Nar nđaơ, Ủy ban Mặt trận tổ quốc Việt Nam n’gor Dak Lak ƀư bôk nău kan “Năm mhe ƀon tơm”, mâp măt nuĭh gŭ dak bah dih n’hanh nuĭh bên sĭt ƀon tơm wơt Tết Nguyên đán Giáp Thìn 2024. Ta bôk nău kan, đại biểu dơi djăt nău nkoch mpeh nău dơi n’hanh ăp nău geh hun hao wăng sa, rêh jêng bah n’gor Dak Lak tâm năm bah năp.

Kônh wa gŭ dak bah dih nkoch nău răm rhơn đah âk nău rgâl mpeh muh măt n’hanh hun hao wăng sa-rêh jêng bah Dak Lak; nkoch ăp nău ŭch bah nuĭh ƀon lan gŭ ngai, mpŏng ŭch n’gor nta nơih tay gay nuĭh gŭ dak bah dih mpeh wăng sa, rgop ndâk njêng n’hanh hun hao ƀon tơm. Ntoh ngơi ta bôk nău kan, wa H Yim Kđoh, Groi Kruanh UBND n’gor Dak Lak ndơn măt kruanh n’gor djôt dơn, rnê ăp nău rgop bah ăp nuĭh gŭ dak bah dih âk năm bah năp; mĭn lah Đảng, Ngih dak he uănh tât n’hanh uănh nsum mpôl nuĭh Việt Nam gŭ dak bah dih lah du gưl khlay mô dơi nkhah êng, lah du nuih n’hâm hun hao bah neh dak, bah n’gor.