Tâm rnôk lam dak geh mbro ăp rơh ŭnh sa lơh khuch khat têh mpeh nuĭh n’hanh drăp ndơ, tâm bah ri aơ, mpôl Cảnh sát njrăng n’gang puh n’hât ŭnh sa n’hanh kơl nuĭh Công an n’gor Dak Lak ƀư âk nău kan tiăr nti kơt dŏng ngăn njrăng n’gang puh n’hât ŭnh sa n’hanh kơl nuĭh an hang rbăn nuĭh ƀon lan lam n’gor. Bah nê, n’hao nău gĭt êng tâm ban kơt n’hao nău gĭt êng nău blău njrăng n’gang puh n’hât ŭnh sa an ăp nuĭh, gay hŭch bah ir roh huach mpeh nuĭh n’hanh drăp ndơ rnôk geh nău tât ŭnh sa.

Nar kêng dŭt khay 10, bơi 20 cán bộ tahen Cảnh sát njrăng n’gang puh n’hât ŭnh sa n’hanh kơl nuĭh Công an n’gor Dak Lak ndrel ntơh măt ăp rnăk wâl geh măt ta jâng gung rot jay B Hoàng Anh Gia Lai, trong Nguyễn Công Trứ, nkual ƀon têh Buôn Ma Thuột gay nti puh n’hât ŭnh sa ta jay prêh dăp. Ăp nuĭh râng dơi ntĭm nti trong dŏng bình puh n’hât ŭnh, mboi dak puh n’hât ŭnh sa, dŏng ntung gung rse kơl ăp nuĭh geh kol khan ntŭk ŭnh sa, phôl n’hâm kơl rêh ăp nuĭh mâp rmanh….wa Bùi Huy Phước – Ntơh măt Ban mât dŏng chung cư Hoàng Anh an gĭt, ăp năm doanh nghiệp ƀư mbơh gĭt, nti trong njrăng n’gang puh n’hât ŭnh sa n’hanh kơl nuĭh tât ăp rnăk ƀon lan gŭ rêh tâm ăp jay chung cư. Rlău ma nê hôm nkoch trêng, rgŏ jă ăp nuĭh tĭng jăp ăp quy định n’hanh ntrŭp ăp tŏng ndơ dŏng njrăng n’gang puh n’hât ŭnh sa.

“Ban mât njrăng chung cư kan nsum đah đơn vị njrăng n’gang puh n’hât ŭnh sa bôk  năp lah nkoch trêng n’hanh tâl bar lah đă ăp rnăk ƀon lan geh ndrung loih mô geh mpông nchuăt luh ri ân ngăch nkra ƀư mpông luh. Rơh mhe aơ nơh ri lơn âk ăp nuĭh ƀon lan hŏ ƀư, hôm du đêt rnăk mô hŏ ƀư  ma mô geh măt tâm rơh dja ri mpôl hên rgŏ jă tay, đă khân păng ƀư tât rnôk khân păng sĭt, gay rnôk geh nău tât ri he geh trong nchuăt luh đăp mpăn an săk nơm n’hanh rnăk wâl.

Nô Nguyễn Tuấn Anh, du hê nuĭh ƀon lan gŭ rêh ta rot jay B Hoàng Anh – Buôn Ma Thuột hŏ bơi 10 năm aơ nkoch, nău nuĭh ƀon lan dơi năp nău gĭt blău, tiăr nti nău dơi njrăng n’gang puh n’hât ŭnh sa ta chung cư prêh dăp dŭt n’hâm khlay. Gay rnôk mô geh nău lap rtoh ŭnh sa, ăp nuĭh nkân nkân dŏng nău gĭt blău gay njrăng n’gang an săk nơm, kan nsum đah mpôl kan dơi kan rdâng lơh đah ŭnh sa n’hanh ntop kơl ăp nuĭh ndrel nchuăt klaih luh. Nô Nguyễn Tuấn Anh an gĭt:    

“Rnăk gâp hŏ nsrôih râng tiăr nti njrăng n’gang puh n’hât ŭnh sa, n’hanh rvăt năp ăp ndơ dŏng njrăng n’gang ŭnh sa tâm rnăk wâl gay rnôk geh nău tât ri mbra nkra n’hanh nchuăt klaih êng săk nơm. Gâp saơ nău kơi năp nti nău kan njrăng n’gang puh n’hât ŭnh sa dja lah nău dŭt khlay, mpŏng lĕ rngôch ăp nuĭh ƀon lan êng ta chung cư ân geh măt ăp tŏng gay mpôl kan njrăng n’gang puh n’hât ŭnh sa n’hanh kơl nuĭh n’hao nău gĭt blău n’hanh rnôk geh nău tât ŭnh sa ri ndrel kan nsum puh n’hât n’hanh klaih luh dơi.”

Tĭng nău mbơh bah mpôl Cảnh sát njrăng n’gang puh n’hât ŭnh sa n’hanh kơl nuĭh Công an Dak Lak, ntơm bah n’gul khay 12/2022 tât aƀaơ, ta Dak Lak geh 17 tơ̆  ŭnh sa, lơh khĭt 1 hê nuĭh, rmanh bar pe jât nuĭh, lơh khuch khat mpeh nuĭh n’hanh drăp ndơ đah rnoh prăk rlău 5,55 rmen prăk. Rnoh âk tơ̆ ŭnh sa rđĭl đah ndrel khay dja năm bah năp nơh hŭch 03 tơ̆, yơn rnoh jru hô hao âk, rnoh nuĭh geh rmanh âk lơn. Mpôl kan dơi kan hŏ ƀư mbơh nti pháp luật, nău gĭt blău njrăng n’gang puh n’hât ŭnh sa n’hanh kơl nuĭh an hang rbăn nuĭh; pơk 101 jrô tiăr nti nău kan njrăng n’gang puh n’hât ŭnh sa n’hanh kơl nuĭh an nklăp 9.300 đội viên rmôt ƀon lan mât njrăng êng, rmôt njrăng n’gang puh n’hât ŭnh sa tâm dâng….    

Trung tá Phùng Việt Đức – Groi kruanh Jrô kan Cảnh sát njrăng n’gang puh n’hât ŭnh sa n’hanh kơl nuĭh Công an n’gor Dak Lak uănh năl, nău hang rbăn nuĭh dơi nkoch trêng, rlong saơ, tiăr nti kơt dŏng ngăn njrăng n’gang puh n’hât ŭnh sa n’hanh kơl nuĭh, mbra n’hao nău gĭt blău n’hanh n’hao nău ngăch ngăr  geh tât pah kan njrăng n’gang puh n’hât ŭnh sa, klaih luh tâm ban kơt nău blău mpeh kơl rêh ngăch bôk năp. Ntơm bah nê, hŭch dŭt đêt khuch khat mpeh nuĭh n’hanh drăp ndơ tâm ăp rơh ŭnh sa. Trung tá Phùng Việt Đức an gĭt:

“Ma ăp nău kan tiăr nti njrăng n’gang puh n’hât ŭnh sa ri nuĭh ƀon lan n’hanh ăp nuĭh lah kon se nti, sinh viên, nuĭh kan n’hao nău gĭt dơn êng nău kan bah săk he nơm tâm pah kan njrăng n’gang puh n’hât ŭnh sa n’hanh rƀah gĭt ăp trong nkra tơm mpeh nău njrăng n’gang puh n’hât ŭnh sa đah jay gŭ tĭng rnăk wâl, jay gŭ mpôl, ăp chung cư mô lah ký túc xá bah kon se nti sinh viên. Lôch bah aơ rƀah gĭt ăp kỹ thuật trong puh n’hât ŭnh sa n’hanh lơn lah ăp nău blău nkra lơh nău tât rnôk geh rtoh ŭnh sa mô lah geh nău tât ŭnh sa”.

Ŭnh sa, rtoh lah ăp nău tât mô geh nuĭh ŭch rŏng, yơn lah hôm geh nău tât mô gĭt moh rnôk. Nău dơi geh hăr blău, nuih n’hâm nâp tâm trong njrăng n’gang puh n’hât ŭnh sa ntơm bah rnôk mhe ntơm ntoh tâm ban kơt nchrăp trong klaih luh tâm rnôk ŭnh sa lah dŭt n’hâm khlay đah lĕ rngôch ăp nuĭh. Ntơm bah nê, mbra ƀư an dŭt đêt khuch khat mpeh nuĭh n’hanh drăp ndơ rnôk geh nău tât ŭnh sa./.