VOV4.M'nông: Đah nău nsum ti bah ăp đơn vị, ăp nuĭh, ma bôk nău kan "Me mât bôk" tă bah Trung ương Hội Liên hiệp bu ur Việt Nam rgŏ jă, âk kon se kon đơi, mô geh ntŭk  nsing nơm ta Dak  Lak hŏ dơn geh nău ntop kơl, mât chăm lĕ ma drăp ndơ n'hanh nuih n'hâm. Lôch nê, ăp kon se geh tay ntŭk nsing nơm gay rlău dơi ăp roh yot, jêr jŏt, hun hao lam lĕ rngôch lơn.

Năm e nơh, me bơ̆ 2 hê oh Đoàn Nhã Trúc n'hanh Đoàn Nhã Phương khĭt tă bah nuh srê Covid-19, jêng 2 hê oh sĭt gŭ rêh đah bu che mpeh me ta buôn Kring, xã Ea Sin, nkuâl Krông Buk, n'gor Dak Lak. Wa Võ Thị Ngân, u 2 hê mon an gĭt, rnăk ach o, nău rêh dŭt jêr jŏt, ntop đah nuh srê đŏng jêng u său khân păng dŭt jêr jŏt. Dŭt lap, 2 hê mon hŏ dơi 2 bu ur doanh nhân dơn mât bôk, ton mbra hăn ndrel ăp oh mon tâm 5 năm tât, đah ăp nău kan ntop kơl lĕ mpeh drăp ndơ n'hanh nuih n'hâm:

         “Năm 2021 lah bar hê mon dâk nchih êng săk rnăk ach o, yor me bơ̆ rnăk ach o roh lah bar hê mon dâk nchih săk rnăk ach o. Yơn tât năm 2022 lah u mpeh me ân dăn gay bar hê mon n'glăp hộ khẩu u mpeh me gŭ an u păng mât dĭl. Uănh nsum lah ta nkual 3 ri jêr jŏt ngăn đŏng. Ntop ma u hôm geh ji nsôp nting đŏng, dâk hăn dăch dơm, lah hăn ngai sĭt ji mô dơi  ât.

Tâm nău rêh roh me đŏng, bơ̆ hăn wăng sa ngai, bar hê oh nô mon Lưu Hoàng Anh (8 năm deh) n'hanh Lưu Nguyễn Hà Vy (2 năm deh) ta thôn 3, xã Ea Kpam, nkuâl Cư Mgar dơn geh nsing tâm u mpeh bơ̆ gŭ rêh dơm. U Nguyễn Thị Xuân, 64 năm deh nkoch, rnôk me roh mon Hà Vy mô hŏ tât 7 khay deh. Bar năm rlău aơ, u hăn ƀư ăp ntil nău kan, ntơm bah mât sŭr, joi klo klêp, klêh tiêu, klêh cà phê, rao ndoh ngan an bu... gay geh prăk an mon hăn nti. Bar pe khay aơ, nău rêh pe hê u său bah ir jêr jŏt rnôk dơi Chi hội Bu ur thôn 3, xã Ea Kpam dơn mât chăm bar hê mon tĭng trong "Me mât bôk".

         Nơm geh nău ntop kơl bah Hội bu ur thôn 3 geh ăp nklâm ndơ gay mât chăm ăp mon ăp nar. Jŏ jŏ lah Hội bu ur tât khâl u său gay u său tâm mât tât têh jêng. Lah uĕh ăp gưl, ăp n'gâng kan, ăp oh yuh kơl u său.

          Tĭng Hội Liên hiệp Bu ur n'gor Dak Lak, nuh srê Covid-19 hŏ lơh jêng 18 kon se kon đơi ta n'gor. Ndrel  đah nê, geh bơi 2.300 kon se kon đơi yor ăp nkô̆ nău êng êng;  tâm nê geh 679 kon se kon đơi lĕ ma me n'hanh bơ̆. Tĭng ƀư bôk nău kan "Me mât bôk" tă bah Trung ương Hội Liên hiệp Bu ur rgŏ jă, Hội Liên hiệp Bu ur n'gor Dak Lak ndơ̆ luh lĕ rngôch ăp gưl Hội tĭng ƀư bôk nău kan tâm di đah nău ngăn geh ta ăp đơn vị, ta ntŭk. Ntơm an ƀư bah kêng dŭt năm 2021 tât aƀaơ, bôk nău kan hŏ dơn geh âk nău tâm ban ŭch âk bah ăp gưl hội.

        Ta xã Ea Kpam, nkuâl Cư Mgar, ma bôk nău kan, Hội hŏ buăt nthoi, rgŏ jă ăp mpôl kan, ăp nuĭh kơl mât chăm 6 kon se kon đơi, geh nău rêh jêr jŏt ta ntŭk an tât rnôk tŏng 18 năm deh. Yuh Trần Thị Thuyết, Kruanh Hội Liên hiệp bu ur xã Ea Kpam nkoch, bol ma  nău ntop kơl mpeh drăp ndơ mô hŏ âk yơn nău khlay lơn lah nău ƀư an nuih n'hâm ăp mon său rhơn nđơr. Ndrel đah nău kuăl jă, rgŏ jă ăp nuĭh lŏng nuih n'hâm, Hội hôm pơk trong ntĭt leo “Bu ur rgum joi loih ndŏk” tâm hội viên gay tăch ƀư prăk nkrem pă nklâm ndơ an ăp kon se dơi "mât  bôk" đŏng.

        “Hội hŏ way hăn tât chop khâl, rgŏ jă n'hâm suan tâm ban kơt leo ƀư chop khâl, pă nklâm ndơ an ăp mon său đŏng. Mbra ƀư leo chop khâl ma prăk măt n'hanh mbra pă an ma nklâm ndơ, kơt ndơ dŏng sa khlay ăp nar boh, mắm n'hanh phe".

          Tât aƀaơ, geh rlău 500 kon se kon đơi geh nău rêh jêr jŏt ta Dak Lak dơi ăp mpôl kan, ăp nuĭh mât bôk, ton ntop kơl đah âk trong ƀư kơt pă an học bổng, ntop kơl prăk rêh tât năm 18 năm deh n'hanh ntop kơl ƀư jay tâm rŏng. Lĕ rngôch rnoh khlay ntop kơl rlău 5 rmen prăk. Wa Tô Thị Tâm, Kruanh Hội Liên hiệp bu ur n'gor Dak Lak uănh năl, aơ lah bôk nău kan geh nkô̆ khlay kơl nuĭh jru hvi, rgop đăp mpăn lam rêh jêng kon nuĭh. Hội bu ur ăp gưl hŏ ndrel nsum ti rgum tơm ndơ, râng kơl na nê̆ ăp oh mon n'hanh mbra dơi mât kơl tay đah ăp kon se tâm let năp tay.

      “Bôk nău kan dja mpôl hên hŏ  jao nău kan an ăp Hội tâm dâng 100% mpôl mât bôk kan Hội ăp gưl dơn mât bôk du hê mon let lơ uănh tĭng đơn vị. Nkô̆ nău dŭt khlay mpôl hên ŭch rƀŏng tât lah rlău ma nkô̆ nău  tơm ndơ, prăk dŏng n'hanh ntop kơl drăp ndơ ri tâm pă nău tâm rŏng, nuih  n'hâm n'hanh năn ngăch rƀah gĭt ăp nău tâm rŏng, jêr jŏt bah ăp oh mon, rnôk nău mĭn rvê bah ăp oh mon hao têh kuâng rnôk mô geh me bơ̆, rnăk wâl. Nkhêp ăp rnôk Tết, nar 1/6 mô lah bŏng khay trung thu mô lah ăp nar khlay nê nơh gay ăp mon lhui bah ăp nău huăt tâm nuih n'hâm".

        Đah nău nsum ti bah ăp "me mât bôk”, âk kon se kon đơi ta Dak Lak mbra du gâl bar ir jêr jŏt, geh tay suan ntrôl gay rlău dơi ăp roh yot, khuch tât nuih n'hâm. Mô dơn lah ăp nău ntop kơl mpeh drăp ndơ, ma bôk nău kan, ăp kon se mbra geh tay ăp nău rgŏ jă mpeh nuih n'hâm, nău ndrel hăn n'hanh ntĭm nti mpeh nău blău mât chăm n'hâm suan gay ăp kon se hao têh jêng lam lĕ rngôch, rƀŏng tât nău rêh let năp uĕh lăng lơn./.

Nuĭh rblang: Điểu Thân