Ê hŏ tât 1 pơh lah tât rơh thi tốt nghiệp THPT năm 2023 mbra geh ƀư. Ăp ngih nti THPT ta n’gor Dak Lak lĕ ƀư lôch ăp nău kan nglâ̆ dŭt, gay ma mât đăp mpăn rơh thi geh đăp mpăn, ueh. Rơh thi tốt nghiệp THPT năm aơ, n’gor Dak Lak geh 33 ntŭk thi ngăn đah rlău 21.100 kon hoc râng thi, geh bơi tât 3 rbăn cán bộ, nai nti, uănh thi, uănh năl n’hanh kơl kan ta ăp ntŭk thi.

Wa PHạm Đăng Khoa, Giám đốc ntŭk kan ntĭm n’hanh nti n’gor Dak Lăk an gĭt, ntŭk kan lĕ geh njêng ăp mpôl kan uănh, năl ta năp rơh thi mpeh ăp nău gay ma mât đăp mpăn an rơh thi, nti nău blău kan an cán bộ uănh thi, n’hao nău kan mbơh tơih ntĭm nti gay ma mbơh ngăch ndăn, tŏng ăp mpeh ăp nău mhe ta rơh thi tât ăp nău nti n’hanh kon hoc. Tâm rgop na nê̆ đah ăp n’gâng kan an geh leo kan rdâk njêng ăp trong kan mât đăp mpăn rnă njrăng, đăp mpăn an rơh thi lôch nău roh đăp mpăn uh ah ta nkuăl Cư Kuin mhe nơh.