât đah Dak Lak./.

Nuĭh rblang: Điểu Thân