Lơ 30 khay 12 năm 2023, Thủ tướng Chính phủ lĕ uănh an dăp rgum nsum n’gor Dak Lak năm 2021-2030, uănh tât năm 2050. Tĭng trong nchrăp, năm 2030 n’gor Dak Lak jêng ntŭk uĕh, di năch pâl nđaih tâm dak n’hanh lam ntŭr neh; nkual ƀon têh Buôn Ma Thuột lah du ntŭk hun hao bah nkual Tây Nguyên, rgum lăp n’hanh boăt nthoi tĭng trong pơk hvi đah nkual n’hanh lam ntŭr neh; ntrôl dăng rgâl trong wăng sa tĭng trong mhe, n’hao nâp nâl hun hao. Tâm nĕ, nsrôih hao jêng wăng sa rĭng bôk nuĭh ăp năm tâm rơh 2021-2030 lah 11%/năm; GRDP rĭng bôk nuĭh tât năm 2030 geh rlău 130 rkeh prăk. Ăp rnoh an aơ dơi mĭn lah tâm di tĭng nău râng rgop bah âk nuĭh way kan, nuĭh khoa học, nuĭh mât uănh n’gâng kan, nău kan, ƀon lan n’hanh ăp rơh kơn nuĭh ƀon lan ăp rnoi mpôl đêt tâm n’gor. Wa Võ Ngọc Tuyên, Giám đốc N’gâng kan Kế hoạch-Đầu tư n’gor Dak Lak an gĭt:

Dăp rgum n’gor Dak Lak ƀư geh săk rnglăy nău mĭn nsum, lĕ đah nău kan bah lĕ trong chính trị n’hanh nuĭh ƀon lan tâm n’gor. Tal 2 dơi lah dăp rgum n’gor Dak Lak rơh aơ dơi ƀư têh, rjăp, tĭng ăp nău nchrŏng bah neh dak, mĭn njêng djăt geh săch nău blău ơm lam ntŭr neh n’hanh ngih dak, dŏng tâm di đah nu nău ngăn bah n’gor tĭng nĕ mbơh ƀư uĕh ăp nău geh n’hanh nchroh mbơh jêr jŏt ntŭl rlong tâm năm tât. Bah nĕ n’gluh an nău kan trong mkra an ăp trong gay ƀư uĕh trong kan dăp rgum.

Uănh tât năm 2050, Dak Lak jêng n’gor geh ntŭk ntô bri dak, nău uĕh, boăt nthoi mĭn ƀư mhe, lah ntŭk tât ŭch ngăn, dôl rêh. Hao tâm rmôt 25 n’gor hun hao uĕh lăng dâk bôk năp lam dak. Nkual ƀon têh Buôn Ma Thuột lah “Nkual ƀon têh cà phê lam ntŭr neh”, nklang nkual têh, ntŭk văn hóa, mât ndrăy âk ntil sinh học nkual Tây Nguyên n’hanh nkual 3 dak hun hao Việt Nam-Lào-Campuchia, ntŭk mĭn njêng kơt dŏng khoa học n’hanh công nghệ lŏ mir lam ntŭr neh. Gay dơi ƀư nău aơ, tĭng wa Vũ Văn Hưng, Kruanh UBND nkual ƀon têh Buôn Ma Thuột, n’gor Dak Lak, lah:

Tĭng tâm dăp rgum bah n’gor, nkual ƀon têh Buôn Ma Thuột mbra ntrôl ngăch ƀĭt joet dăp rgum nsum nkual ƀon têh Buôn Ma Thuột tĭng nău ntrŭnh bah Thủ tướng lĕ an. Nkre ƀư tĭng Nghị quyết 07 bah Thủ tướng mpeh kơt dŏng trong ƀư êng đah Nkual ƀon têh Buôn Ma Thuột ta du đêt nău nchrăp ƀư, ndơ ƀư khlay lĕ mbơh UBND n’gor gay mbơh an Ủy ban Thường vụ n’gor ủy gay bah nĕ mbra mbơh ƀư tĭng gưl tay. Tal 2, tĭng tâm dăp rgum nsum ri nkual ƀon têh mbra ƀư sam ƀŭt ntuh kơl gay mbơh an n’gor ndơ̆ an tâm sam ƀŭt ntuh kơl ta nkual ƀon têh mbra n’hao mât uănh neh ntu ndâk ƀư gay mât uănh uĕh ăp nkô̆ nău lĕ dơi uănh an dăp rgum. Tĭng nkô̆ nău nĕ dơh lơn an ăp nuĭh ntuh kơl n’hanh ăp ntŭk kan ƀư tĭng dăp rgum bah kơi aơ.

 Tĭng wa Nguyễn Tuấn Hà, Groi Kruanh rnâng kan UBND n’gor Dak Lak, ăp nău rƀŏng n’hanh trong uănh jŏ jong dăp rgum bah n’gor lah ntŭk chính trị, ntŭk pháp lý nâp nâl pơk âk trong hăn mhe, mpŏng an hun hao mhe, ngăch nâp nâl. Gay nchrăp wơt ăp nău geh mhe, n’gor đă 4 nău kan khlay nĕ lah: dăp rgum tay ăp nău nkra njêng lŏ mir, công nghiệp; hun hao nkual ƀon têh; joi ƀư, dŏng tâm di ndoh ndơ bri dak; n’hao boăt nthoi tâm rgop nkual, n’gor; n’hanh 5 nău hao mhe geh: rgâl hành chính, ntŭk ntô ntuh kơl tăch rgâl; boăt nthoi ntung trong; hun hao, kơt dŏng khoa học công nghệ n’hanh rgâl mhe mĭn njêng, rgâl mhe lĕ rngôch mpeh hun hao ntĭm nti, ntĭm nti n’hanh dak si; ndâk ƀư ntung trong tâm ban, mhe. Wa Nguyễn Tuấn Hà an gĭt:

Thủ tướng Chính phủ uănh an dăp rgum n’gor Dak Lak lĕ pơk ăp trong hun hao mhe đah nău dăp ăp nău khlay mhe an n’gor. Tĭng nkô̆ nău mât uănh tâm di săk rnglăy ăp neh ntu bri dak, ndơ khoáng sản, ndơ bri, ndơ dak an nău ŭch hun hao nâp nâl, hao jêng uĕh nđir tâm di đah rgâl trôk nar, ngăch gĭt nu nău tâm dak n’hanh lam ntŭr neh lơn lah nău cách mạng công nghệ rơh tal 4 gay gĭt ngăch đah trong rgâl mrô ndơ̆ Dak Lak hun hao ngăch nâp nâl lăp nsum n’hanh hao prêh mhe.

Tây Nguyên geh ntŭk têh khlay mpeh chính trị, wăng sa, văn hóa, mât njrăng bri dak-rnă njrăng tâm rnglăp đah lam dak. Tâm nĕ, Dak Lak dơi uănh lah nklang bah nkual Tây Nguyên. Ta rƀŭn nchră mbơh nău ntrŭnh uănh an dăp rgum n’gor Dak Lak mhe aơ, du tơ̆ tay Groi Thủ tướng Trần Hồng Hà mĭn lah, Dak Lak geh ntŭk khlay, ndrŏng nău geh ndơ, geh âk văn hóa. Dăp rgum n’gor Dak Lak lah du njoăt na nê̆ nău ntrŭnh têh bah Bộ chính trị ta Nghị quyết mrô 23 mpeh trong hun hao wăng sa-rêh jêng n’hanh đăp mpăn bri dak, rnă njrăng nkual Tây Nguyên tât năm 2030, uănh tât năm 2045. Yor nê, Groi Thủ tướng Trần Hồng Hà đă.

Nău kan bôk năp bah nău kan dăp rgum nĕ lah nău ndrel ăp ntŭk êng bah Tây Nguyên uănh kơp tay dăp rgum nkual Tây Nguyên nău aơ dŭt n’hâm khlay. Yor mbra saơ rup gui bah Dak Lak boăt nthoi đah ăp nkual nsum. Dơi saơ ntŭk nklang bah Dak Lak tâm trong boăt nthoi đah ăp nkual ta Tây Nguyên, đah ăp nkual têh êng kơt Duyên hải miền Trung, đông nam bộ mô lah dak bah dih kơt Campuchia n’hanh ăp dak đông nam á êng. Ndrel đah nău hun hao boăt nthoi nkual n’hanh nkual jêt gâp an lah mbra nta luh du Tây Nguyên geh âk nău ntoh lư dŭt ngăch.

Dơi lah, nău năl, gĭt n’hanh dŏng uĕh ăp nău geh, nău dơh ndrel đah dăp rgum lĕ rngôch nsum bah n’gor, Đảng bộ, n’gâng kan ƀon lan, nuĭh ƀon lan ăp rnoi mpôl đêt Dak Lak mbra mât uĕh, ndăn nău geh mhe bah "năm bih Yŭk yăk 2024” ndơ̆ wăng sa rêh jêng bah n’gor hao jêng têh dăng, hun hao ngăch n’hanh nâp nâl ta trong hăn mhe.