VOV4.M'nông: Gay năp nău gĭt blău kơl nuĭh ƀon lan dŏng điện đăp mpăn, geh nău tam n'hanh njrăng der bah nău tât rmoh rmanh mpeh điện, n'gor Dak Lak mhe ƀư kơi năp nti dŏng điện đăp mpăn an ăp rnăk nuĭh rnoi mpôl đê̆ tâm nkual tĭng ƀư trong nchrăp kan trong rse n'hanh trạm biến áp 110kV. Aơ lah bôk nău kan gŭ tâm trong nchrăp hun hao rnoi mpôl đê̆ mpeh Trong nchrăp trong n'gâng điện đăp mpăn hăn rlău ăp nkual ƀon têh jê̆ n'hanh dah găp dŏng tơm prăk manh ODA bah Chính phủ Đức.

Ta n'gor Dak Lak, râng kơi năp nti geh nuĭh ƀon lan mpeh ăp xã Drây Sáp (nkuâl Krông Ana), xã Hòa Phú (nkual ƀon têh Buôn Ma Thuột) n'hanh 2 xã Ea Hồ, Dlieya (nkuâl Krông Năng). Tĭng nê, cán bộ điện lực hŏ ntĭm nti nuĭh ƀon lan ăp nkô̆ geh tât nău dŏng điện đăp mpăn, mpêt nkrem, geh nău tam tâm ban kơt trong njrăng der ăp nău tât rmanh điện n'hanh ăp nău gĭt blău tât đăp mpăn soih aih an trong rse điện cao áp./.

Nuĭh rblang: Điểu Thân