VOV4.M'nông: Ntơm bah bôk năm tât aƀaơ, nô nău hŭt mô tŏng geh nuĭh kan hăr blău ti kan ta ăp công ty, doanh nghiệp ta n'gor Dak Lak dŭt âk. Âk ntŭk dơn geh bar pe rhiăng nuĭh kan dơm, tâm rnôk nău ŭch tŏng geh hang rhiăng nuĭh kan tât hang rbăn nuĭh kan. Nău hŭt mô tŏng hô dja hŏ khuch tât nău pơk hvi nău kan, tăch rgâl bah tơm ntŭk kan.

Âk khay rlău aơ, Ntŭk ƀư njêng rsău măt n'hanh choh bok ao Hà Thư, Rkŭm công nghiệp Tân An, n'gor Dak Lak way tâm nău mô tŏng nuĭh kan hô. Wa Nguyễn Thị Trang, nuĭh tơm kan an gĭt, păng ŭch geh nklăp 800 nuĭh kan geh hăr blău nău kan, yơn bol ma geh âk trong joi yơn sơch lăp geh nklăp 200 nuĭh kan dơm. Mô tŏng nuĭh kan, ntŭk kan ân kan n'gul wah dơm, khuch têh tât trong nchrăp ƀư njêng:

“He nchih nkoch ta ăp trang pơk joi đŏng yơn rnoh nuĭh hăn ndơ̆ si ƀŭt dăn lăp kan dŭt đêt. Ăp nuĭh hăr blău ti kan bah ri sĭt rlu nuh srê ri ăp băl hăn lăp ta aơ kan dơn 1 bar khay dơm ri khân păng plơ̆ sĭt tay Bình Dương, Đồng Nai gay pah kan khân păng mô krêp dêh đah Công ty he. Công nhân dôl pah kan tât khay klêh tiêu, cà phê ri khân păng hôm rlu kan đŏng gay ƀư mir ba kơt ăp nuĭh rlu ri mô hôm plơ̆ kan tay đŏng ôh".

Tâm ban kơt nău wa Trang, wa Nguyễn Kim Tùng - Groi Giám đốc công ty TNHH SX – TM & XD Tùng Bách an gĭt đŏng, Công ty bah păng mô dơi pơk hvi nău kan, hôm mô dơi kan lĕ rnoh dăng aƀaơ ơm yor mô tŏng geh nuĭh kan hăr blău ti kan.

“Ntơm bah bôk năm tât aƀaơ Công ty hên ŭch geh nklăp 50 nuĭh kan ma mbơh joi hŏ  10 nar aơ, ƀư ma âk trong mbơh joi đŏng yơn dơn sơch geh mô hŏ tât 10 nuĭh. Nău ngăn geh aƀaơ lah mô tŏng nuĭh kan dŭt âk. Păng mô tŏng kơt nê̆ ri khuch âk ngăn, ntĭt kơt doanh nghiệp bah he ân pơk hvi du đêt ntil kan n'hanh đăp mpăn ntil nău kan ơm yơn mô nănh pơk luh ơm yor mô tŏng nuĭh kan".

Tĭng ntŭk rgum mbơh joi nău kan n'gor Dak Lak, kơp tât quý I, năm aơ, geh 674 doanh nghiệp tâm n'hanh bah dih n'gor đăng ký sơch lăp nuĭh kan, đah nău ŭch sơch lăp nklăp 30.000 nuĭh kan. Yơn lah, 3 khay aơ, ntŭk kan hŏ mbơh joi an bơi 10.000 tơ̆ nuĭh kan n'hanh nău ŭch sơch lăp nuĭh kan bah âk doanh nghiệp ta n'gor hôm dŭt âk. Wa Nguyễn Văn Cường, Groi Giám đốc Ntŭk rgum mbơh joi nuĭh kan an lah, lơn âk nkô̆ tă khuch bah nuh srê COVID-19 hôm jâk rju:

 “Lơn âk nuĭh kan tât rnôk dja hŏ tât dơi đah nuĭh sơch lăp nuĭh kan bah doanh nghiệp ma ăp trong mbơh bah ăp xã phường tâm ban kơt ăp rơh mbơh joi nău  kan. Yơn lah tă khuch bah nuh srê du đêt nuĭh kan khân păng hôm kă rnam plơ̆ tay ăp nkual công nghiệp yor kơt nê̆ ma mô tŏng nuĭh kan hôm dŭt âk".

  Nchih rgum bah UBND n'gor Dak Lak: Tâm quý I năm 2022, geh 227 doanh nghiệp hŏ plơ̆ kan tay, hao 22,7% rđĭl đah ndrel khay dja năm 2021. Rlău ma nê, geh 327 doanh nghiệp njêng mhe, dah 21,8% trong nchrăp, hao 19,78% rđĭl đah ndrel khay dja năm e nơh. Yơn lah tă bah jêr jŏt tâm nău joi nuĭh kan, lơn lah ăp nuĭh kan hăr blău ti kan hŏ ƀư ăp Công ty, doanh nghiệp ntŭp tâm trong jêr. Tĭng wa Nguyễn Hoàng Giang, Giám đốc Sở Lao động Thương binh n'hanh Xã hội n'gor Dak Lak, Sở dôl nsrôih tĭng kơn gay droh rklaih jêr jŏt tâm pah kan ntop kơl sơch lăp nuĭh kan n'hanh ntĭm nti nău kan nuĭh kan. yơn lah nău nsĭt dơi bôk năp mô hŏ dơi kơt nău mpŏng kâp ơm.

“Sở dôl nsrôih tâm boh kan nsum đah ăp doanh nghiệp mbơh gĭt nău lư, njêng trong kơl uĕh gay wăch rgum nuĭh kan. Hôm đah ăp nuĭh geh nău ŭch nti nău kan, ntĭm nti nău kan ri aƀaơ ăp ntŭk ntĭm nti nău kan bah n'gor ŭch tĭng nău dăn đă tâm bah kơt ăp ntŭk way ntĭm nti mbro bah ăp nkuâl way ƀư sơch lăp nuĭh nti gay ntĭm nti ăp ntil nău kan âk mpưm đŏng, yơn tât rnôk aƀaơ mhe geh sơch lăp 8,6% nuĭh lăp nti dơm. Let năp tay, mbra nsrôih lĕ n'hâm suan nơm gay tĭng ƀư nău ntĭm nti nău kan an nuĭh kan ta Dak Lak."

Tâm rnôk ăp doanh nghiệp “kroh khar" nuĭh kan geh hăr blău ti kan n'hanh nău hŭt mô tŏng dja mbra khuch tât rnoh ngăch dâk hao tay ƀư njêng tăch rgâl ri nău an ƀư ăp trong ntop kơl dâk hao tay ntŭk joi geh nuĭh kan gay droh rklaih jêr jŏt năn ngăch an doanh nghiệp dôl jăch ndăn rlău ăp ntil nău kan êng ƀa ƀă./.

Nuĭh rblang: Điểu Thân